Mulwol ko Bin Somm’on e Presidency, March 2012
Mang Fan Nib T’uf e Profet Rodad?
Bachan Got Ni Chitamangdad nu Tharmiy ni ba’adag gubin e bitir Rok, Dani pagraed ni ngar ranoed ko biney e yafos nima mus dani powiy’raed. Fapi machib ku Chitamangdad nu Tharmiy e, dani ta’aborogon, fa babyor ni rayog ni ngam chuw’iy’ ko cantin ko babyor u lane binaw rom. Bo’olungi gonop ku en ni gubin e rayog nge lowaen’ rok, Bee’ u Tharmiy ni tha’abi llowaen’ nib tu’uf gubin pifaak Rok. E thin rok nima yoeg e bin thabi ga’fan e machib nib miith—arame e kanawo’ ko falfalaen’ ulane yafas ney nge fayleng ni bay yib.
Chitamangdad nu Tharmiy e ma dag e gonop rok ngak gubin e bitir Rok u Fayleng udakean fapi tapigpig rok nib profet (muguy ko Amos 3:7). Napan e pi rran ku Adam, ma Got e ma non ngak e bitir rok udakean e profet ni bay mat’won raed ningar daged laniyaen’ nge fanow Rok ngak boech e gidii’. Pi Profet be sensey nib athamgil laniyaen’raed ni ngar micheged Yesus Kristus (muguy ko D&C 107:23). Pi Profet e gathi kemus ni yaed ma non ngak e gidii’ napan e rran roraed, machane kiyad ma non ngak e gidii’ ko gubin e yangar ni bay i yib. Lamraed e ma ta’abrogon ko tin kakrom nib m’ag rok Got ngak Pifaak.
Daba’ e dani thil ko rran ni kafram. Gidii’ ko rran rodad e gathi ba achig rogon nib tu’uf rok Somoel ko tin kakrom e gidii’. Reb e mulwol ni tha’abi falel’ ko Fare Galasia rok Yesus Kristus nikan Fulweg e Got e kube non ngak pifaak! Dar miith u tharmiy machane be non e daba’ ni woed rogon nni I rin’ kakrom.
Oren e n’en nibe dag Somoel ngak e pi profet Rok e be matangiy dad ko kirebaen’ rodad i tabulung e gidii’. Nap’an ni ra non Got, ma Be rin’ ni nge fil ban’en, yoeg e n’en ni ngan rrin’, be’echnag dad, me tay chilyen pifaak ko magawon. Nap’an e cha’ nge tabulung e gidii’ niyad ra pii’ed keru’raed ngak e llowaen’ ku Chitamangdad nu Tharmiy, yaed ra yaen i taw ko fonow ko sikeng, mar kirebaen’raed, man gechig nagraed.
Got e ba tu’uf gubin i pifaak Rok. Aram fan nima wenig nib polo’ udakean fapi profet Rok. Boed rogon ni gadad ba adag e n’en ni th’aabi fel’ ko picha’an nib tu’uf rodad, ma Chitamangdad nu Tharmiy e ba adag e n’en tha’abi fel’ ni fan ngodad. Aram fan ni pin’en ni be yog ni ngan rrin e rib ga’fan ma boch ngiyal’ mab gurgur. Aram fan dani pi’ Keru’ ngodad e daba’ machane be ulul nibe dag Laniyaen’ ngodad udakaen e pi profet Rok. Tin nnra buch ngodad nge tin nra buch ko fayleng rodad e ra yib udakean e motoyil nge yul’yul’ ni ngad tayed ngak e thin ku Got ngak gubin e bitir rok.
Fapi fonow nib thabi ga’fan ku Got e ran pir’eg u lane Bible, Fare Babyor ku Mormon, fare Doctrine and Covenants nge fare Churwo’ nib ga’ Puluwon. Nge, en Somoel ba non ngodad udakaen fapi tapigpig Rok, woed ra rin’ bayay ko biney e general conference ni bay yib.
Ko gubin e gidii’ ni ma lemnog fa’anra ba’nem era buch—ra fith, “Rayog ni nge non Got ngodad e daba’?”—ko gubin e gum’racha’eg guba pinning em ningam “baed mu guyed” (John 1:46). Be’eg e thin ku Got ni rogon nikan pir’eg u lane fapi chep nib thothup. Motoyil ko general conference ko telim nib sagaran’ ni nge rung’ag lungun Got ni ke pii’ udakaen e pi profet Rok ko tin tomur e rran. Mu baed, motoyil gad, ngam guyed ko gum’racha’med! Fa’anra gimed ra gay “u fithik’ e l’agaen’ u gum’ircha’ey, u fithik’ e yul’yul’, nib mich an’uy ngak’ Kristus, [Got] ma ra dag e riyul’ riy ngomed, u dakean gelingin fare Kan ni Thothup” (Moroni 10:4). Udakaen e biney e gilngiy, ma guma nang ni Yesus Kristus e ba fas ma fanow nag e Galasia Rok udakaen e profet nib fas, mu’un i President Thomas S. Monson ngay.
Walageg nib mo’on nge ppin, Got e ma non ngodad e daba’. Ma Ir e ba adag ni gubin e bitir Rok ma ngar motoyil gad mar fol gad nga Laman. Napan ni gadad ra rrin’, ma ra fal’eg Somoel fel’ wa’than dad me ayuweg dad nib fal’ rogon, u lane biney yafas nge pi fayleng ni bay yib.
© 2012 ko Intellectual Reserve, Inc. Gubin ni mat’won ma bay. Nni yoloy u Mariken. Kan micheg nag ko thin nu Ngalis: 6/11. Micheg nag i pilyeg: 6/11. Ni pilyeg ko First Presidency Message, March 2012. Yapese. 10363 905