Mensahe sa Visiting Teaching, Marso 2012

Mga Anak nga Babayi sa Akon Ginharian

Tun-i ining materyal kag, sa nagakaigo, hambali ini upod sang mga sister nga inyo ginabisita. Gamita ang mga pamangkot agud buligan kamo sa pagpabakod sang inyo mga sister kag himuon ang Relief Society nga aktibo nga bahin sang inyo kaugalingon nga kabuhi.

Pagtuo, Pamilya, Bulig

Kita mga anak nga babayi sang aton Amay sa Langit. Sia nakakilala sa aton, nagapalangga sa aton, kag may plano para sa aton. Kabahin sinang plano nagalakip sang pagkari sa duta agud makatuon sa pagpili sang maayo batok sa malain. Kon pilion naton ang magtuman sang mga kasuguan sang Dios, ginatahod naton Sia kag ginakilala naton ang aton pagka-anak nga mga babayi sang Dios. Ang Relief Society nagabulig sa aton sa pagdumdom sining diosnon nga palanublion.

Ang Relief Society kag ang iya sini kasaysayan nagapabakod kag nagasakdag sa aton. Si Julie B. Beck, pangkabilugan nga pangulo sang Relief Society, nagsiling: “Bilang mga anak sang Dios, nagahanda kamo para sa wala’y katapusan nga mga katungdanan, kag ang tagsa sa inyo may yara sang babayin-on nga pagkatawo, kinaiya, kag responsibilidad. Ang kadalag-an sang mga pamilya, mga komunidad, sining Simbahan, kag ang importante nga plano sang kaluwasan nakadepende sa inyo katampad. … [Ang aton Amay nga Langitnon] nagtuyo sang Relief Society nga magbulig sa pagpasad sang Iya katawhan kag paghanda sa ila para sa mga bugay sang templo. Iya ginpahamtang ang [Relief Society] agud mag-ugyon ang Iya mga anak sa Iya buluhaton kag ilakip ang ila bulig sa pagpasad sang Iya ginharian kag pagpabakod sang mga puluy-an sang Sion.”¹

Ang aton Amay sa Langit naghatag sa aton sang pat-od nga buluhaton sa pagbulig pasad sang Iya Ginharian. Ginbugayan man Niya kita sang espirituhanon nga mga dulot nga kinahanglanon naton sa paghuman sining pat-od nga buluhaton. Paagi sa Relief Society, may mga oportunidad kita sa paggamit sang aton mga dulot sa pagpabakod sang mga panimalay, magbulig sa mga nagakinahanglan, kag magtuon kon paano magkabuhi bilang mga disipulo ni Jesucristo.

Si Pangulong Dieter F. Uchtdorf, Ika-duhang Manuglaygay sa Unang Panguluhan, naghambal parte sa pagkadisipulo: “Paagi sa mainantuson nga paglakat sa banas sang pagkadisipulo, ginapakita naton sa aton mga kaugalingon ang kadakuon sang aton pagtuo kag ang aton kahanda sa pagbaton sang pagbuot sang Dios sangsa aton.”²

Dumdumon naton nga mga anak kita nga babayi sang Dios kag tinguhaon nga magkabuhi bilang Iya mga disipulo. Kon himuon naton ini, makabulig kita pasad sang ginharian sang Dios diri sa duta kag mangin kaangay nga magbalik sa Iya presensya.

Gikan sa Balaan nga mga Kasulatan

Zacarias 2:10; Doctrine and Covenants 25:1, 10, 16; 138:38–39, 56; “Ang Panimalay: Isa ka Proklamasyon sa Kalibutan” (Liahona kag Ensign, Nob. 2010, 129)

Gikan sa Aton Kasaysayan

Sang Abril 28, 1842, ang Propetang si Joseph Smith nagsiling sa mga sisters sa Relief Society. “Kamo karon nabutang sa isa ka sitwasyon sa diin kamo sarang makabuhat suno sinang mga balatyagon nga gintanom sang Dios sa [inyo]. … Kon mangin takos kamo sa inyo mga prebilihiyo, ang mga anghel indi sarang mapunggan nga mangin inyo mga kaupod.”³

Nga ginakilala ang gahum sang Relief Society sa pag-alagad sa iban kag sa pagbulig sa mga indibidwal nga mag-uswag sa pagtuo, si Zina D. H. Young, ikatatlo nga pangkabilugan nga pangulo sang Relief Society, nagpromisa sa mga sisters sang 1893, “Kon magkutkot kamo sa kaidadalman sang inyo kaugalingon nga mga tagipusuon inyo masalapuan, upod sang bulig sang Espiritu sang Ginuo, ang perlas nga may dakong bili, ang panaksihon sining buluhaton.”⁴

© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang Visiting Teaching Message, March 2012. Hiligaynon. 10363 861

Ano ang Sarang Ko Mahimo?

Paano ako makabulig sa akon mga sisters nga malab-ot ang ila potensyal bilang mga anak nga babayi sang Dios?
Paano ko madapat sa akon kabuhi ang laygay kag mga paandam nga ginhatag sa kababayin-an sa Doctrine and Covenants 25?