2012
Kev Hlub, Saib Xyuas, thiab Ntxiv Dag Zog
April 2012

Cov Mus Saib Xyuas tom Tsev tsab Xov, Plaub Hlis Ntuj 2012

Kev Hlub, Saib Xyuas, thiab Ntxiv Dag Zog

Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej.

Kev Ntseeg, Tsev Neeg, Kev Pab

Zoo ib yam li tus Cawm Seej, cov mus saib xyuas tom tsev yeej mus pab ib leeg zuj zus (saib 3 Nifais 11:15). Peb paub tias peb ua tau peb txoj hauj lwm uas mus saib xyuas tom tsev zoo lawm thaum peb cov viv ncaus hais tau tias: (1) kuv tus uas mus saib xyuas tom tsev pab kuv loj hlob ntawm sab ntsuj plig; (2) kuv paub hais tias kuv tus uas mus saib xyuas tom tsev yeej hlub kuv thiab kuv tsev neeg tiag tiag li; thiab (3) yog thaum kuv muaj teeb meem dab tsi, kuv yeej paub hais tias kuv tus uas mus saib xyuas tom tsev yeej yuav pab xwb tsis tas tos kom leej twg hais nws li.1

Peb cov uas yog cov mus saib xyuas tom tsev yuav ua li cas thiaj li muaj tau kev hlub, kev saib xyuas, thiab ntxiv dag zog rau ib tug viv ncaus? Nram qab no muaj cuaj qhov kev pab qhia uas muaj nyob rau hauv tshooj 7 ntawm Daughters in My Kingdom: The History and Work of Relief Society kom los pab cov mus saib xyuas tom tsev mus pab tau lawv cov viv ncaus:

  • Thov Vajtswv txhua hnub rau tus viv ncaus thiab nws tsev neeg.

  • Nrhiav kev tshoov siab kom paub txog tus viv ncaus thiab nws tsev neeg zoo.

  • Mus xyuas nws seb nws nyob li cas lawm thiab nplij nws lub siab thiab ntxiv dag zog rau nws.

  • Hu xov tooj, sau ntawv, sau e-mail, thiab xav ntawv hauv xov tooj thiab ua tej yam zoo rau nws.

  • Thaum ntsib nws tom lub Koom Txoos ces hu nws.

  • Pab nws thaum nws muaj kam ceev, mob, los sis lwm yam teeb meem ceev.

  • Qhia txoj moo zoo rau nws los ntawm tej vaj lug kub thiab tej xov xwm Mus Saib Xyuas Tom Tsev.

  • Ua ib tug yam ntxwv zoo kom nws xav ua li ntawd thiab.

  • Qhia rau ib tug thawj coj hauv Koom Haum Niam Tsev txog lawv tej kev pab lwm tus thiab txog tus viv ncaus txoj kev noj qab nyob zoo ntawm sab ntsuj plig thiab sab cev nqaij daim tawv.

Los ntawm cov Vaj Lug Kub

Lukas 10:38–39; 3 Nifais 11:23–26; 27:21

Los ntawm Peb zaj Keeb Kwm

“Kev Mus Saib Xyuas tom Tsev yog ib txoj kev hlub, kev saib xyuas, thiab pab lwm tus—rau cov poj niam hauv Hnub Nyoog Kawg kom los ‘los ua raws li tej yam uas Vajtswv muab cog rau hauv [peb] lub siab lawm,’ raws li Yauxej Xamiv qhia lawm.”2

Muaj ib tug viv ncaus uas nws tus txiv nyuam qhuav tuag lawm tau hais li no txog nws ob tug mus saib xyuas tom tsev: “Nkawd ua tib zoo mloog thaum kuv hais lus. Nkawd nplij kuv siab. Nkawd nrog kuv quaj. Nkawd khawm kuv. … [Nkawd] pab kuv thaum kuv tsis muaj kev cia siab thiab nyuaj siab heev ntawm thawj thawj ob peb lub hlis uas kuv kho siab heev li.”3

Kev pab ua hauj lwm twb yog ib qho ntawm kev saib xyuas ntag. Thaum lub Kaum Hli 1856 lub tuam rooj sab laj, Thawj Tswj Hwm Brigham Young tau tshaj tawm hais tias cov neeg pioneer uas cab laub tau raug muab tso tseg ntawm cov daus tob heev li 270–370 mais (435–595 km) ntawm lawv. Nws hais kom cov Neeg Ntseeg Hauv Hnub Nyoog Kawg hauv Salt Lake yuav tsum mus pab lawv thiab kom lawv “mus pab ua tej hauj lwm ntiaj teb no kom tiav.”4

Lucy Meserve Smith tau sau tseg hais tias cov poj niam hle kiag lawv tej tiab tuaj hau qab thiab tej thoom thaub uas hnav kom so so ces muab tso rau saum lub laub uas yuav mus tos cov neeg pioneer uas tau tiv no. Ces lawv pib sau tej ntaub pua txaj thiab tej ris tsho npaj tseg rau cov neeg uas yuav los txog es tsis muaj dab tsi ntau li. Thaum cov laub no los txog, ces twb muaj ib lub tsev uas lawv “sau tej yam uas cov neeg no yuav xav tau.”5

© 2012 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11. Kev txhais Visiting Teaching Message, April 2012. Hmong. 10364 295

Lus Cim

  1. Saib Julie B. Beck, “What I Hope My Granddaughters (and Grandsons) Will Understand about Relief Society,” Liahona, Kaum Hli Ntuj 2011, 113.

  2. Daughters in My Kingdom: The History and Work of Relief Society (2011), 112.

  3. Daughters in My Kingdom, 119–20.

  4. Brigham Young, “Remarks,” Deseret News, Kaum Hli Ntuj 15, 1856, 252.

  5. Saib Daughters in My Kingdom, 36–37.

Kuv Yuav Pab Li Cas?

  1. Kuv yuav ua li cas paub saib kuv cov viv ncaus xav tau dab tsi?

  2. Kuv cov viv ncaus yuav ua li cas paub hais tias kuv hlub tshua lawv heev?

Luam