Pweng sin Prestuhnsi Se Met, Fepweri 2012

Kwacfe Elos in Pruhe

Sel Prestuhn Henry B. Eyring

Mwet in Kahsruh Se Met ke Prestuhnsi Se Met

Ke nga tuhlihk ah, pahpah ac ninac kiyuck ah lutiyuc ke mwe srihkasrak ke pruhe. Nga muhtwacwacack ke petsac se in mwe nuhnak luhk uh ke Pahpah Lucng el loessuhlah uh. Ke nga mahtuhlah, puhlakihn luhk ke pruhe uh eklac. Petsac se in mwe nuhnak luhk uh eklac nuh ke Pahpah Lucng El fototo nuh sesr, suc oasr ke kahlwem yohk, ac suc etweyuc wo.

Eklac sac tuhkuh ke nga eis luhlahlfongi kuh lah ma sruhmuhnyuck ke puhlakihn lal Joseph Smith ke yac 1820 fin acn Manchester, New York ah, pwacye:

“Nga liacack sru in kahlwem se fin sifuck, kahlwem liki kahlwem luhn faht uh, suc kais kuhtuh puhtati nwe ke apihnyucwi.

“In pacl se ma ma inge sikyak ah, Nga puhla lah Nga fihlfihllac liki mwet lokoalok luhk suc kapriucwi. Ke kahlwem sac srweyucwi ac nga liye Mwet luo, suc kahlwemiac ac wolacnaiac ahluhkwelah ma kuh in fwack kac, suc ma tulac lucng likiyuc ke yen engyeng uh. Sie selos sramsram nuh sihk, pahngon inek ac fahk, srihsrngiyac mwet se sahyac ah—Pa inge Wen Kuloh Nuhtihk uh. Porongwacl!” (Joseph Smith—History 1:16–17).

Pahpah Lucng el tuh oasr ke insack ah ke lwen na kahto sac ke spring. El pahnglol Joseph ke inel. Ac El ahkkahlwemye Mwet Lahngo luhn facluh suc moulyak tari suc “Wen Kuloh” Nahtuhl. Ke kuhtwena pacl ac acn kom pruhe, fahkwack luhlahlfongi lom ke ma pwacye ke puhlakihn wolacna sac kuh in ahkinsewowoye kom.

Pahpah se suc kuht pruhe nuh se uh pa God wolacna suc orwaclah facluh sin Wen Kuloh Nahtuhl. El lohng pruhe lasr oacna ke El lohng pruhe lal Joseph—kahlwem oacna in orekna ye muhtahl. El luhngse kuht fal oruh El acse Wen Nahtuhl oacna Mwet Lahngo lasr. Ke mwe sang sac El ahkfihsracsryelah nuh sesr in eis moul kawihl ac moul ma pahtpaht. Ac El use nuh sesr, ke pruhe ke inen Wen Nahtuhl, pacl wowo se in sramsram nuh Sel ke moul se inge ke inkaiyacn pacl kuht luhngse uh.

Mwet sruok Pristut ke Alu luhn Jisus Kraist luhn Mwet Luhlahlfongi ke Lwen-sahflah oasr luhlahlfongi muhtahl in som muhtwacta yurin lohm sin kais sie mempucr ac kahsrwelos in pruhe ke puhsra luhlahp ac ke lukmac (liye D&C 20:47).

Oasr ohiyac puhkantwen in kwacfe sie mwet in pruhe. Nuh ke mwe srihkasrak, kuht kuh in fahkwack lah God El sapkihn kuht in pruhe pacl nuh kwewa, kuh kuht kuh in ahkuhtweyac mwe srihkasrak ke ma suhmuhslah ac ke puhlakihn lasr sifacna ke mwe insewowo ma tuhkuh ke pruhe luhn kuloh, mwe srui, ac kihsen siyuck. Srihkasrak se, nga kuh in fahkwack luhlahlfongi lah nga etuh lah Pahpah Lucng el topuk pruhe an. Nga eis kolyuck ac ahkkweyeyuck ke pacl kahs ma tuhkuh nuh ke nuhnak luhk, ac nga etuh ke Nguhn lah kahs uh tuhkuh sin God.

Oasr kain puhlakihn inge lal Mwet Pahluh Joseph Smith, ac kuh pac in oasr lom. El eis top se inge ke pruhe luhn inse pwacye:

Wen nuhtihk, mihslac in oan in nguhnum; fah oasr ma upac ac ma kweok lom tuhsruhk ke kihtin pacl na.

Na kom fin muhtweng wo, God El ac fah ahkenganyekomyak (liye D&C 121:7–8).

Pa fwackyuck se sin Pahpah pahkotwen se nuh sin wen luhlahlfongi kuh se ke pacl kweok yohk la. Tuhlihk nuh kwewa nuhtin God kuh in sramsram ke pruhe nuh Sel. Wacngihn siyuckyuck in pruhe oruh nga in puhla oacna ke pacl puhla luhn luhngse ac kahlwem ma wi tuhkuh nuh ke top luhn pruhe puhsisacl.

Kuht eis fahkwack luhlahlfongi ke kuhtwena masap luhn God ke karihngihnyacn masap sacn (liye John 7:17). Pwacye sap soko inge lah kuht pruhe ke puhsra luhlahp ac ke lukmac. In oacna mwet luti ac kawuck se lom, Nga olwelah lah God El ac fah topuk pruhe lom ac ke kuh luhn Nguhn Muhtahl, kom kuh in etuh sum sifacna lah top an tuhkuh Sel.

© 2012 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/11. Ahkkweyeyucklac ke lweng: 6/11. Lwenglah luhn First Presidency Message, February 2012. Kosraean. 10362 868

Luti ke Pweng Se Inge

“Petsac an pa mwe kahsruh yohk srihpac in ahkkweye ip yohk ke lesin an” (Teaching, No Greater Call [1999], 176). Ahkkahlwemye sroal se kacl Joseph Smith kuh Aruhrruhma Se Met. Sramsramkihn puhlakihn lal Joseph Smith ke pruhe. Pruhe lom an ac oasr kuhtuh kalmeyac fuhkah kom fin petsacelah “Pahpah Lucng … fototome,” oacna Prestuhn Eyring uh?
Oacna ke Prestuhn Eyring el fahk, motko in akacsruhi ke fahkwack luhlahlfongi lom ke pruhe, ahkuhtweyac mwe insewowo kom eis ke srihpen pruhe, kuh akacsruhi ke ma suhmuhslah ke pruhe.