Mensahe iti Visiting Teaching, Pebrero 2012

Dagiti Agbambantay ti Pagtaengan

Adalenyo daytoy a material, ken no maitutop, paglilinnawaganyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag.

Pammati, Pamilia, Tulong

“Dakayo dagiti agbambantay ti pangtaengan,” kinuna ni Presidente Gordon B. Hinckley (1910–2008) bayat ti panangyam-ammona iti “Ti Kaamaan: Maysa a Waragawag iti Lubong” iti sapasap a miting ti Relief Society idi 1995. “Dakayo dagiti agpasngay kadagiti ubbing. Dakayo dagiti mangpatanor kadakuada ken mangipasdek iti kaungganda kadagiti galad iti panagbiagda. Awanen ti sabali pay nga aramid a kinadiosan a kas iti panangpatanor kadagiti annak a lallaki ken babbai ti Dios.”¹

Iti dumani 17 a tawen itan a maipatpatungpal daytoy a waragawag a kaaduan kadagiti kangrunaan a pagrebbengantayo ket maisentro iti panangpapigsa kadagiti kaamaan wenno pagtaengan—ania man dagiti agdama a kasasaadtayo. Ni Barbara Thompson, a maikadua a mammagbaga itan iti sapasap a panguluen ti Relief Society, ket adda iti Salt Lake Tabernacle idi umuna nga imbasa ni Presidente Hinckley ti waragawag. “Naindaklan dayta nga okasion,” malagipna. “Nariknak ti kinapateg ti mensahe. Napampanunotko pay, ‘Nasayaat a pangiwanwan daytoy para kadagiti nagannak. Dakkel pay a pagrebbengan daytoy para kadagiti nagannak.‘Napanunotko iti apagkanito a saan a maipanggep unay kaniak gapu ta awan pay asawak ken awan pay annakko idi. Ngem alisto a napanunotko, ‘Ngem maipanggep kaniak daytoy. Miembroak ti maysa a pamilia. Maysaak nga anak a babai, kabsat a babai, ikit, kaanakan, wenno apoko a babai. Addaanak kadagiti pagrebbengan—ken bendision—gapu ta miembroak ti maysa a pamilia. Uray no sisiak laeng ti sibibiag a miembro ti pamiliak, maysaak latta a miembro ti kaamaan ti Dios, ket addaanak iti pagrebbengan a tumulong a mangpapigsa kadagiti dadduma a pamilia.’”

Pagsayaatanna, saantayo nga agmaymaysa kadagiti panagkagumaantayo. “Ti kadakkelan a tulong,” kuna ni Sister Thompson, “nga addanto kadatayo iti panangpapigsa kadagiti kaamaan ket ti panangammo ken panangsurot kadagiti doktrina ni Cristo ken panagpannuray Kenkuana a mangtulong kadatayo.”²

Manipud kadagiti Nasantuan a Kasuratan

Proverbio 22:6; 1 Nephi 1:1; 2 Nephi 25:26; Alma 56:46–48; Doktrina ken Katulagan 93:40

Manipud iti Pakasaritaantayo

“Idi nagserbi ni Sister Bathsheba W. Smith kas maikapat a sapasap a presidente ti Relief Society [manipud iti 1901 agingga iti 1910], nakitana ti panagkasapulan a panangpapigsa kadagiti kaamaan, ket isu a nangipasdek isuna kadagiti adalen iti edukasion iti ina para kadagiti kabsat a babbai iti Relief Society. Dagiti adalen ket mairaman ti balakad maipapan iti panagkallaysa, panangtaripato kadagiti masikog a babbai, ken panangpadakkel iti ubing. Dagitoy nga adalen ti nangsuporta kadagiti pannursuro ni Presidente Joseph F. Smith maipapan iti Relief Society a mangtultulong kadagiti babai kadagiti akemda iti pagtaengan:

“‘Iti kanito a saan nga ammo wenno kurang ti pannakaawat mapanggep iti pamilia wenno kaamaan, pagrebbengan ken obligasion ti kaamaan a nasken nga adda ken nainkalintegan nga adda kadagiti agassawa ken kadagiti nagannak ken annak, adda iti daytoy nga organisasion wenno iti asideg, ken babaen kadagiti gagangay a talugading ken pammaregta nga ik-ikutan ti organisasion nakasaganadan a mangted iti panangiturong no maipanggep kadagita a napapateg a pagrebbengan.’”³

© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti Visiting Teaching Message, February 2012. Ilokano. 10362 864

Ania ti Maaramidko?

Kasano a matulongak dagiti kabsat a babbai nga ay-aywanak a mangpapigsa kadagiti pamiliada?
Kasano a makapagbalinak a nalinteg nga impluensia iti pamiliak?