An Fefin Chon Amwa Poraus, February 2012

Chon Tumunu ewe Imw

Kopwe aneani ekkei mettoch, me nupwen mi och, kopwe aporausa ren ekkewe fefin ka churi. Kopwe aea ekkewe kapas eis epwe anisuk ne apochokuna ekkewe fefin ka churi me pwan aochu manauom ren aean Fin Anisi.

Nuku, Famini, Aninis

“Ami chon tumunu ewe imw,” Preseten Gordon B. Hinckley (1910–2008) a apasa nupwen a afanafan won “An ewe Famini: Esinesin ngeni Ei Fonufan” ngeni ewe Mwichenapen Fin Anisi non 1995. “Ami chon nounou semerit. Ami ekkewe mi tumunu ir me aitir usun napanapen manauer. Ese pwan wor eu angang mi arap ngeni ewe angangen Kot usun ewe angangen tumunu noun Kot kewe at me nengin.”¹

Chippu epwe ukkukun 17 ier ei afanafan mi aitikich pwe wisach mi fokkun nap mi nom ren ach apochokunata ach kewe famini me imwach kewe—ese nifinifin nonnomun manuauch. Barbara Thompson, ewe aruomonun chon aninis non presetensin ewe mwichen Fin Anisi unusen, mi nom non ewe Salt Lake Tabernacle nupwen Preseten Hinckley a akkaewin anneani ena afanafan. “Ena fansoun mi amwarar,” i a chechemeni. “Ua mefi auchean ewe poraus. Ua pwan ekieki, ‘Ei eu minen emwen mi och fan itan ekkewe sam me in. A pwan eu watte wis ren ekkewe sam me in.’ Ua pwan ekieki pwe ei ese namwot ngeniei pokitan use pupunu me ese wor nei kewe. Iwe ua pwan ekieki, ‘Nge mi namwot ngeniei. Ngang emon chon eu famini Ngang emon fopun, emon pwi, emon pwi ngeni emon in, emon pwipwi, emon tetenin noun. Mi wor wisei kewe—me feioch—pokitan ngang emon chon famini. Ika ngang anaemon chok non ai we famini, ua chuen choni an Kot we famini, iwe mi wor wisei ne apochokunata pwan ekkoch famini.’”

Kinisou, pun esap chok pwisin kich non ach angang. “Ewe aninis mi napanap,” Sister Thompson a apasa, “sipwe sinei me tapweno mwirin ekkewe nongonongen Kraist me anonga won I ne anisikich nupwen sia apochokuna ekkewe famini.”²

Seni ekkewe Pukfel

Proverbs 22:6; 1 Nifai 1:1; 2 Nifai 25:26; Alma 56:46–48; Doctrine and Covenants 93:40

Seni Ach Uruo

“Nupwen Sister Bathsheba W. Smith ewe fomonun presetenin ewe mwichen Fin Anisi unusen [seni 1901 ngeni 1910], a kuna pwe mi namwot ne apochokuna famini, iwe i a fori ekkoch nesenin etipachema in fan itan ekkewe fefin non Fin Anisi. Ekkewe nesen mi kapas won pupunu, tumunun me mwen pwopwo, me amaritan semerit. Ekkei nesen mi tapwei mwirin an Preseten Joseph F. Smith we afanafan pwe ewe mwichen Fin Anisi epwe anisi fefin ren ar angang non ewe imw:

“‘Ikkewe ia mi wor tiparoch ika wewengau usun ewe famini, wisen ewe famini, usun wisen ekkewe sam me ekkewe in me pwan nefinen ekkewe sam me in me ekkewe semerit, ei mwich mi nom, me ren ewe pochokun me pwarata mi nom non ei mwich ir ra monata pwe repwe tongeni aiti usun ekkana wis mi auchea.’”³

© 2012 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/11. Kapungunon chiakun: 6/11. Chiakun Visiting Teaching Message, February 2012. Chuukese. 10362 901

Met Ua Tongeni Föri?

Ifa usun ua tongeni anisi ekkewe fefin ua churi ne apochokunata ar kewe famini?
Ifa usun ua tongeni eu nenien appiru ngeni ai we famini?