Thawj Pawg Thawj Tswj Hwm tsab Xov, Plaub Hlis Ntuj 2012
“Nws Sawv Lawm”
Ib Tug Yaj Saub Zaj Lus Tim Khawv
“Qhov kev nqua hu nrov thiab meej meej ntawm txoj Kev Ntseeg Khetos,” Thawj Tswj Hwm Thomas S. Monson tau hais, yog qhov uas hais tias Yexus Tuaj Naxales Tuaj tau sawv hauv qhov tuag rov qab los lawm. “Qhov tseeb tiag ntawm txoj Kev Sawv Rov Los ua rau peb sawv daws muaj kev thaj yeeb uas peb yeej tsis to taub li” (saib Filipis 4:7).1
Hauv tej lus nram qab no, Thawj Tswj Hwm Monson qhia nws zaj lus tim khawv thiab kev ris txiaj rau tus Cawm Seej txoj Kev Sawv Rov Los thiab hais tias vim Leej Tub tau kov yeej txoj kev tuag lawm, ces tag nrho Leej Txiv cov me nyuam uas los rau hauv ntiaj teb no yuav rov qab muaj txoj sia nyob.
Lub neej tom qab txoj kev Txawj Tuag
Kuv xav tias tsis muaj peb ib tug neeg twg uas yuav to taub tag nrho tias Yexus tau ua dab tsi pab peb hauv lub vaj Khexemanes, tiam sis txhua hnub hauv kuv lub neej mas kuv ua Nws tsaug rau nws txoj kev txi theej peb lub txhoj.
Thaum kawg Nws yeej muaj cuab kav thim es tsis txhob ua li. Tiam sis Nws tsis tau ua li ntawd. Nws nqi los raug txhua yam tsav kom Nws thiaj cawm tau txhua yam tsav. Thaum ua li no, Nws thiaj muaj txoj sia rau peb tom qab lub neej no xaus. Nws cawm peb dim ntawm Adas txoj Kev Poob.
“Kuv ua Nws tsaug tag siab tag ntsws. Nws qhia peb tias peb yuav tsum ua neeg zoo li cas. Nws qhia peb tias peb yuav tsum tso lub neej no tseg li cas. Nws pab peb txais kev cawm dim.”2
Ua Kom qhov Tsaus ntawm txoj Kev Tuag Ploj Mus
“Nyob ntawm tej qhov, xws li thaum raug kev txom nyem thiab muaj mob loj heev ces, txoj kev tuag, kuj yog ib qho kev hlub tshua. Tab sis mas feem ntau, peb xav tias kev tuag yog tus yeeb ncuab ntawm tib neeg txoj kev zoo siab.
“Qhov kaj ntawm qhov tseeb uas tshwm sim los yeej kov yeej tau qhov tsaus ntawm kev tuag. ‘Kuv yog txoj kev sawv rov los, thiab txoj sia,’ tus Tswv tau hais. ‘Tus uas muaj siab ntseeg kuv, txawm tias tuag lawm, los tseem muaj sia nyob: Thiab leej twg uas ua neej nyob thiab muaj siab ntseeg kuv yeej yuav tsis tuag li.’
“Qhov no yeej hais tiag tiag—yog lawm, qhia kom paub tseeb—txog lub neej tom qab txoj kev tuag uas yog txoj kev kaj siab uas tus Cawm Seej tau cog lus tseg rau Nws cov thwj tim thaum Nws tau hais tias: ‘Kuv muab kuv txoj kev kaj siab rau nej, txoj kev kaj siab uas kuv muab pub rau nej: kuv tsis yog muab rau nej li neeg ntiag teb muab. Nej tsis txhob txhawj, tsis txhob nyuaj siab thiab tsis txhob ntshai.’”3
Nws Tsis Nyob Ntawm No
“Peb tus Cawm Seej rov qab muaj sia nyob dua lawm. Yam uas zoo heev, ua rau yus muaj kev nplij siab, thiab muaj kev paub tseeb tseeb tshaj txhua yam ntawm tag nrho txhua yam hauv tib neeg zaj keeb kwm tau muaj los lawm uas yog —qhov kev kov yeej kev tuag. Txoj kev raug mob thiab txom nyem ntawm Khexemanes thiab lub Roob Khauj Khaum Taub Hau twb muab tshem tawm tag lawm. Txoj kev cawm seej ntawm tib neeg twb ua tau tiav tag nrho lawm. Txhiv tau Adas txoj Kev Poob los lawm.
“Qhov uas Nws tsis nyob hauv lub qhov ntxa thaum thawj thawj hnub Easter sawv ntxov ntawd twb teb tau Yauj los lus nug uas hais tias, ‘Yog ib neeg tuag lawm, nws puas yuav muaj sia nyob dua?’ Hais rau txhua tus uas hnov tau kuv lub suab, kuv hais tias, Yog ib tug neeg tuag lawm, nws yeej yuav rov qab muaj siab nyob dua. Peb paub, vim hais tias peb tau kev tshwm sim txog qhov tseeb. …
“Kuv cov kwv tij thiab cov muam, thaum lub sij hawm peb tu siab heev, peb yeej txais tau kev thaj yeeb los ntawm tus tim tswv uas tau hais lus rau thawj thawj hnub Easter sawv ntxov uas hais tias: ‘Nws tsis nyob nov lawm: nws twb sawv lawm.’”4
Txhua tus Yuav Rov Qab Muaj Sia Nyob Dua
“Peb luag nyav, peb quaj, peb ua hauj lwm, peb ua si, peb hlub, peb ua neej nyob. Ces peb tuag. …
“Thiab peb yeej yuav tuag mus tsuas tshuav qhov uas muaj ib tug Txiv Neej thiab Nws txoj hauj lwm, twb yog Yexus Tuaj Naxales Tuaj. …
“Kuv hais lus tim khawv tag nrho kuv lub siab lub ntsws raws li kev ua ib tug tim khawv tshwj xeeb, hais tias Vajtswv muaj sia nyob. Yexus yog Nws tus Tub, Tib Leej Tub ntawm Leej Txiv uas muaj cev nqaij daim tawv. Nws yog peb tus Cawm Seej; Nws yog peb tus Neeg Nruab Nrab ntawm Leej Txiv. Nws yog tus uas tau tuag saum tus ntoo khaub lig los theej txhoj rau peb tej kev txhaum. Nws rais los mus ua thawj tug ntawm txoj Kev Sawv Rov Los. Vim hais tias Nws tau tuag, ces txhua tus yuav rov qab muaj sia nyob dua.”5
Ib tug Tim Khawv
“Kuv ua tim khawv hais tias Yexus kov yeej tau kev tuag lawm, twb yeej tau lub qhov ntxa lawm. Thov kom cov lus dawb ceev thiab uas ua tau tiav raws li tau hais lawm rais los ua kev paub rau txhua tus. Nco qab ntsoov tej lus no. Khaws tej lus no cia. Hwm tej lus no. Nws twb sawv lawm.”6
© 2012 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11. Kev txhais First Presidency Message, April 2012. Hmong. 10364 295
Qhia los ntawm tsab Xov No
Tom qab qhia Thawj Tswj Hwm Monson zaj lus tag lawm, ces qhia txog nws zaj lus tim khawv uas nws hais txog lub ntsiab tseeb ntawm Easter. Tej zaum koj yuav nug cov neeg hauv tsev neeg li no: “Koj xav li cas txog qhov uas ib tug yaj saub uas muaj sia nyob tau hais lus tim khawv txog tej yam tseeb no niaj hnub nim no? Koj yuav ua li cas thiaj muab tau tej no nruab rau hauv koj lub neej?” Xav saib puas tsim nyog hais koj zaj lus tim khawv.