Ennaan eo an Būreejtōnji eo Kein Kajuon, Pāpode 2012
Kōketak Er n̄an Jar
Ke Iaar juon ajri edik, jema im jinō raar katakin eō kōn waanjon̄ak n̄an jar. Iaar jino kōn juon pija ilo ļōmņak e aō kōn Jemedwōj Ilan̄ kōn an ettoļo̧k. Ke Iaar ekōkke ļo̧k, jeļā eo aō kōn jar eaar oktak. Pija eo ilo ļōmņak eo aō eaar erom juon iaan ro an Jemedwōj Ilan̄ eaar epaake lok, eo ej waļo̧k ilo juon meram emeram, im eo eweppān an jeļā kōn n̄a.
Oktak jab in eaar itok ke Iaar bōk juon naan in kam̧ool em̧ool bwe riboot eo an Joseph Smith kōn en̄jake eo an ilo 1820 ilo Manchester, New York, ej m̧ool:
“Iaar lo juon joor in meram ilōn̄ in wōt bōra, eo meram eo an emeram ļo̧k jān al ilo raelep, eo eaar jidik wōt an wanlaļtak m̧ae iien eo ej pād ejjak eō.
“Ilo iien eo wōt ke ej waļo̧k Iaar lo bwe iaar joor jān kajoor eo enana eaar lukōj eō. Ke meram eo ej pād ejjake eō Iaar lo ruo armej ro, eo meram eo aer im aiboojoj eo aer eaar pen kōmeļeļeik, jutak ilōn̄ in bōra ilo mejatoto. Juōn iaer eaar kōnono n̄an eō, kūr eō kōn eta im kar ba, jitōn̄ļo̧k eo bar juōn— En̄in ej Nejū Jitōnbōro.Ron̄jake E!” (lale Naan In Kam̧ool Eo An Rikanaan Joseph Smith—pārokūrāāp 11–12).
Jemedwōj Ilan̄ eaar pād ilo bukin wōjke eo ilo jibbon̄ in iien meņeņ eo eaiboojoj. E eaar kūr Joseph kōn etan. Im E eaar kwaļo̧k kadkad in Rilo̧mo̧o̧r jerkakpeje eo an laļ in āinwōt Eo “Nejin Jitōnbōro.” Jekdo̧o̧n n̄aat im jekdo̧o̧n ia kwoj jar, naan in kam̧ool eo am̧ kōn m̧ool eo an en̄jake aiboojoj jab in emaron̄ kōjeram̧m̧an eok.
Jemed eo me jej jar n̄an e ej Anij eo aiboojoj me ear kōm̧anm̧an laļ ko kōn Nejin Jitōnbōro. E ej ron̄jake jar ko ad āinwōt An kar ron̄jake jar eo an Joseph—āinwōt an alikkar wōt eļan̄n̄e raar kōm̧m̧ani ilo im̧aan Mejān. E ej iakwe kōn jon̄an E eaar letok Nejin āinwōt ad Rilo̧mo̧o̧r. Kōn menin letok jab in E eaar kōm̧m̧an bwe en pidodo n̄an kōj n̄an bōk mour jab wabanban im mour indeeo. Im E ej letok, kōn jar ilo etan Nejin, iien eo em̧m̧an n̄an kōnono Ippān ilo mour in ikutkut in wōt ad kālōt.
Rikabwijer priesthood ro ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata ewōr ippāer lōke eo ekwojarjar n̄an loļo̧k m̧ōko im̧ōn kajjojo memebōr im kōketak er n̄an kwaļo̧k ainikien aer jar im ilo ittiņo im kōm̧m̧ani aolep jerbal ko an baam̧le (lale D&C 20:47; kar kobaik tok aorōk ko).
Ekanooj lōn̄ wāween ko n̄an kōketak jabdewōt n̄an jar. N̄an waanjon̄ak, jemaron̄ kwaļo̧k kam̧ool bwe Anij eaar kakien kōj n̄an jar iien otemjej, ak jemaron̄ kōmeļeļeik waanjon̄ak ko jān jeje ko rekwojarjar im jān jeļā ko ad make kōn kōjeram̧m̧an ko me rej itok jān jar in kam̧oolol ko, eowar, im kajjitōk. N̄an waanjon̄ak, Imaron̄ kam̧ool bwe Ijeļā bwe Jemedwōj Ilan̄ ej uwaaki jar ko. Em̧ōj Aō bōk tōl im kaenōm̧m̧an jān naan ko me kar itok n̄an ļōmņak e aō, im Ijeļā kōn Jetōb bwe naan ko raar jān Anij.
Rikanaan Joseph Smith eaar wōr an en̄jake ko kōn kain in, im kōn menin komaron̄. Eaar bōk uwaak in n̄an jar eo em̧ool an būruwōn:
Anij eaar kalim̧m̧uri kōn aenōm̧m̧an ilo jetōb eo an im kar jiron̄ e bwe apan̄ im kaen̄taanan ko an renaaj an jidik wōt iien.
E eaar ba bwe eļan̄n̄e em̧m̧an an niknik, Anij enaaj lōn̄aj e ilōn̄ (lale D&C 121:7–8).
Ekar m̧adenļo̧k eo jān Jemed eo em̧m̧an n̄an juon nejin ļaddik etiljek ilo en̄taan eo eļap. Aolep ajri ro nejin Anij maron̄ kōnono Ippān ilo jar. En̄jake ko an iakwe im meram eo me eaar itok n̄an eō āinwōt uwaak n̄an jar ettā ko aō eaar ļapļo̧k an jelōt eō jān jabdewōt naan in kōketak n̄an jar.
Jej bōk juon naan in kam̧ool kōn jabdewōt kien an Anij jān kejparok kien jab eo (lale Jon 7:17). Em̧ool menin kōn kean̄ eo bwe jān jar ilo an lōn̄ ainikien im ilo ittiņo. Āinwōt am̧ rūkaki im m̧ōttam̧, Ij kalim̧m̧ur bwe Anij enaaj uwaake jar ko am̧ im bwe kōn kajoor eo an Jetōb Kwojarjar, komaron̄ jeļā kōn kwe make bwe uwaak ko rej jān E.
© 2012 jen Intellectual Reserve, Inc. Aolep jim̧we rej pād ippān. Kar jeje ilo Amedka. Kōmālim kajin Pālle eo: 6/11. Kōmālim Ukook eo: 6/11. Ukook eo an First Presidency Message, February 2012. Marshallese. 10362 874
Katakin jān Ennaan In
-
“Pija ko rej tuuļ ko raorōk n̄an kōkajoorļo̧k ļōmņak eo eļap an juon katak” (Teaching, No Greater Call [1999], 176). Kwaļo̧k juon pija in Joseph Smith ak Loļo̧k eo Kein Kajuon. Ekōnono kōn en̄jake eo an Joseph Smith kōn jar. Ekōjkan an jar ko am̧ naaj ļapļo̧k meļeļeier eļan̄n̄e kwoj ļōmņake “Jemedwōj Ilan̄ … epaak tok,” āinwōt Būreejtōn Eyring?
-
Āinwōt an Būreejtōn Eyring kwaļo̧k, ļōmņak in kwaļo̧k naan in kam̧ool eo am̧ kōn jar, kōmeļeļeik kōjeram̧m̧an ko kwar būki kōn jar, ak kwaļo̧k eoon ko kōn jar.