Poraus seni ewe Aewin Presetensi, June 2012
Kefinita me ren Kot o Etiwa me ren ekkewe Aramas
Fan chommong, kich chon Mwichefen sia angei ewe tingor ach sipwe etiwa aramas non wiser ne awora angang. Chommong ier ra no emon chon sukkun a 18 ierin a pwar ngeniei met wewen ach sipwe etiwa noun ewe Samon kewe chon angang. Ngang mi chuen feioch ren an nenien appiru mi tekison.
A keren poputani an aewin ier non college. A papatais kukkun seni eu ier me mwen a su seni nenian we pwe epwe poputani an kaeo non eu sukkun mi watte. Ngang mi angang ikkewe ia pwe an we pisop.
Nupwen a poputa ewe fansounen sukkun, ua wisen fori eu interfiu ngeni atewe non ewe ofesin pisop. Ese watte met ngang mi chechemeni usun am na aewin poraus fengen me nukun chok pwe a kapas usun weiresin kewe non eu neni mi fo, nge usap fokkun nemenano am we oruan poraus fengen.
A tingor an epwe churiei non ai we ofes. Ua oro ekkis mairu nupwen a era, “Kese mochen sipwe iotek fengen, iwe upwe wisen iotek?” Ita upwe era pwe ua fen iotek me ua ekieki pwe a fen pwan iotek. Nge ina mo ua chok tipeu ngeni.
A poputani an iotek ren eu kapasen pwarata pwe a sinei ewe pisop a kefinita me ren Kot. A tingor ngeni Kot an epwe ereniei met epwe fori non eu mettoch mi fokkun auchea non pekin ngun. Ewe anuon a ereni Kot pwe a nuku ewe pisop a fen sinei met mi namwot ngeni i iwe epwe angei ewe aurour mi namwot an epwe rongorong.
Nupwen a kakapas, ekkewe minen efeingaw epwe sapengeni ra pwa non tupuwei. Ewe aurour mi mecheres nge a pwapwano non fatafatoch: iotek fansoun meinisin, aneasochiki ekkewe annuk, me kosap niokus.
Ena anuon, a fen choni ewe Mwichefen ukukun eu chok ier, a aitiei seni an nenien appiru met Kot a tongeni fori ren emon souemwen nupwen a angei pochokun seni ewe nuku me iotekin ekkewe ir a kefinita ne emwenir. Ena anuon a pwarata ngeniei ewe manamanen ewe annukun ewe Mwichefen ne etiwa aramas non wiser kewe (nengeni D&C 26:2). Ina mo ewe Samon a kokori Noun kewe chon angang seni pwarata, ra chok tongeni mokutukut fan wiser mwirin ra etiwetiw me ren ekkewe ir ra angei ewe kokko ne angang ngenir.
Sia fori pwon mi pin, nupwen sia awora ach ututen etiwetiw. Sia pwon ach sipwe iotek fan asengesin ekkewe chon angangen ewe Samon pwe epwe emwenir me apochokunar (nengeni D&C 93:51). Sia pwon pwe sipwe kutta me mochen mefi pwarata seni Kot non ar kapasen aurour me inet chok ra mokutukut fan wiser (nengeni D&C 1:38).
Mi namwot ach sipwe asofo sefanni ena pwon non netipach fan tepetep. Noum we sensen Sukunen Raninfel epwe achocho ne aituk fan emwenien ewe Ngun mi Fel, nge usun chok kopwe pwan fori, meni Noum we sense epwe mwanino fan ekkoch me mwen chon ewe klas. Nge, kopwe pwisin finata pwe kopwe rongorong me kutta ekkewe atun nupwen ka tongeni mefi feiton pwarata. Mwirin fitu fansoun kopwe kuna pwe a kukkuneno an kewe mwanino me a chommongono ekkewe minen pwarata pwe Kot mi apochokuna ena sense.
Nupwen sia etieta pouch ne etiwa emon aramas, sia pwon ach sipwe angang fan iten met chok popun ewe Samon ena emon a koko an epwe apwonueta. Nupwen noum kewe semirit ra kukkun, punuei we a koko ngeni an epwe aiti ekkewe kukkun semirit non am we wart. Use chok etieta pei ne etiwa i, nge ua pwan iotek fan asengesin me ua tingor mutatan ai upwe pwisin anisi i. Ekkewe nesen ua angei usun kinisou fan iten met ekkewe fefin ra fori me usun tongen ewe Samon ngeni semirit mi chuen efeiochu ai famini me pwisin manauei.
Ekiseno chok ua kapas ngeni ena anuon ewe a etiwa noun we pisop me nom. Ua kaeo pwe ewe Samon me ekkewe aramas ra etiwa i non wisan usun emon misineri, emon presetenin steik, me emon sam. Nesoponon am poraus fengen a era, “Ngang mi chuen iotek fan asengesum iteiten ran.”
Sia tongeni finata ach sipwe iotek iteiten ran fan asengesin emon a koko me ren Kot ne angang ngeni kich. Sia tongeni kinisou ngeni emon a efeiochu kich seni an angang. Sia tongeni finata pwe sipwe uta nupwen emon sia fen etiwa a tingor ren chon aninis.1
Ekkewe ir ra apochokuna ekkewe chon angangen ewe Samon non Mun we repwe pwan angei pochokun seni An manaman esemuch. Ena feioch mi namwot ngeni kich meinisin.
© 2012 seni Intellectual Reserve, Inc. Meinisin pung mi kawor. A for non Merika. Kapungunon non fosun Merika: 6/11. Kapungunon chiakun: 6/11. Chiakun ewe First Presidency Message, June 2012. Chuukese. 10366 901
Afanafan seni Ei Poraus
Mwirin ka aporausa ei poraus, kopwe ekieki ika mi och om kopwe anneani ekkei kapas: ‟Ewe Samon epwe foruk pwe kopwe eu pisekin aninis non Poun kewe ika ka tipetekison, nukuchar, me akachocho. … Kopwe angei napenon pochokun nupwen ka seikita me chon mwichefen ra etiwok” (Teaching, No Greater Call [1999], 20). Kopwe tingor chon ewe famini ar repwe kepwennieno eu men mi kon chou me tingor emon chok an epwe achocho ne keki. Kopwe kapachenong aninisin pwan emon, tori unusen chon famini ra chufengen ne keki ewe men. Oupwe poraus fengen usun met a fis nupwen meinisin ra aninis fengen. Kopwe ekieki ika mi och om kopwe esisinata an Preseten Eyring aurour usun ekkewe napanap mi och ach sipwe etiwa aramas non wiser kewe.