Poraus seni ewe Aewin Presetensi, February 2012
Peseir ne Iotek
Nupwen ngang emon semerit, semei me inei ra aitiei ne iotek ren ar kewe föfför. Ua poputa ren eu sasingin Semach won Nang non tupwei i mi nom touau. Ren ai watteta, ai ekiek usun iotek mi siwin. Ewe sasing non tupwei mi winiti usun Semach won Nang mi kan ngeniei, i mi nom non eu saram mi tin, i mi wesewesen sineiei.
Ena sokkun siwin mi feito nupwen ua angei ai pwarata pwe met a fis ngeni Joseph Smith non 1820 non Manchester, New York, mi ennet:
“Ua kuna eu saram, a fakkun saramaram nap seni ewe tinin akkar, a nom wenewenen mokurei. Ewe saram a chok saramatiw ekkis me ekkis tori a nom woi.
“Non na fansoun ua kuna pwe ua ngaseno seni ewe chon oput ngang pun a usun a omochuei me fotiei. Nupwen ewe saram a toriei ua kuna ruemon aramas, ukukun ninger use tongeni awewe, nge ra chok ukuta non asepwan. Emon me neir a fos ngeniei, a kokkoriei ren itei, a itini ngeni ewe emon me a apasa—Iei nei we At mi Achengicheng. Ausening ngeni I!” (Joseph Smith—History 1:16–17).
Semach won Nang mi nom nein ewe petewan won na ran mi ningoch. A kori Joseph ren itan. Me A pwan esinesin pwe ewe Chon Amanauen ewe fonufan mi manausefan me a era pwe I Noun we “At mi Achengicheng.” Ese nifinifin inet ika ia ka nom ia nupwen ka iotek, om kapasen pwarata usun ekkei mettoch mi amwarar epwe tongeni efeiochuk.
Ewe Sam kich mi iotek ngeni mi ewe Kot mi nap mi forata ekkewe fonufan me ren Noun we mi Achengicheng. I mi ausening ngeni ach kewe iotek usun kich mi kapas fan mesan usun chok A rong an Joseph we iotek. A fangeno Noun we pwe epwe wor ach Chon Amanau pun I a tongeikich. Ren ena niffang ngenikich I a awora ewe tufich pwe sipwe tongeni angei manau fochofoch me manau ese much. Me a pwan awora ngeni kich, ren iotek non iten Noun we, ewe tufich ne fos ngeni I non manauach fan chommong ika sia finata.
Chon ewe pristut non Ewe Mwichefenin Jises Kraist ren Aramas mi Pin non Fansoun Soponon mi wor wiser mi pin ne “churi ekkewe chon mwichefen meinisin, mepeseir ne iotek neuomong me non monomon” (D&C 20:47; aucheuan mi kapach).
Mi wor chommong napanap ne pesei emon ne iotek. Ren awewe, sia tongeni pwarata pwe Kot mi annuku ngenikich ne iotek fansoun meinisin, are sia tongeni awewe poraus seni ekkewe pukfel me pwan seni pwisin manauach me ekkewe feioch sia angei nupwen sia iotekin kinisou, tingor, me kapas eis. Ren awewe, ua tongeni pwarata pwe ua sinei pwe Semach won Nang a ponueni ai kewe iotek. Ua angei emwen me kinamwe seni ekkewe kapas mi tori ai ekiek, me ua sinei ren ewe Ngun mi Fel pwe ekkewe kapas ra feito seni Kot.
Iei met a pwan fis ngeni ewe Soufos Joseph Smith, mi pwan tongeni fis ngonuk. I a angei pwonuen an ikkiotek:
Nei we at, kinamwe ngeni ngunum; om kewe osukosuk me riaffou repwe chok nom reom ekis fansoun;
Me mwirin, ika ka nikitu, Kot epwe ekiuketa (nengeni D&C 121:7–8).
Ina pwarata seni emon Sam mi uren tong ngeni noun we at mi nom non watte riaffou. Meinisin noun Kot kewe mi tongeni fos ngeni I non iotek. Ese pwan wor eu minen pesepes ngeni iotek mi annisiei nap seni ekkewe memefen tong me saram mi feito seni ponuen ai kewe iotek.
Sia angei eu kapasen pwarata usun an Kot kewe annuk nupwen sia apwonueta ekkana annuk (nengeni John 7:17). Ei mettoch mi ennet ren ewe annuk pwe sipwe iotek fansoun meinisin neuomong me non monomon. Pun ngang om sense me chienom we, ua pwon pwe Kot epwe ponueni om kewe iotek me ren pochokunen ewe Ngun mi Fel, ka tongeni pwisin sinei pwe ekkewe ponu mi feito seni I.
© 2012 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/11. Kapungunon chiakun: 6/11. Chiakun First Presidency Message, February 2012. Chuukese. 10362 901
Afanafan seni Ei Poraus
-
Sasing eu minen aninis ne apochokuna itenapen ewe nesen (Teaching, No Greater Call [1999], 176). Kopwe pwar echo sasingin Joseph Smith are ewe Aewin Nemasepwi. Kopwe kapas usun met a fis nupwen Joseph Smith a iotek. Ifa usun napanapen om iotek epwe siwin ika ka ekieki pwe “Semach won Nang…mi kan ngonuk,” usun chok met Preseten Eyring a fori?
-
Usun met Preseten Eyring a era, kopwe apasa om kapasen pwarata usun iotek, awewe ekkewe feioch ka fen angei pokiten om kewe iotek, ika kopwe aneani eu wokisin seni ekkewe pukfel usun iotek.