Mensahe sang Unang Panguluhan, Marso 2012
Ngaa Kinahanglan Naton sang mga Propeta?
Tungod palangga sang Langitnon nga Amay ang Iya mga kabataan, wala Niya sila ginpabayaan nga magpangabuhi sa sining mortal nga kinabuhi nga wala sing direksyon kag paggiya. Ang mga pinanudlo sang Langitnon nga Amay indi mga ordinaryo, mapakot-pakot, makit-an sa bisan diin lang nga libro nga sarang mabakal sa isa ka lokal nga balaligyaan sang mga libro. Ang mga ini kaalam sang makagagahum sa tanan, nakahibalo sang tanan nga selestiyal nga Tinuga nga nagapalangga sang Iya kabataan. Nalakip sa Iya mga pulong amo ang sekreto sang tanan nga dinag-on—ang yabi sang kalipay sa sini nga kalibutan kag sa kalibutan nga magaabot.
Ang Langitnon nga Amay nagapahayag sining kaalam sa Iya mga kabataan sa duta paagi sa Iya mga alagad nga mga propeta (tan-awa sa Amos 3:7). Gikan sa kapanahonan ni Adan, ang Dios nagpakighambal sa Iya mga kabataan paagi sa pinili nga mga manughambal nga ginsugo sa pagpahayag sang Iya pagbuot kag sa paglaygay sa iban. Ang mga propeta mga inspirado nga mga manunudlo kag sa masami mga hamili nga mga saksi ni Jesucristo (tan-awa sa D&C 107:23). Ang mga propeta nagapakighambal indi lamang sa katawhan sa ila panahon, kundi subong man sila nagapakighambal sa katawhan sa tanan nga panahon. Ang ila mga pulong nagalanog sa tanan nga dinag-on bilang isa ka katipan sang pagbuot sang Dios sa Iya mga kabataan.
Ang karon nga panahon wala sang kinalain sa ano man nga mga panahon sa nagliligad. Ang Ginuo wala nagapalangga sa mga katawhan sa aton panahon sing mas kubos sangsa mga katawhan sang mga nagliligad nga mga panahon. Ang isa sang mga mahimayaon nga mensahe sang Pagpanumbalik sang Simbahan ni Jesucristo amo nga ang Dios padayon nga nagapakighambal sa Iya mga kabataan! Wala Sia natago sa mga kalangitan kundi nagahambal sa karon [nga panahon] subong nga Sia [nagpakighambal] sa dumaan nga panahon.
Kadamoan sang mga ginapahayag sang Ginuo sa Iya mga propeta nagatuyo sa paglikaw sa aton sa kalisod bilang mga indibidwal kag bilang mga sosyedad. Kon ang Dios nagahambal, ginahimo Niya ini agud magtudlo, mag-inspirar, magpauswag, kag magpaandam sa Iya mga kabataan. Kon ginabalewala sang mga indibidwal kag mga sosyedad ang mga panulin sang ila Langitnon nga Amay, ginahimo nila ini sa risgo sang pagtilaw, pag-antus kag kabudlayan.
Ang Dios nagapalangga sa tanan Niya nga mga kabataan. Amo ina nga nagaalungay gid Sia sa aton paagi sa Iya mga propeta. Kasubong nga luyag naton ang kon ano ang pinakamaayo para aton mga pinalangga, ang Langitnon nga Amay luyag man sang kon ano ang pinakamaayo para sa aton. Amo ina nga ang Iya mga panulin tuman ka importante kag kon kaisa tuman ka ginadalian. Amo ina nga wala Niya kita ginpabayaan sa karon nga panahon kundi padayon nga nagapahayag sang Iya pagbuot sa aton paagi sa Iya mga propeta. Ang aton kadangatan kag ang kadangatan sang aton kalibutan nagadepende sa aton nga pagpamati kag pagtuman sa ginpahayag nga pulong sang Dios sa Iya mga kabataan.
Ang malahalon nga mga panulin sang Dios sa katawhan makita sa Biblia, sa Libro ni Mormon, sa Doctrine and Covenants, kag sa Pearl of Great Price. Dugang pa, ang Ginuo nagapakighambal sa aton paagi sa Iya mga alagad, subong nga himuon Niya sa liwat sa palaabuton nga pang-kabilugan nga komperensya.
Sa tanan nga ginaligban kon bala ina nga butang sarang matabo—ayhan mamangkot, “Posible bala nga ang Dios nagapakighambal sa aton sa karon nga panahon?”—sa bugos ko nga tagipusuon ginaagda ko kamo sa “pagkari kag pagtan-aw” (Juan 1:46). Basaha ang pulong sang Dios suno sa makita sa balaan nga mga kasulatan. Magpamati sa pang-kabilugan nga komperensya nga may dulunggan nga handa sa pagpamati sa pulong sang Dios nga ginhatag paagi sa Iya mga propeta sa ulihing-mga-adlaw. Magkari, magpamati, kag magtan-aw nga ginagamit ang inyo tagipusuon! Kay kon kamo magpamangkot “nga may bunayag nga tagipusuon, sa matuod-tuod nga tinutuyo, nga may pagtuo kay Cristo, [ang Dios] ipakita Niya ang kamatuoran sini sa inyo, paagi sa gahum sang Balaan nga Espiritu” (Moroni 10:4). Paagi kag sa sining gahum, nakahibalo ako nga si Jesucristo buhi kag nagagiya sang Iya Simbahan paagi sa isa ka buhi nga propeta nga si Thomas S. Monson.
Mga kauturan, ang Dios nagapakighambal sa aton sa karon nga panahon. Kag luyag Niya nga ang tanan Niya nga mga kabataan mamati kag magtuman sang Iya pulong. Kon tumanon naton ini, ang Ginuo magapakamaayo kag magasakdag sa aton sing maayo, alangay sa subong nga kinabuhi tubtob sa mga kalibutan nga magaabot.
© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang First Presidency Message, March 2012. Hiligaynon. 10363 861