Cov Hluas
Kuv Yuav Rov Qab Ntsib Nws Dua
Txiv ua rau peb cov me nyuam txhua tus zoo siab heev. Nws hlub peb thiab nws zam txim yooj yim heev rau peb li. Nws rau siab ua kom peb txhua tus muaj kev zoo siab, thiab nws yeej qhia rau peb paub tseeb hais tias nws xav kom peb tau qhov zoo tshaj plaws xwb. Kuv hlub nws heev li.
Thaum kuv kawm ntawv nyob qib rau, kuv txiv tau tag sim neej lawm vim ua tsheb sib nrau. Peb tsev neeg thiab kuv nyuaj siab heev li. Ib tug neeg zoo heev hauv peb tsev neeg ploj lawm. Txiv yog tus uas txhawb nqa kuv, thiab nws yog tus uas thaum kuv muaj teeb meem dab tsi kuv mus nrog nws sib tham. Ces kuv tsis nrhiav kev pab, kuv pheej cia qhov kev chim thiab kev mob siab rau ntawm kuv xwb. Thaum kawg kuv txiav txim siab hais tias yog tim Vajtswv. Ces kuv cia tsum tsis nyeem vaj lug kub thiab tsis thov Vajtswv lawm. Kuv mus koom lub koom txoos vim Niam xav kom kuv mus xwb. Kuv sim nyob kom deb ntawm kuv Leej Txiv Saum Ntuj Ceeb Tsheej.
Ces thaum kuv mus koom lub Koom Haum Ntxhais Hluas kev mus pw hav zoov thawj zaug. Kuv nyiam ntsib cov phooj ywg tshiab, tab sis kuv tseem tsis nyeem vaj lug kub li. Hmo kawg, peb muaj kev sib ntsib hais lus tim khawv. Kuv hnov tau ib qho dab tsi uas kuv tsis tau hnov tau ntev ntev los lawm: tus Ntsuj Plig. Kuv zoo siab kawg rau cov ntxhais hluas uas los hais lawv zaj lus tim khawv, tab sis kuv zaum twj ywm xwb vim kuv tau xav hais tias kuv tsis muaj ib zaj lus tim khawv. Tos nco xwb ces kuv cia li xav sawv ntsug. Kuv rua kuv lub qhov ncauj hais lus, tsis paub kuv yuav hais li cas. Ces kuv cia li hais tias kuv zoo siab tuaj koom lub Koom Haum Ntxhais Hluas kev mus pw hav zoov. Kuv cia li hais tias kuv paub hais tias Yexus Khetos tau tuag rau kuv thiab kuv Leej Txiv Saum Ntuj Ceeb Tsheej hlub kuv thiab hais tias lub Koom Txoos muaj tseeb tiag.
Kuv cia li muaj ib qho kev thaj yeeb zoo heev li. Vim qhov uas tau muaj li no kuv thiaj li hais tau tias kuv yuav rov qab ntsib kuv txiv dua vim tus Cawm Seej txoj Kev Theej Txhoj thiab Kev Sawv Rov Los.