Klumech er a First Presidency, Kot el Buil 2012
Kiei er a Bekerredechel el Klengar
Sera uchelel a beches el rak, eak millekoi er a Ruriul-klebesei el Santo er a ngii dil ker el di mo tir, e blak a rengrir, losiik er sel ngii a kumekedong er ngii el kmo ng bekerredechel el klengar—el klengar el mui er a klungiaol, ungil, me a klengeltengat. Meng diuaia kot el omesubed er a skuul er a ABC, eak mocholt a kuk di ABC er ngak el sebechel ngosukid el rokui el mo kiei er a bekerredechel el klengar.
Momes er a Klungiolel a Tekoi
A er a ikel ABC er ngak a melutk el kirel a blekerdelem. A William James, el meketeketang el mesuub a blekerdelir a rechad me a klemerang, a milluches el kmo, “Sel kot el klou el uldikel er chelechang el telcheroll a sel debetik el kmo a rechad, sel lemengodech a uldesuir, eng sebecherir el ngmodech aikel ngara ikrel a klengar tir.”1
Betok el tekoi er a klengar a ultuil er a blekerdeled. Sel teletael el dengiltii sel domes a tekoi me a blekerdeled el mo er a rebebil a klou a lengedechii. Me sel doruul el mor sel kot el tkul er bab el sebeched e dolilt el mo ngara deoureng er a cheslel a teletael el dengarngii, el ngii dil teletael, a meskid a budech me a klungiolel a reng.
A Charles Swindoll—chad er a omeluches, omesuub, e bastor er a Rekristiano—a dilung el kmo: “A denguu er ngak, ea blekeradel, a lmuut el klou a belkul er a …ikel mla mo merek el tekoi, udoud, ngii dil teletael, chelitechetud, klungioled, me a ikel bebil er a rechad omdasou malechub ete kmung malechub ete meruul. Ngelmuut el klou a belkul er a klebekeled, sengk er kid, malechub a duch. Ng toketekii malechub eng tomelii a kombalii, ikelesia, me a blai. Sel klebokel el tekoi el kirel a kmo kid a ngarngii a techelled el melilt er a bek el sils el kirel a blekerdeled er tial sils.”2
Ng diak el sebeched el metebechelii a eolt, eng di ng sebeched el sumechokl a yars. Meng kirel sel kot el ngarbab el deoureng, budech, me a klungiolel a reng, e bo dolilt el omes er a klungiolel a tekoi.
Moumerang er Kau
B a kirel sel di kau—el omerang er kau, me tirkel ngara bitar kau el chad, me a ikel diak a ulebengelel el osisechakl.
Bom ngara klemerang el mor kau, me a rebebil, me a Demam er a Babeluades. A tal chad el dimlak el ngara klemerang lobengkel a Dios a Cardinal Wolsey el ngii, a lolekoi er ngii a Shakespeare el kmo, ng chilitii a klengar ngii el mesiou er a retedei el ngarbab el chad e mlara deoureng loba iilteet me a klisiich. Ea uriur, eng mlengubet er a klissich me a ikel rokui el kloklel er a merreder el mlo diak el soal. A Cardinal Wolsey a lilangel el kmo:
Omko ak milesiou er a Dios er ngak loba blak el reng.
Ak millesiou er a king er ngak, me Ngii a diak el uaia ngak el udelang.
Ng chilitak er mederir a recherreuek.3
A Thomas Fuller, el chedal a ikelesia e mesuub a reksi er a English el kiliei er a taem er a 17th century, a lilchesii tiakid el klemerang: “A chad a diak loumerang alsekum eng diak el kiei loltirakl aikel loumerang.”4
Lak mtomer kau e lak bechiteterir a rebebil me rellau el mo oumerang el kmo ngarngii a telkelel aikel sebechem el meruul. Moumerang er kau e mkiei el remuul aikel kau a sebechem el remuul.
Ng sebechem el mor sel kau oumerang el kmo ng sebechem el mor ngii. Moumerang e leborngii a klaumerang er kau.
Mchebangel a Ringel el Diak Ko Medakt
Sel mo diak a dekted a mo klou a belkul el kerebil a klechad alsekum eke de omdasou er ngii el kmo ngarngii er a rengud a mora kodall el kirel ng bai blak el reng el mo kiei er a ungil klengar.
A Ralph Waldo Emerson el chad er a omeluches er a America a dilung el kmo: “Ngii dil ngerang el moruul er ngii eng kirel mo diak a dektem. Ngii dil rael el bo molilt er ngii, eng blechoel di ngarngii a kmong techang el kmu er kau el kmo ke cheleuid. Ng blechoel di ngarngii a ringelel ongetikaik el rullau me ke mo oumerang el kmo a romtok er kau a melemalt. Me sel dolemotem er a rael el bo doltirakl er ngii el mora ulebongel e ngultuil er a osisiu el teletael el soldau ousbech er ngii. A budech a ngarngii a klungiolel, eng di ngultuil er a re diak el medakt el sechal me a redil el mo nguu.”5
Ng morngii a taem el bo medakt e mechitechut a rengum. Ke locha mo omelchesiu er kau mechitechut. A techall el bo mesisiich a locha kmal meringel. Ng locha ngarngii a taem eke omelchesiu er kau el uaia David el loldechelakl er a Goliath. Eng di molatk el kmo a—David a mlo kats!
Lak ko medakt el nguu sel uchelel a rael el kirel a moktek er kau, e dirrek el muut el mesisiich el blekeu a usbechall sel sekum eke mesibas meng mo kirem el lemuuut er a ongerung.
Bol ngarngii a duch el reng er kau el mo blak a rengum, el osengem a melutk el kirel a moktek er kau, e diak ko medakt el mo obangel a ringel el ngii a mor ngii me a dirrek el blak el reng el melasm er a ongerung, alsekum eng mo kirem. “A bebil er a taem ea blekeu a sel kekerei el ngor el kmung er kau er a ulebongel er a sils el kmo, ‘Ak klmuut el melasm er a klukuk.’”6
Bo dolbedebek aikal ABC sel domuchel er a omerolld el bedul a beches el rak, el mo blekerdeled el omes er a klungiolel a tekoi, me a klaumerang el kmo ng sebeched el mo ngmai aikel moktek er kid me a urunguled, e diak de medakt el mo obangel a ringel el ngii a mei. Seikid a kau a mo kiei er a bekerredechel el klengar.
© 2012 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/11. Kengei er a oidel: 6/11. Oidel a First Presidency Message, January 2012 Palauan. 10361 881
Osischeklel Tial Klumech
Momdasou a siotai er a rechad er a telungalk el mo ouchais aikel mla duubech el mor tir el teletael el ungil blekeradel, di tir el oumerang er tir, malechub a blekeu a ngilsuterir. Malechub e msiotai er tir el mo osiik okesiul aikal osisechakl er a chelsel chedaol llechukl. Ng sebechem el mo kldmokl el mo olisechakl lokiu a nglunguuch e mdasou a cheldecheduch er a chedaol llechukl malechub a kuk teletael el mla duubech el mei er kau.