Mensahe ti Umuna a Panguluen, Hunio 2012
Inawagan ti Dios ken Kinanunongan dagiti Tao
Kas miembro ti Simbaan, masansan a maawistayo a mangkanunong iti tattao kadagiti awag nga agserbi. Adun a tawen ti napalabas, maysa nga estudiante nga agtawen iti 18 ti nangipakita kaniak no ania ti kaipapanan ti mangkanunong kadagiti katulongan ti Apo. Mabembendisionannak pay laeng babaen ti napakumbaba a pagwadanna.
Karugrugina pay laeng ti umuna a tawenna iti kolehio. Nabuniagan isuna iti nakurang a maysa a tawen sakbay a pimmanaw iti pagtaenganna tapno rugianna ti panagadalna iti maysa a dakkel nga unibersidad. Nagserbiak idiay a kas bishopna.
Idi nangrugi ti serrek ti eskuela, naaddaanak iti ababa a pannakiuman kenkuana iti opisina ti bishop. Bassit laeng ti malagipko iti dayta umuna a pannakisarita malaksid iti panangisarita maipapan kadagiti pannubokna iti maysa a baro a lugar, ngem saankonto pulos malipatan ti maikadua a panagsaritami.
Indawatna nga agkitakami iti opisinak. Nasdaawak idi imbagana, “Mabalin kadi nga agkararagta, ket siak ti mangisao iti kararag?” Ibagak koman a nagkararagakon ket ninamnamak a nagkararag met isunan. Ngem ketdi, immanamongak.
Inrugina ti kararagna iti maysa a pammaneknek nga ammona nga inawagan ti Dios ti bishop. Indawatna iti Dios nga ibagana kaniak no ania ti nasken nga aramidenna iti maysa a banag nga addaan iti dakkel a naespirituan a pagbanagan. Inkarag ti agtutubo a lalaki iti Dios nga awan duaduana nga ammon ti bishop dagiti kasapulanna ket maited kenkuana ti balakad a kasapulanna a mangngegan.
Bayat ti panagsaona, immay iti panunotko dagiti masinunuo a peggad a pakaipasanguanna. Simple ti balakad ngem naited a sibabatad: agkararag a kanayon, agtungpal kadagiti bilin, ken saan nga agbuteng.
Dayta nga agtutubo a lalaki, maysa a tawenna iti Simbaan, ket nasursuruan babaen iti pagwadan no ania ti maaramid ti Dios iti maysa a dadaulo bayat ti panangkanunong kenkuana babaen ti pammati ken kararag dagitay nakaawaganna nga idauluan. Impakita kaniak dayta agtutubo a lalaki ti bileg ti sapasap a pammalubos ti Simbaan (kitaen iti DkK 26:2). Nupay awagan ti Dios dagiti katulonganna babaen ti paltiing, mabalinda laeng ti agtignay kalpasan a nakanunongan ida dagiti nakaawaganda a pagserbian.
Babaen ti pangkanunong a butostayo, agaramidtayo kadagiti napasnek a kari. Ikaritayo nga ikararagantayo dagiti katulongan ti Apo ket iturong ken papigsaennanto ida (kitaen iti DkK 93:51). Ikaritayo a sapulentayonto ken namnamaentayo a marikna ti pammaregta manipud iti Dios iti pammagbagada ken iti kanito nga agtignayda kadagiti akemda (kitaen iti DkK 1:38).
Masapul a kanayon a mapabaro dayta a kari kadagiti pusotayo. Ikarigatanto ti mannursuroyo iti Sunday School ti mangisuro babaen ti Espiritu, ngem kas iti mabalin nga aramidenyo, mabalin nga agbiddut ti mannursuroyo iti sango ti klase. Nupay kasta, mabalinyo nga ikeddeng ti dumngeg ken aguray para kadagiti kanito no makariknakayo iti umay a pammaregta. Iti panaglabas ti panawen madlawyonto ti basbassit a panagbiddut ken ad-adda a pammaneknek a tultulongan ti Dios dayta a mannursuro.
Bayat ti panangingatotayo ti maysa nga ima tapno kanunongan ti maysa a tao, agkumittayo nga agtrabaho para iti ania man a panggep ti Apo a nakaawagan dayta a tao nga ipatungpal. Idi babassit pay dagiti annakmi, naawagan ti asawak a mangisuro kadagiti babassit nga ubbing iti wardmi. Saanko laeng nga inngato ti imak a mangkanunong kenkuana, ngem nagkararagak pay para kenkuana ket kalpasanna nagdawatak iti pammalubos a mangtulong kenkuana. Dagiti adal a naawatko iti panagyaman para iti ar-aramiden dagiti babbai ken ti ayat ti Apo para kadagiti ubbing ket bembendisionanna pay laeng ti pamiliak ken ti biagko.
Nakasaok iti saan pay nabayag dayta agtutubo a lalaki a nangkanunong iti bishopna adun a tawen ti naglabas. Naammuak a kinanunongan ti Apo ken dagiti tao isuna iti awagna a kas maysa a misionario, kas maysa a stake president, ken kas maysa nga ama. Kinunana bayat ti panaggibus ti saritaanmi, “Ikarkararaganka pay laeng iti inaldaw.”
Mabalintayo nga ikeddeng ti agkararag iti inaldaw para iti maysa a tao nga inawagan ti Dios tapno agserbi kadatayo. Mabalintayo ti agyaman iti maysa a tao a nangbendision kadatayo babaen ti panagserbina. Maikeddengtayo ti agtallugod no idawat ti maysa a tao a kinanunongantayo.1
Dagitay mangitandudo kadagiti katulongan ti Apo iti pagarianna ket matulongandanto babaen iti saan a maartapan a bilegna. Kasapulantayo amin dayta a bendision.
© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti First Presidency Message, June 2012. Ilokano. 10366 864
Panangisuro manipud iti Daytoy a Mensahe
Kalpasan a maibinglay daytoy a mensahe, ibilangyo ti panangbasa ti sumaganad nga adaw: “Ti Apo aramidennakayto a maysa a maysa a ramit kadagiti imana no napakumbaba, napudno, ken napasnekkayo. … Umawatkayto iti nayon a pigsa no makanunongankayo ti kongregasion ken mapasingkedan [set apart]” (Teaching, No Greater Call [1999], 20). Idawat iti pamilia a palawlawanda ti maysa a nadagsen a banag ket kiddawen iti maysa a tao a padasenna nga itag-ay daytoy. Mangnayon iti saggaysa a tao, mangawis kadagiti dadduma pay a miembro ti pamilia tapno tumulong a mangingato iti banag. Paglilinnawagan no ania ti mapasamak no agtitinnulong ti tunggal maysa. Ibilangyo ti panangyunay-unay iti balakad ni Presidente Eyring maipapan kadagiti maaramat a wagas a pakanunongantayo iti dadduma pay kadagiti awagda.