Agtutubo
Ti Kararagko ti Pammati
Idi agtawenak iti 18, nagtrabahoak iti pagtagilakuan ti muebles kas paralako. Narigat unay ti iskediulko ti trabaho. Agtrabahoak manipud iti 8:00 a.m. agingga 10:00 p.m., Lunes agingga iti Sabado. Nagladingitak gapu ta saanak a makadar-ay iti institute ken kadagiti aktibidad iti Simbaan.
Rinugiak ti nagkararag iti Nailangitan nga Ama a sipapammatiak unay tapno agkiddaw Kenkuana a tulongannak a makasarak iti maysa a pagtrabahuan a diak kasapulan ti agtrabaho kadagiti Sabado tapno makapanak iti institute ken iti dadduma pay nga aktibidad iti Simbaan.
Maysa nga aldaw iti trabahok tultulongak ti maysa a lalaki. Nagsarsaritakami, ket kinunana nga agtrabaho isuna iti maysa a dakkel a banko. Sinaludsodko no kasano a makikompetensiaak para iti aglukat a pagtrabahuan iti daytoy a negosio. Intedna ti nagan ken numero ti teleponona ket imbagana kaniak a mabalinko a tawagan ti recruiter ket ibagak nga am-ammok isuna. Napanak iti banko ket inleppasko dagiti kasapulan nga eksamen. Nakaruarak iti eksamen ket nangrugiak a nagtrabaho iti innem nga oras iti maysa nga aldaw manipud Lunes agingga iti Biernes, a mamitlo ti kadakkel ti sueldok iti sigud a trabahok.
Ammok a tartarabayennatayo ti Apo no tarigagayantayo nga Isu ti umuna nga ipangpangrunatayo. Tartarabayennak pay laeng ita nga agdama. Ammok a pudno ti pagbatayan ti kararag.