Lamharon
Salamat sa Akon Titser sa Sunday School
Ang akon klase sa Sunday School indi pirme malinong. Nanamian ako mamati sang mga leksyon sa tagsa ka semana, apang kon kaisa ang iban sa akon klase dawsa wala nanamian. Sa masami nagasinugilanon sila ukon nagahampang sang ila mga gadgets samtang ang amon titser nagatinguha sa pagtudlo sa amon. Ang masubo, kon kaisa mamarasmasan ko nga upod man ako sa problema.
Isa ka semana nangin mas magahod pa gid kami sangsa nagliligad, kag sa katapusan sang klase, ang amon titser naghibi tungod wala sing may nagapamati sa iya leksyon. Samtang nagapagwa kami sa kwarto, naluoy ako sa iya.
Sang pagkadason nga Domingo ang amon titser nagpaathag nga nagpangamuyo gid sia sing todo sina nga semana, nga nagapangayo sing paggiya, kag nabatyagan niya nga kinahanglan niya magpakita sang isa ka sine [nga ginhimo] sang Simbahan. Ginpagwa niya ang sine nga parte sa kabuhi ni Jesucristo kag sa mga milagro nga Iya ginhimo.
Samtang ginapamensar ko ang sine sina nga gab-i, may lain ako nga nabatyagan. Sa hinali akon narealisar nga nabatyagan ko ang Espiritu, labi pa sangsa akon nabatyagan sadto. Sa gilayon nagpamat-od ako nga gusto ko maghimo sang mga pagbag-o sa akon kabuhi agud mangin kasubong sa Manluluwas, kag akon narealisar nga ang [akon] naeksperiyensyahan sa Sunday School sina nga adlaw nagpabaskog gid sang akon panaksihon. Nagapasalamat gid ako sa akon titser sa Sunday School kag sang tanan niya nga ginahimo para sa amon klase tagsa ka semana.