Mensahe ti Umuna a Panguluen, Pebrero 2012
Igunamgunam Ida nga Agkararag
Idi ubingak a bassit, sinursuruandak nga agkararag dagiti nagannak kaniak babaen ti pagwadanda. Rinugiak babaen iti panangiladawan iti panunotko iti Nailangitan nga Ama nga adda iti adayo. Bayat ti panagdakkelko a natataengan, nagbalbaliw ti padasko iti kararag. Ti ladawan iti panunotko ket nagbalinen a maysa a Nailangitan nga Ama nga adda iti asideg, a nabalkot iti naraniag a silaw, ken am-ammonak a nasayaat.
Immay dayta a panagbalbaliw idi nakagun-odak iti awan duadua a pammaneknek a pudno ti insalaysay ni Joseph Smith a padasna iti 1820 idiay Manchester, New York:
“Nakitak ti kasla adigi a lawag iti mismo a ngatuen ti ulok, a naranraniag pay ngem init, nga in-inut a nagpababa a nagdisso kaniak.
“Nasarakak ti bagik iti saan a nabayag a naisalakan manipud iti kabusor a nanglapped kaniak. Nakitak ti dua a Kinatao idi agdisso ti lawag kaniak, nga artapan ti lawag ken tan-okda ti amin a panangiladawan, a nagtakder iti angin iti ngatuek. Maysa kadakuada ti nagsao kaniak, nga inawagannak iti naganko, ket kinunana, intudona ti kaduana—Daytoy ti Ay-ayatek nga Anakko. Dumngegka Kenkuana!” ( Joseph Smith—Pakasaritaan 1:16–17).
Adda ti Nailangitan nga Ama iti kakaywan iti dayta nangayed nga aldaw ti panagsusulbod. Inawaganna ni Joseph iti naganna. Ken inyam-ammona ti nangungar a Mangisalakan ti lubong kas “Ay-ayaten nga Anakna.” Iti kanito nga agkararagkayo ken sadino man ti pagkararaganyo, ti pammaneknekyo maipapan iti kinapudno dayta a nagloriaan a padas ket mabalin a mangbendision kadakayo.
Ti Ama a pagkararagantayo ket nagloriaan a Dios a nangparsua kadagiti lubong babaen ti Ay-ayatenna nga Anak. Dengdenggenna dagiti kararagtayo kas iti panangdengngegna iti kararag ni Joseph—kas kalawag ti pannakairuknoyda iti imatangna. Ay-ayatennatayo unay gapu ta intedna ti Anakna kas Mangisalakantayo. Babaen iti dayta a sagut inaramidna a posible para kadatayo a magun-odtayo ti saan nga ipapatay ken agnanayon a biag. Ken idiaydiayana kadatayo, babaen iti panagkararag iti nagan ti Anakna, ti gundaway a makisarita Kenkuana iti daytoy a biag no pilientayo.
Dagiti addaan iti priesthood iti Ti Simbaan ni Jesucristo dagiti Santo iti Ud-udina nga Aldaw ket addaan iti sagrado a panagtalek a “mangsarungkar iti balay ti tunggal kameng, ket igunamgunamna kadakuada nga agkararag a sibabatad ken iti nalimed” (DkK 20:47; nainayon ti panangyunay-unay).
Adu a wagas a pangigunamgunam iti maysa a tao nga agkararag. Kas pagarigan, maipaneknektayo a binilinnatayo ti Dios nga agkararag a kanayon, wenno mabalintayo nga iladawan dagiti pagarigan manipud iti nasantuan a kasuratan wenno manipud iti bukodtayo a padas maipapan kadagiti bendision a sumangbay manipud kadagiti kararag ti panagyaman, panagdawat, ken panagdamag. Kas pagarigan, maipaneknekko nga ammok a sungsungbatan ti Nailangitan nga Ama dagiti kararag. Immawatak iti pangiturong ken liwliwa manipud kadagiti balikas nga immay iti panunotko, ken ammok babaen iti Espiritu a naggapu iti Dios dagiti balikas.
Naaddaan ni Propeta Joseph Smith kadagiti kasta a padas, ket kasta met a maaddaankayo. Naawatna daytoy a sungbat iti naimpusuan a kararag:
“Anakko, pagtalnaem ti kararuam; saan nga agbayag ti rigatmo ken dagiti sagabaem;
“Ket kalpasanna, no agituredka, itan-oknakanto ti Dios iti ngato” (DkK 121:7–8).
Paltiing dayta a naggapu iti maysa a managayat nga Ama iti maysa a napudno nga anak a lalaki a nakaro ti sagabaenna. Mabalin ti tunggal anak ti Dios ti makisarita Kenkuana iti kararag. Ti rikna ti ayat ken lawag nga immay kaniak kas sungbat dagiti napakumbaba a kararagko ket dakdakkel ti samayna kaniak ngem iti ania man a pangallukoy nga agkararag.
Magun-odtayo ti pammaneknek maipapan iti ania man a bilin ti Dios babaen ti panagtungpal iti dayta a bilin (kitaen iti Juan 7:17). Pumudno daytoy iti bilin nga agkararagtayo a sibabatad ken iti nalimed. Kas mannursuro ken gayyemyo, ikarik a sungbatan ti Dios dagiti kararagyo ken babaen ti pannakabalin ti Espiritu Santo, maammuanyo mismo a naggapu Kenkuana dagiti sungbat.
© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti First Presidency Message, February 2012. Ilokano. 10362 864
Panangisuro manipud iti Daytoy a Mensahe
-
“Dagiti ladawan ket napateg a ramit para iti panangpapigsa iti kangrunaan a kapanunotan ti maysa nga adalen” (Teaching, No Greater Call [1999], 176). Mangipakita iti maysa a naipinta a ladawan ni Joseph Smith wenno ti Umuna a Parmata. Ilawlawag ti padas ni Joseph Smith iti kararag. Kasano nga agbalin a napatpateg dagiti kararagmo no inladawam iti panunotmo ti “Nailangitan nga Ama … nga adda iti asideg,” kas iti panangiladawan ni Presidente Eyring?
-
Kas iti isingsingasing ni Presidente Eyring, ibilangyo ti panangiburay iti pammaneknekyo maipapan iti kararag, nga iladawanyo dagiti bendision a naawatyon gapu iti kararag, wenno panangibinglay kadagiti nasantuan a kasuratan maipapan iti kararag.