Mensahe sang Unang Panguluhan, Hunyo 2012
Gintawag sang Dios kag Gintib-ong sang mga Tawo
Bilang mga miyembro sang Simbahan, masami kita ginaagda sa pagtib-ong sang mga tawo sa palangakuan agud mag-alagad. Mga tinuig ang nagligad, isa ka 18-anyos nga estudyante ang nagpakita sa akon kon ano ang kahulugan sang pagtib-ong sang mga alagad sang Ginuo. Ako sa gihapon ginabugayan tungod sa iya mapainubuson nga ehemplo.
Bag-o gid lang sia nagsugod sa iya una nga tuig sa kolehiyo. Wala pa isa ka tuig nga sia mabunyagan sang sia magbiya sa [ila] puluy-an agud sugdan ang iya pag-eskwela sa isa ka dako nga unibersidad. Didto nag-alagad ako bilang iya bishop.
Sa pagsugod sang klase sina nga tuig, makadali ko sia nga gin-interbyu sa opisina sang bishop. Diutay lang ang akon madumduman sadtong una nga pagsugilanon luwas lang nga sia naghambal parte sa iya mga hangkat sa isa ka bag-o nga lugar, apang indi ko gid malimtan ang amon ika-duha nga pagsugilanon.
Nagpangabay sia nga makigkita sa akon sa akon opisina. Nasorpresa ako sang sia magsiling, “Mahimo bala kita magpangamuyo, kag pwede ako lang ang mangamuyo?” Daw mahambal na gid ako nga nakapangamuyo na ako kag nagapaabot ako nga sia nakapangamuyo naman. Sa baylo nagpasugot ako.
Ginsugdan niya ang iya pangamuyo paagi sa isa ka panaksihon nga nakahibalo sia nga ang bishop gintawag sang Dios. Ginpangabay niya ang Dios nga hambalan ako kon ano ang iya dapat himuon sa isa ka bagay nga may dako nga espiritwal nga konsikwensya. Ginhambalan sang pamatan-on ang Dios nga nakaseguro sia nga ang bishop nakahibalo na sang iya mga panginahanglan kag mahatagan sia sang laygay nga iya kinahanglan mabatian.
Samtang nagahambal sia, ang pat-od nga mga peligro nga iya atubangon nag-abot sa akon panghunahuna. Simple lang ang laygay apang ginhatag sing klaro gid kaayo: magpangamuyo pirme, magtuman sang mga kasuguan, kag indi magkahadlok.
Inang pamatan-on, nga isa ka tuig sa Simbahan, nagtudlo paagi sa ehemplo kon ano ang sarang mahimo sang Dios sa isa ka lider samtang sia ginatib-ong sang pagtuo kag pangamuyo sang mga tawo nga sia gintawag sa paggiya. Inang pamatan-on nagpahamtang para sa akon sang gahum sang layi sang pangkabilugan nga pag-uyon (common consent) sa Simbahan (tan-awa sa D&C 26:2). Bisan pa nga ang Ginuo nagatawag sang ya mga alagad paagi sa bugna, sila sarang lamang makabuhat pagkatapos sila nga gintib-ong sang mga tawo sa diin sila gintawag sa pag-alagad.
Nagahimo kita sang hanuot nga mga promisa paagi sa pagbayaw sang aton kamot. Nagapromisa kita nga magpangamuyo para sa mga alagad sang Ginuo kag nga Sia magagiya kag magapabaskog sa ila (tan-awa sa D&C 93:51). Nagapromisa kita nga aton pangitaon kag paabuton nga mabatyagan ang inspirasyon gikan sa Dios sa ila laygay kag kon nagahikot sila sang ila mga palangakuan (calling) (tan-awa sa D&C 1:38).
Ina nga promisa kinahanglan nga pagabag-uhon pirme sa aton mga tagipusuon. Ang imo titser sa Sunday School magatinguha sa pagtudlo paagi sa Espiritu, apang pareho man sa imo, ang imo titser mahimo magsala sa atubang sang klase. Ikaw, ugaling, sarang makapamat-od sa pagpamati kag pagbantay sang mga higayon kon mabatyagan mo ang inspirasyon nga nagaabot. Sa ulihi mas diutay na lang nga sala ang imo madeparahan kag mangin mas madamo ang ebidensya nga ang Dios nagatib-ong sina nga titser.
Sa pagbayaw naton sang kamot agud itib-ong ang isa ka tawo, nagatug-an kita nga mag-obra para sa bisan ano nga katuyuan sang Ginuo nga inang tawo gintawag sa pagtuman. Sang magagmay pa ang amon mga kabataan, ang akon asawa gintawag sa pagtudlo sa magagmay nga mga kabataan sa amon ward. Wala lamang ako nagbayaw sang akon kamot sa pagtib-ong sa iya, kundi nagpangamuyo man ako para sa iya kag nagpangayo sang pahanugot sa pagbulig sa iya. Ang mga leksyon nga akon natun-an parte sa pag-apresyar sa ginahimo sang kababayin-an kag sang pagpalangga sang Ginuo sa mga kabataan padayon nga nagabugay sa akon pamilya kag sang akon kabuhi.
Nakigsugilanon ako sini gid lang sa sinang pamatan-on nga nagtib-ong sa iya bishop pila na ka tuig ang nagligad. Nahibaloan ko nga ang Ginuo kag ang mga tawo nagtib-ong sa iya sa iya tawag bilang isa ka misyonero, bilang isa ka stake president, kag bilang isa ka amay. Sang maghingapos ang amon pag-estoryahanay nagsiling sia, “Nagapangamuyo man ako gihapon para sa imo adlaw-adlaw.”
Sarang kita magpamat-od sa pagpangamuyo adlaw-adlaw para sa isa ka tawo nga gintawag sang Dios sa pag-alagad sa aton. Pwede kita magpasalamat sa isa ka tawo nga nagpakamaayo sa aton paagi sa iya pag-alagad. Sarang kita magpamat-od sa pagpresentar [sang aton bulig] kon ang tawo nga aton gintib-ong nagapangayo sang mga manugboluntad.1
Sila nga nagasakdag sang mga alagad sang Ginuo sa Iya ginharian pagatib-ongon paagi sa Iya di-matupongan nga gahum. Kita tanan nagakinahanglan sina nga bugay.
© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang First Presidency Message, June 2012. Hiligaynon. 10366 861
Pagtudlo gikan sa Sining Mensahe
Pagkatapos nga mapaambit ang mensahe, binagbinaga ang pagbasa sang masunod nga sinambit nga mga pulong: “Ang Ginuo magahimo sa imo nga isa ka instrumento sa Iya mga kamot kon ikaw mapainubuson, matinuohon, kag maukod. … Magabaton ikaw sang dugang nga kusog kon ginatib-ong ikaw sang kongregasyon kag ginpain” (Teaching, No Greater Call [1999], 20). Tipuna ang panimalay sa palibot sang isa ka mabug-at nga bagay kag pangabaya ang isa katawo nga tilawan ini hakwat. Nga nagadugang sang isa katawo sa tagsa ka tion, agdaha ang iban pa nga mga miyembro sang panimalay sa pagbulig hakwat sinang mabug-at nga bagay. Hambali kon ano ang matabo kon ang kada isa nagabulig. Binagbinaga ang pagdagmit sang laygay ni Pangulong Eyring parte sa praktikal nga mga paagi nga sarang naton matib-ong ang iban sa ila mga palangakuan.