2012
Mus Saib Xyuas tom Tsev, ib txoj Hauj Lwm Dawb Ceev
Rau Hli Ntuj 2012

Cov Mus Saib Xyuas tom Tsev tsab Xov, Rau Hli Ntuj 2012

Mus Saib Xyuas tom Tsev—ib txoj Hauj Lwm Dawb Ceev

Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej.

Daim Duab
lub cim rau lub Koom Haum Niam Tsev

Kev Ntseeg, Tsev Neeg, Kev Pab

Vim peb yog cov uas mus saib xyuas tom tsev, peb muaj ib lub luag hauj lwm ntawm sab ntsuj plig tseem ceeb ua. “Tus npis sov, uas yog tus tswv yug yaj ntawm ib pawg ntseeg, saib tsis tau txhua tus ntawm tus Tswv cov yaj txhua lub sij hawm. Nws cia siab rau cov mus saib xyuas tom tsev kom pab nws.”1 Yuav tsum nrhiav thiab txais kev tshwm sim kom paub yuav txib leej twg mus saib txhua tus viv ncaus.

Yuav pib muaj kev tshoov siab thaum cov mej zeej ntawm lub Koom Haum Niam Tsev pawg thawj tswj hwm thov Vajtswv thiab sib tham txog tej yam uas txhua tus neeg thiab lawv tsev neeg xav tau. Ces, nrog tus npis sov txoj kev pom zoo, lub Koom Haum Niam Tsev pawg thawj tswj hwm txib cov viv ncaus mus thiab pab lawv to taub tias kev saib xyuas tom tsev yog ib qho kev lav ris ntawm sab ntsuj plig uas tseem ceeb.2

Cov neeg mus saib xyuas tom tsev paub thiab hlub txhua tus viv ncaus, pab nws txhawb nws txoj kev ntseeg lub dag zog, thiab pab nws thaum nws xav tau. Lawv nrhiav kom txais kev tshoov siab uas paub ua li cas rau tej kev xav tau ntawm sab ntsuj plig thiab sab nqaij daim tawv rau txhua tus viv ncaus uas lawv mus xyuas.3

“Kev saib xyuas tom tsev yog tus Tsev tej hauj lwm thaum peb tsom ntsoov rau tib neeg thiab tsis xav txog tau mus xyuas neeg npaum li cas. Tiag tiag, kev mus saib xyuas tom tsev yog ib txoj hauj lwm uas ua tsis tau tiav. Yog zoo li ib txoj kev ua neej tsis yog ib txoj hauj lwm.”4

Los ntawm cov Vaj Lug Kub

Mathais 22:36–40; Yauhas 13:34–35; Amas 37:6–7

Los ntawm Peb zaj Keeb Kwm

Eliza R. Snow, lub Koom Haum Niam Tsev tus tuam thawj tswj hwm thib ob, tau qhia hais tias: “Kuv xav tias txoj hauj lwm ua ib tug kws qhia yog ib txoj hauj lwm uas siab thiab dawb huv.” Nws ntuas cov neeg uas mus saib xyuas tom tsev kom lawv “muaj Vajtswv tus Ntsuj Plig, muaj tswv yim, ua siab mos siab muag, thiab muaj kev hlub puv npo” ua ntej lawv mus xyuas lwm tus kom lawv yuav txawj paub txog thiab ua tej yam uas lwm tus xav tau ntawm sab ntsuj plig, tsis yog ntawm sab cev nqaij daim tawv xwb. Nws hais tias, “Tej zaum nej yuav xav hais lus txog kev kaj siab lug thiab nplij nws lub siab thiab yog nej nrhiav tau ib tug viv ncaus uas txias heev, muab nws puag rau hauv koj lub xub ntiag ib yam li ib tug me nyuam yaus thiab ua rau nws sov sov.”5

Thaum peb muaj kev ntseeg mus tom ntej ib yam li cov viv ncaus hauv lub Koom Haum Niam Tsev yav dhau los tau ua, peb yuav muaj tus Vaj Ntsuj Plig Dawb Huv nrog peb nyob thiab yuav tau kev tshoov siab pab peb paub pab txhua tus viv ncaus uas peb mus xyuas. Viv Ncaus Snow hais tias, “Hais kom lawv nrhiav tswv yim, tsis nrhiav lub hwj chim, ces lawv yuav muaj tag nrho tej lub hwj chim uas lawv muaj peev xwm siv.”6

© 2012 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11. Kev txhais Visiting Teaching Message, June 2012. Hmong. 10366 295

Lus Cim

  1. Julie B. Beck, “Relief Society: A Sacred Work,” Liahona, Kaum Ib Hlis Ntuj 2009, 114.

  2. Saib Handbook 2: Administering the Church (2010), 9.5; 9.5.2.

  3. Saib Handbook 2, 9.5.1.

  4. Julie B. Beck, Liahona, Kaum Ib Hlis Ntuj 2009, 114.

  5. Eliza R. Snow, hauv Daughters in My Kingdom: The History and Work of Relief Society (2011), 108.

  6. Eliza R. Snow, hauv Daughters in My Kingdom, 45–46.

Luam