Klumech er a First Presidency, Ongedei el buil 2012
Ngera Uchul Me Kede Ousbech er a Reprofet?
Leng beltkil a rengul a Chedam er a Babeluades el mo er a Rengelekel a uchul, e Ngii a diak el bechiteterir me le ngar tial beluulechad el diak omtebechel e omekrael er tir. A osischeklel a Demad er a Babeluades a diak el ko er a di beot, di dolibech, ko er a diak a ultutelel malechub el ko er a babier el sebechem el di mecherar er a stouang. Aikang a llomes er a olab a rokui el klisiich, medengei a rokui el Chad el betik a rengul er a Rengelekel. A uldimukl er a chelsel a tekingel a sel berrotel el dimla tekoi er a rechuodel—el ngii a rael el mo er a deoureng er tial klengar me a klengar el merael mei.
A Chedam er a Babeluades a ocholt a llemesel el mo er a Rengelekel el ngar er a beluulechad el okiu a Remesiungel el profet (mesa Amos 3:7). Me ngulemuchel er a taem er a Adam, ea Dios a mengedecheduch er a Rengelekel lokiu a re mla metutk el chad er a ulaoch el tir a ngerchelir el ocholt a Soal me a osischeklel el mo er a rebebil. A Reprofet a chedaol sensei e blechoel el tokubets el sioning er a Jesus Kristo (mesa D&C 107:23). A Reprofet a diak di longedecheduch er a rechad el kirel sel taem el lengarngii, te dirrek el mengedecheduch el mo er a rechad er a chelsel a rokui el taem. A ngerir a morenges er a chelsel a rokui el taem el olchotel aikel soal a Dios el meruul el mo er a Rengelekel.
Chelechal sils a diak el ngodech er a ngar er a mong. A Rubak a diak dil betik a rengul er a rechad er a chelechal sils ea ngar er a mong a diak. A tang er a klebokel el klemechel a mla Moluut el ebangkelio er a Jesus Kristo a kmo a Dios a melemolem el mengedecheduch er a Rengelekel! Ngii a diak el berrotel er a babeluades ng bai mengedecheduch er chelechal sils el diuaia Ngii er a ngar er a mong.
Oumesingd er a ikel Rubak ocholt el mo er a reprofet er Ngii a melutk el kirel a terebengel a klengit el reng el mo er a derstang el chad me a beluu. Me a ikel dung a Dios, e Ngii a uaia lolisechakl, omekellomes, melisiich, e omeklatk er a Rengelekel. A derstang el chad me a beluu sel bo lak lorrenges a tekingel a Demerir er a Babeluades, eng di tir el lochau ongarm, ringel, me a kerior.
A Dios a betik a rengul er a rokui el Ngelekel. Tiaikid a uchul e Ngii a kmal blak a rengul el olengit er kid lokiu a reprofet er Ngii. Meng di uaia kid el soad a klungiaol el mo er a rebetik er a rengud, me a Chedam er a Babeluades meng soal a klungiaol a lemei er kid. Seikid a uchul ea Tekingel a meklou a belkul ea lebebil er a taem e ngorechudel. Tiaikid a uchul e Ngii a dirkak el chitid er chelechal sils e bai melemolem el ocholt a Soal el mei er kid el okiu a reprofet er Ngii. A mo teletelel a klengar kid me a beluulechad a mesim el bedul oderngesed me a otirekled er a mla mocholt el tekingel a Dios el mo er a Rengelekel.
Aikel diak el mochar el tekingel a Dios el mo er a rechad a debetik er a chelsel a Biblia, Babier er a Mormon, Doctrine and Covenants, me a Pearl of Great Price. Osisiu, ea Rubak a mengedecheduch er kid lokiu a Remesiungel, er a chelsel tial merael mei el klou el ongdibel.
Me tirkel rokui el ko er a oumededenger el kirel tial tekoi—el locha mo oker el kmo, “Ng meral sebechel a Dios el mengedecheduch er kid er chelechal sils?”—ea kultuil er a renguk el rokir e siotai er kemiu el “mei e mesang” (Johanes 1:46). Monguiu a tekingel a Dios el debetik er a chelsel a chedaol llechukl. Morrenges a cheldecheduch er a chelsel a klou el ongdibel el meral soam el rongesii a ngerel a Dios lokiu a reprofet er Ngii er chelechal sils. Mei, morrenges, e momes el obang a rengum! Alsekum e kau a mo osiik, “lobang a blak el reng, el obang a klaumerang er a Kristo, ea Dios a mochotii a klemerang lekor kau, loeak a klisichel Chedaol Reng” (Moroni 10:4). Ngultuil e okiu tiaikid el klisiich, eak medengei el kmo a Jesus Kristo a ngar e orrurt er a Ikelesia er Ngii lokiu a ngar el profet, el President Thomas S. Monson.
Rodam me a rodos, a Dios a meral mengedecheduch er kid er chelechal sils. E Ngii a kmal soal a rokui el Ngelekel a lorrenges e loltirakl er a Ngerel. Sel bo de uaisei, ea Rubak a mo omekngeltengat e smisichid, er tial klengar me a klengar el merael mei.
© 2012 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/11. Kengei er a oidel: 6/11. Oidel a First Presidency Message, March 2012. Palauan. 10363 881