iVaqa ni Veisiko, Janueri 2012

Veikaroni kei na Veiqaravi ena Siko Vuvale

Vulica na itukutuku oqo, ka me veivosakitaki vata kei ira na marama o sikova ena kena gauna donu. Vakayagataka na taro me vukea na nomu vaqaqacotaki ira na marama ka cakava me sa tiki kaukauwa ni nomu bula na iSoqosoqo ni Veivukei.

Vakabauta, Matavuvale, Veivukei

“Na nodra soli ka [e ka] cecere cake mai na yalo ni lomasoli,” vakavulici Peresitedi Henry B. Eyring, iMatai ni Daunivakasala ena Mataveiliutaki Taumada. “Na loloma cecere e sucu mai na vakabauta na Turaga o Jisu Karisito ka sa vua ni Nona Veisorovaki.”¹ Me baleti kemuni na marama ena iSoqosoqo ni Veivukei, na kena vakayacori na loloma cecere e rawa ena siko vuvale, e dua na sala bibi me vakayacori kina na noda vakabauta na iVakabula.

Mai na siko vuvale, eda vakayacora na veikaroni mai na noda veitaratara vei ira vakayadua na marama, wasei ni dua na itukutuku ni kosipeli, ka vakasaqara me da kilai koya kei na gagadre ni nona matavuvale. “Na veisiko e cakacaka ni Turaga ena gauna eda vakaliuca kina na tamata ka sega ni iwiliwili,” vakamacalataka o Julie B. Beck, peresitedi raraba ni iSoqosoqo ni Veivukei. “Na kena dina, e sega ni dau oti na veisiko. Sa ivakarau ni bula ka sega ni itavi. Na yalodina tiko ena veisiko sa ivakadinadina ni noda cakacaka vakatisaipeli.”²

Ena noda vakayacora vakatautauvata kei na veikaroni ena masumasu, eda vulica kina me da veiqaravi vakauasivi cake sara kei na sotavi ni nodra gagadre na marama vakayadua kei na nona matavuvale. Na veiqaravi e rawa me levu na kena vatukana—eso e levu ka so e sega soti ni levu. “E dau vakavuqa na veivukei lalai sa ikoya ga e gadrevi me vakatataki ka vakalougatataki kina e dua na tamata: o ya na kena tarogi na nona matavuvale e dua; na vosa e veivakayaloqaqataki, e dua na veivakacaucautaki dina, e dua na ivola lekaleka ni vakavinavinaka, kei na veivosaki ena talevoni,” e vakatavulici Peresitedi Thomas S. Monson. “Kevaka me da dau veirairaici tiko ka veikauwaitaki, ka da vakayacora na veika eda sa vakauqeti kina, eda rawa ni rawata na veika vivinaka. … E vakaitamera na cakacaka ni veiqaravi era sa vakaitavitaki ira rawa kina o ira na ilawalawa levu ni dauveisiko ni iSoqosoqo ni Veivukei.”³

Mai na iVolanikalou

Joni 13:15, 34–35; 21:15; Mosaia 2:17; Vunau kei na Veiyalayalati 81:5; Mosese 1:39

Mai na Keda iTukutuku Makawa

Ena 1843, o ira na lewe ni Lotu e Nauvoo, Illinois, era a wase me va na tabanalevu. Ena Julai ni yabaki o ya, eratou a lesia e dua na komiti ni veisiko o iratou na iliuliu ni iSoqosoqo ni Veivukei me lewe va na marama mai na veitabanalevu yadua. Na itavi ni komiti ni veisiko e oka kina na veiwaseyaki ni veika e gadrevi kei na kumuni ni isolisoli. E vakayagataka na iSoqosoqo ni Vevukei na veisolisoli oqo me vakarautaki me baleti ira era gadreva tu.⁴

Ena nodra sa sega ni kumuna na isolisoli o ira na dauveisiko, e se tudei tu ga na nodratou itavi ni veiwaseyaki ni veika e gadrevi—vakayalo ka vakayago—kei na kena cakacakataki me sotavi na veigagadre oqori.O Eliza R. Snow (1804–87), ikarua ni peresitedi raraba ni iSoqosoqo ni Veivukei, a vakamacalataka: “E dua na qasenivuli … e dodonu me tu dina vakalevu vua na Yalo ni Turaga, ena nona curuma e dua na vale me kila se yalo cava ena sotava e kea … Masuta taumada na Kalou kei na Yalo Tabu mo ciqoma [na Yalotabu] me rawa ni o na sotava na yalo o ya ka tiko ena vale o ya … ka na rawa ni o vakila mo tukuna na vosa ni sautu kei na vakacegu, kevaka o raica ni vakila na batabata e dua na marama, kauti koya ki lomamu me vaka o mokota e dua na na gone ka vakatakatari [koya].”⁵

© 2012 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/11. Vakadonui me vakadewa: 6/11. iVakadewa ni Visiting Teaching Message, January 2012. Fijian. 10361 858