Agtutubo
Agyamanak iti Mannursurok iti Sunday School
Saan a kanayon a naulimek ti klasek iti Sunday School. Kaay-ayok ti dumngeg iti leksion tunggal lawas, ngem no dadduma kasla saan dumdumngeg dagiti dadduma iti klasek. Masansan nga agsasarita wenno agay-ayamda kadagiti electronic device no madama a mangisursuro kadakami ti mannursuromi. Makapaladingit ta no dadduma makitak ti bagik a pasetak iti problema.
Maysa a lawas nalablabeskami ngem iti sigud, ket iti gibus ti klase, agsangsangit ti mannursuromi gapu ta awan ti dumngeg iti leksionna. Bayat ti iruruarmi iti siled ti klase, madi ti riknak para kenkuana.
Iti sumaruno a Domingo inlawlawag ti mannursuromi a nagkararag iti napasnek isuna iti dayta a lawas, nga agkalkalikagum iti pannarabay, ket napanunotna a nasken a mangipabuya iti maysa a sine ti Simbaan. Inrugina nga impabuya ti sine, a maipapan iti biag ni Jesucristo ken dagiti milagro nga inaramidna.
Bayat ti panangpanunotko maipapan iti sine iti dayta a rabii, nakariknaak iti maysa a banag a naidaddaduma. Idi agangay naamirisko a marikriknak ti Espiritu, nga ad-adda may ngem iti napadasak idi. Dagdagus nga inkeddengko a kayatko ti agaramid kadagiti panagbalbaliw iti biagko nga ad-adda pay a kas iti Mangisalakan, ket naamirisko a napapigsa unay ti padas iti Sunday School iti dayta nga aldaw ti pammaneknekko. Agyamanak unay iti mannursurok iti Sunday School ken amin a banag nga ar-aramidenna para iti klasemi iti tunggal lawas.