2012
Uliedi n-Nisa fis-Saltna Tiegħi
Marzu 2012

Messaġġ tal-Għalliema taż-Żjajjar, Marzu 2012

Uliedi n-Nisa fis-Saltna Tiegħi

Studja dan il-materjal u, kif inhu xieraq, iddiskutih mal-aħwa li inti żżur. Uża l-mistoqsijiet sabiex jgħinuk issaħħaħ lil ħutek u biex tagħmel lis-Soċjetà tal-Għajnuna parti integrali minn ħajtek.

Fidi, Familja, Għajnuna

Aħna wlied Missierna tas-Smewwiet. Huwa jafna, iħobbna u għandu għalina pjan. Parti minn dan il-pjan tinkludi li niġu hawn fid-dinja u nitgħallmu nagħżlu t-tajjeb mill-ħażin. Meta nagħżlu li nżommu l-kmandamenti ta’ Alla, aħna nonorawh u nagħrfu l-identità tagħna bħala wlied Alla. Is-Soċjetà tal-Għajnuna tgħinna niftakru f’dan il-wirt divin tagħna.

Is-Soċjetà tal-Għajnuna u l-istorja tagħha tqawwina u ssostnina. Julie B. Beck, president ġenerali tas-Soċjetà tal-Għajnuna, qalet: “Bħala wlied Alla, intom qed titħejjew għal titli eterni, u lkoll kemm intom għandkom identità, natura u responsabbiltà femminili. Is-suċċess tal-familji, ta’ komunitajiet sħaħ, ta’ din il-Knisja u tal-pjan prezzjuż tas-salvazzjoni jiddependi fuq il-fedeltà tagħkom. … [Missierna tas-Smewwiet] ried li s-Soċjetà tal-Għajnuna tgħin tibni l-poplu Tiegħu u tħejjih għall-barkiet tat-tempju. Huwa waqqaf [is-Soċjetà tal-Għajnuna] biex jgħaqqad lil uliedu n-nisa mal-ħidma Tiegħu u sabiex jingaġġahom miegħu ħalli jgħinuh fil-bini tas-saltna Tiegħu u jsaħħu d-djar ta’ Sijon.”1

Missierna tas-Smewwiet tana ħidma speċifika sabiex ngħinu fil-bini tas-Saltna Tiegħu. Huwa berikna wkoll b’ doni spiritwali li għandna bżonn biex inwettqu din il-ħidma speċifika. Permezz tas-Soċjetà tal-Għajnuna, aħna għandna opportunitajiet li nużaw id-doni tagħna biex insaħħu l-familji, ngħinu li min hu fil-bżonn, u nitgħallmu ngħixu bħala dixxipli ta’ Ġesù Kristu.

Il-President Dieter F. Uchtdorf, it-Tieni Kunsillier fl-Ewwel Presidenza, qal dan dwar li tgħix bħala dixxiplu: “Meta bil-paċenzja kollha ngħixu bħala dixxipli, aħna nuru lilna nfusna il-kobor tal-fidi tagħna u kemm aħna lesti li naċċettaw ir-rieda ta’ Alla minflok nagħmlu dak li rridu.”2

Ejjew niftakru li aħna wlied Alla u nagħmlu dak kollu li nistgħu biex ngħixu bħala dixxipli Tiegħu. Hekk kif nagħmlu dan, aħna ngħinu nibnu s-saltna ta’ Alla hawn fid-dinja u nsiru denji li mmorru lura fil-preżenza Tiegħu.

Mill-Iskrittura

Żakkarija 2:10; Doctrine and Covenants 25:1, 10, 16; 138:38–39, 56; “Il-Familja: Proklamazzjoni lid-Dinja” (Liahona u Ensign, Nov. 2010, 129)

Mill-Istorja Tagħna

Fit-28 ta’ April, 1842, il-Profeta Joseph Smith qal dan il-kliem lill-aħwa nisa tas-Soċjetà tal-Għajnuna: “Intom issa ġejtu mqiegħda f’ sitwazzjoni li fiha tistgħu taġixxu skont dawk is-sentimenti li Alla ħawwel fikom. … Jekk tgħixu denji tal-privileġġi tagħkom, l-anġli ma jibqgħux lura milli jgħinukom.”3

Wara li hija għarfet il-qawwa tas-Soċjeta tal-Għajnuna li taqdi lil ħaddieħor u li tgħin l-individwi jikbru fil-fidi tagħhom, fl-1893, Zina D. H. Young, it-tielet president ġenerali tas-Soċjetà tal-Għajnuna, wiegħdet dan li ġej lill-aħwa nisa, “Jekk tfittxu fil-fond ta’ qalbkom issibu, bl-għajnuna tal-Ispirtu tal-Mulej, il-perla ta’ valur kbir, it-testimonjanza ta’ din il-ħidma.”4

© 2012 minn Intellectual Reserve, Inc. Id-drittijiet kollha riservati. Printed in Germany. Approvazzjoni bl-Ingliż: 6/11. Approvazzjoni tat-traduzzjoni: 6/11. Traduzzjoni ta’ Visiting Teaching Message, March 2012. Maltese. 10363 159

Noti

  1. Julie B. Beck, “‘Daughters in My Kingdom’: The History and Work of Relief Society,” Liahona, Nov. 2010, 112, 114.

  2. Dieter F. Uchtdorf, “The Way of the Disciple,” Liahona, Mejju 2009, 76.

  3. Joseph Smith, in History of the Church, 4:605.

  4. Zina D. H. Young, “How I Gained My Testimony of the Truth,” Young Woman’s Journal, Apr. 1893, 319.

X’ Nista’ Nagħmel?

  1. Kif nista’ ngħin lil ħuti jilħqu l-potenzjal tagħhom bħala wlied Alla?

  2. Kif nista’ napplika f’ ħajti l-kunsill u t-twissija mogħtija lin-nisa f’Duttrina u Patti 25?