Klumech er a First Presidency, Ongeuang el Buil 2012
“Ngii a Mla Mekiis”
Olechotel a Klaumerang er a Profet
“A terombetang omekedong er a Rekeristiano,” A President Thomas S. Monson a millekoi el kmo, a Jesus Kristo er a Nazareth a mla mekiis er a kodall. “A klemerang el kirel Okiis er a Kodall a mesterir a rokui el chad a budech el chengelakl er sel di klemedengei er tir” (mesa Filipi 4:7).1
Chelsel tia el cheldecheduch, ea President Monson a ouchais el kirel a olechotel a klaumerang er ngii el okiu a omereng el saul el kirel a Osobel er a Lebekiis er a Kodall le uchul eng mlo chuarm er a kodall el kirir a rokui el ngelkel a Chedam el mei er tial beluulechad.
Klengar Ruchei er tial Beluulechad
“A kuumerang el kmo ng diak a tar kid el sebechel kudmeklii tial teletael el Kristo a rirelii er a Gethsemane, Eng di ak meral ngeltengat er a bek el sils er a klengar er ngak el Ngii a mlo mad er a kerus el kired.
“Sel mocha er a ulebongel, e Ngii a mle sebechel el obult. Eng di Ngii a dimlak. Ngii a kildmokl a rokiu el tekoi me bol sebechel Ngii el osobel a rokui el tekoi. Meng mlo uaisei, el Ngii a milskid a klengar el chengelakl er tial klengar chelechang. Ngii a silbecheklid er a Rebetel a Adam.
“Me sel kmal techel a chelsel a renguk, eak kmal ulis el mereng a Sulel. Ngii a ulsischeklid el kmo kede kiei el uangerang. Ngii a ulsischeklid el kirel a kodall. Ngii a kildmeklii a diak a ulebengelel el klengar.”2
Oridii a Iilkelkel a Kodall
“Chelsel a bebil er a teletael, el uaia klou el ringel me a secher, ea kodall a mei el uaia le chubechub el anghel. Eng di oumesingd er ngii, e ke de blechoel el omdasu el kmo ng cherarou el mei er a deoreng er a kengar er kid.
“A iilkelkel a kodall a sebechel mo dibus el okiu a llomes er a mla mocholt el klemerang. ‘Ngak a okiis er a kodall, e klengar,’ ng millekoi a Mastang. ‘Ngikel oumerang er ngak, el uaia bla lemad, a diak el mad: E ngikel mo kiei el ngara klaumerang er ngak a diak lemad, to e bai mo ngar: E ngikel kiei e oumerang er ngak a diak bol mad.’
“Tia el mesisiich el klemerang—e dirrek, el chedaol —el kirel a klengar ruriul er a debull a kmal meskid a budech el blel yaksok er ngii Osobel er sera le Ngii a kmung er a Rulbengkel el kmo: ‘A budech ak beskemiu, a budech er ngak ak beskemiu: el diak el beluulechad a meskemiu, ngak a meskemiu. Bol chelellakl a rengmiu, e lak komedakt.’”3
Ngii a Diak el Ngar Tiang
“A Osobeled a liluut el mo ngar. Sel klebokel, el ongelaod, e melissiich a reng el teletael er a chelsel a rokui el reksi a mla mekedmokl—el sel deluut el mo ngar ruriul er a kodall. A ringel me a klou el chelbuul el mla er ngii er a Gethsemane me a Calvary a mla mesuld el mo diak. A diak a ulebengelel klengar a mla mo ungil mekedmokl. E a Rebetel a Adam a mla mesemechokl.
“Sel bechachau el debull er sel tutau er a Easter a mle nger el mo er a keril a Job, ‘A chad a lemad, e ngelmuut el mo ngar?’ Me tirkel rongesii a ngerek, ea kmul kmo, A chad a lemad, e ngelmuut el mo ngar. Kede medengei el kmo, ngarngii a llomes el lochotii a klemerang. …
“Betik er a renguk el rodam me a rodos, ngara chelsel a kot el dmolch el klechubechub, e ke de sebeched el metik er a budech lokiu ar anghel el kirel a kot el tutau er a Easter: ‘Ngii a diak el ngar tiang: ngii a mla mekiss.’”4
A Rokui a Lmuut el mo Ngar
“Ke de ocherechur, ke de lmangel, ke de oureor, ke de milil, ke de kaubeltikereng, ke de ngar. E mo er a kodall. …
“Me ke de locha melemolem el ngara kodall eng di a chimong el Chad me a Urerel, el ngii a Jesus er a Nazareth a sobecheklid. …
“Meng renguk me a bedengek el rokir, ea kudersii a klaumerang er ngak el tokubets el sioning e kmul kmo a Dios a meral ngar. Ngelekel. El di Chimong l Ngelekel a Chedam er a tech. A Jesus a Ngelekel Sechal, el di Chimong el Ngelekel a Chedam er a tech. Ngii a Osebeled; Ngii a Sebechekled el obengkel a Chedam. Ngii a mlo mad er a kerus el mo melngakireng el kirel a kngtid. Ngii a kot el rodech er a Okiis er a kodall. Le Ngii el mlad, me kid el rokui el muut el mo ngar.”5
Tang er a Sioning
“A kuchotii a sioning er ngak el kmo a kodall a mla mo mechitechut, kede mla mo kats er a kodall er a debull. Aikel tekoi el Ngii a dilung e kildmokl bol lodengei a rokui el chad. Molbedebek. Mkereomel. E Mongull. Ngii a mla mekiis.”6
© 2012 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/11. Kengei er a oidel: 6/11. Oidel a First Presidency Message, April 2012. Palauan. 10364 881
Osischeklel Tial Klumech
Uriul er a bocha merek el ouchais er tial klemechel a President Monson, e mouchais er a klemerang el kirel a Easter. Ng sebechem el oker er a rechad er a telungalek aikakid el ker: “Ngera belkul er kau se el du el kmo a profet a mla ouchais a klemerang er chelechang? Ng mekerang e sebechem el ousbech er ngii er a chelsel a klengar kau?” Ke direk el mo dochelir a olchotel a klaumerang er kau.