Mensahe sa Visiting Teaching, Hunyo 2012

Visiting Teaching—isa ka Sagrado nga Takay

Tun-i ining materyal sing mainampuon kag, kon nagakabagay, hambali ini upod sang mga sisters nga inyo ginabisita. Gamita ang mga pamangkot agud buligan kamo sa pagpabakod sang inyo mga sisters kag himuon ang Relief Society nga aktibo nga bahin sang inyo mismo kabuhi.

Litrato

Selyo sang Relief Society

Pagtuo, Pamilya, Bulig

Bilang mga visiting teachers, may yara kita sang importante nga pang-espirituhanon nga misyon nga dapat tumanon. “Ang bishop, nga amo ang gintangdo nga manugpahalab sang ward, indi sarang makabantay sang tanan nga mga karnero sang Ginuo sing dulungan. Nagasalig sia sa inspirado nga mga visiting teachers nga magbulig sa iya.”¹ Importante ang pagpangayo kag pagbaton sang bugna sa kon sin-o ang dapat takayan sa pagbantay sang tagsa ka sister.

Ang inspirasyon nagasugod samtang ang mga miyembro sang panguluhan sang Relief Society mapinangamuyuon nga nagahinambalanay parte sa mga panginahanglan sang mga indibidwal kag mga pamilya. Kag dayon, nga upod ang pahanugot sang bishop, ang panguluhan sang Relief Society nagahatag sang takay sa paagi nga nagabulig sa mga sisters sa paghangop nga ang visiting teaching isa ka importante nga espirituhanon nga responsibilidad.²

Ang mga visiting teachers sinsero nga nagakilala kag nagapalangga sang tagsa ka sister, nagabulig sa iya sa pagpabaskog sang iya pagtuo, kag nagahatag sang serbisyo kon kinahanglanon. Nagapangayo sila sang inspirasyon nga mahibaloan kon paano sabton ang espiritwal kag temporal nga mga panginahanglan sang tagsa ka sister nga ila ginabisita.³

“Ang visiting teaching mangin buluhaton sang Ginuo kon ang aton ginatutokan amo ang mga tawo imbes ang mga numero. Sa matuod-tuod, ang visiting teaching wala’y katapusan. Ginakabig ini nga pagginawi sangsa buluhaton.”⁴

Gikan sa Balaan nga mga Kasulatan

Mateo 22:36–40; Juan 13:34–35; Alma 37:6–7

Gikan sa Aton Kasaysayan

Si Eliza R. Snow, ang ika-duha nga pang-kabilugan nga pangulo sang Relief Society nagtudlo, “Ginakabig ko ang palangakuan sang isa ka titser nga isa ka mataas kag sagrado nga palangakuan.” Iya ginlaygayan ang mga visiting teacher “nga mangin puno sang Espiritu sang Dios, sang kaalam, sang pagpaubos, sang paghigugma” antes sila magbisita sa mga puluy-an agud ila mahibaloan kag masabat ang espiritwal nga mga panginahanglan subong man ang temporal. Sia nagsiling, “Mahimo nga imo mabatyagan ang maghambal sang mga pulong sang paghidaet kag pagpaumpaw, kag kon imo matukiban ang isa ka sister nga ginatugnawan, dapita sia sa imo tagipusuon kasubong nga imo ginahakos ang isa ka bata sa imo dughan agud mainit-initan [sia].”⁵

Kon magpadayon kita sa pagtuo kasubong sang ginhimo sang nauna nga mga sisters sa Relief Society, mangin yara sa aton ang Balaan nga Espiritu kag mangin inspirado sa paghibalo kon paano makabulig sa tagsa ka sister nga aton ginabisita. “Pangitaon [naton] ang kaalam imbes ang gahum,” siling ni Sister Snow, “kag [aton] maangkon ang tanan nga gahum nga may kaalam [kita] sa paggamit”⁶

© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang Visiting Teaching Message, June 2012. Hiligaynon. 10366 861