Mensahe iti Visiting Teaching, Hunio 2012
Visiting Teaching—Maysa a Sagrado a Naituding nga Aramiden
Sikakararag nga adalenyo daytoy a material ken, no mayannatup, ilawlawagyo daytoy kadagiti kakabsat a babbai a sarungkaranyo. Usarenyo dagiti saludsod a makatulong kadakayo a mangpapigsa kadagiti kakabsatyo a babbai ken tapno mangaramid iti Relief Society kas aktibo a paset ti bukodyo a biag.
Pammati, Pamilia, Tulong
Kas visiting teacher, addaantayo iti napateg a naespirituan a mision nga ipatungpal. “Ti bishop, nga isu ti naordenan a pastor ti ward, ket saanna a mabalin a maaywanan amin a karnero ti Apo nga aggigiddan. Agpannuray kadagiti naparegta a visiting teacher a mangtulong kenkuana.”1 Napateg unay ti panagkalikagum ken panangawat iti paltiing maipapan iti no asino ti matudingan a mangaywan iti tunggal kabsat a babai.
Mangrugi ti pammaregta bayat ti sikakararag a panaglilinnawag dagiti miembro ti panguluen ti Relief Society kadagiti kasapulan ti tunggal maysa ken dagiti pamilia. Kalpasanna, babaen iti pananganamong ti bishop, mangted ti panguluen ti Relief Society kadagiti naituding nga aramiden iti wagas a mangtulong kadagiti kabsat a babbai a maawatanda a ti visiting teaching ket maysa a napateg a naespirituan a pagrebbengan.2
Naimpusuan a maam-ammo ken ayaten dagiti visiting teacher ti tunggal kabsat a babai, tulongan isuna a mangpapigsa iti pammatina, ken mangted serbisio no kasapulan. Agsapulda iti personal a pammaregta tapno ammuen no kasano a masungbatan dagiti naespirituan ken naindagaan wenno temporal a kasapulan ti tunggal kabsat a babai a sarungkaranda.3
“Agbalin ti visiting teaching nga aramid ti Apo no dagiti tao ti ipamaysa wenno pokustayo imbes a dagiti porsiento. Iti kinapudnona, ti visiting teaching ket di kaano man aggibus. Daytoy ket ad-adda pay a wagas ti biag ngem iti maysa nga aramid.”4
Manipud kadagiti Nasantuan a Kasuratan
Manipud iti Pakasaritaantayo
Insuro ni Eliza R. Snow, ti maikadua a sapasap a presidente ti Relief Society, “Ibilangko ti takem ti maysa a mannursuro a nangato ken sagrado nga takem.” Binalakadanna dagiti visiting teacher “a mapnuanda koma iti Espiritu ti Dios, iti sirib, iti kinapakumbaba, iti ayat” sakbay a sarungkaranda dagiti pagtaengan tapno kabaelanda a masinunuo ken maited dagiti naespirituan a kasapulan kasta met dagiti temporal. Kinunana, “Mabalin a mariknayo a mangisao kadagiti balikas ti talna ken liwliwa, ket no makasarakkayo iti maysa a kabsat a babai a malamlammin, yasidegyo isuna iti barukongyo a kas iti aramidenyo iti maysa nga ubing iti barukongyo ket papudotan [isuna].”5
Bayat panagtultuloytayo a sipapammati kas iti inaramid dagiti nagkauna a kabsat a babbai a Relief Society, addanto kadatayo ti Espiritu Santo ket maparegta a mangammo no kasano a matulongan ti tunggal kabsat a babai a sarungkarantayo. “Agsapul[tayo] koma iti sirib imbes a bileg,” kinuna ni Sister Snow, “ket [datayo] maaddaanto iti amin a bileg [datayo] ket maaddaanto iti sirib nga aramaten.”6
© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti Visiting Teaching Message, June 2012. Ilokano. 10366 864