2012
Vizit nan fwaye, yon tach sakre
jen 2012

Mesaj vizit nan fwaye, Jen 2012

Vizit nan fwaye—yon tach sakre

Etidye materyèl sa a nan lapriyè epi, si sa apwopriye, diskite li avèk sè w ap vizite yo.Itilize kesyon yo pou ede ou fòtifye sè ou yo epi fè Sosyete Sekou jwe yon wòl aktif nan lavi pa ou.

So Sosyete Sekou a

Lafwa, Fanmi, Sekou

Antanke enstriktris nan fwaye, nou gen yon misyon espirityèl enpòtan pou n akonpli. “Evèk la, ki se bèje òdone pawas la, pa ka posibman veye sou tout mouton Senyè a yo poukont li. Li depann sou enstriktè nan fwaye enspire pou ede li.”1 Chèche ak resevwa revelasyon pou konnen kimoun pou asiyen pou veye sou chak sè se yon bagay esansyèl.

Enspirasyon an kòmanse lè manm prezidans Sosyete Sekou yo diskite sou bezwen chak moun ak fanmi yo nan espri lapriyè. Epi, avèk apwobasyon evèk la, prezidans Sosyete Sekou a bay tach nan yon fason k ap ede sè yo konprann ke vizit nan fwaye se yon responsablite espirityèl enpòtan.2

Enstriktris nan fwaye yo sensèman vin konnen ak renmen chak sè, ede yo fòtifye lafwa yo, epi bay sèvis lè gen bezwen. Yo chèche enspirasyon pèsonèl pou konnen kijan pou reponn ak bezwen espirityèl ak tanporèl chak sè yo vizite.3

“Vizit nan fwaye vin tounen travay Senyè a lè nou fokis sou moun yo olye de pousantaj. An reyalite, vizit nan fwaye pa janm fini. Li se plis yon fason pou viv pase yon tach.”4

Apati ekriti yo

Matye 22:36–40; Jan 13:34–35; Alma 37:6–7

Apati Istwa Nou

Eliza R. Snow, dezyèm prezidant jeneral Sosyete Sekou a te anseye: “Mwen konsidere travay yon enstriktris kòm yon ofis elve ak sakre.” Li te konseye enstriktris nan fwaye yo “pou yo ranpli avèk Lespri Bondye, ak sajès, imilite, lanmou” anvan y al vizite kay moun yo pou yo ta kapab konnen ak reponn ak bezwen espirityèl osibyen tanporèl moun yo. Li te di: “Nou gen dwa santi pou nou pale pawòl lapè ak rekonfò, epi si nou jwenn yon sè ki santi l frèt, pran l sou kè nou jan nou t ap fè pou yon pitit pa nou epi rechofe li.”5

Pandan n ap avanse nan lafwa jan premye sè Sosyete Sekou yo te fè a, n ap gen Sentespri a avèk nou epi n ap jwenn enspirasyon pou konnen kijan pou ede chak sè n ap vizite. Sè Snow di: “An [nou] chèche sajès olye de pouvwa, epi [n] ap jwenn tout pouvwa [nou] gen sajès pou n egzèse.”6

© 2012 pa Intellectual Reserve, Inc. Tout dwa rezève. Enprime nan Etazini Damerik. Apwobasyon angle: 6/11. Apwobasyon tradiksyon: 6/11. Tradiksyon Visiting Teaching Message, June 2012. Haitian Creole. 10366 036

Nòt

  1. Julie B. Beck, “Relief Society: A Sacred Work,” Liahona, Nov. 2009, 114.

  2. Gade Manuel 2: Administration de l’Église (2010), 9.5; 9.5.2.

  3. Gade Manuel 2, 9.5.1.

  4. Julie B. Beck, Liahona, Nov. 2009, 114.

  5. Eliza R. Snow, nan Daughters in My Kingdom: The History and Work of Relief Society (2011), 108.

  6. Eliza R. Snow, nan Daughters in My Kingdom, 45–46.

Kisa m Ka Fè?

  1. Kijan m ka amelyore nan kapasite m pou akonpli responsablite enpòtan mwen antanke enstriktris nan fwaye?

  2. Antanke enstriktris nan fwaye, kijan m ka ede lòt sè yo ranpli responsablite yo kòm enstriktris nan fwaye?