Lamharon

Sa Tunga-tunga sang Imo Paghanda para sa Misyon

Si Pangulong Uchtdorf nagahambal sa mga misyonero sa pagpanumdum sang ila mga kaugalingon nga yara sa tunga-tunga sang ila misyon. Mahimo mo man magamit ini nga ideya sa imo paghanda para sa misyon: bisan man12 ukon 18 katuig ang imo pangidaron, sarang ka maghanda sa pag-alagad sa misyon.

Ano ang pila ka mga butang nga sarang mo mahimo “sa tunga-tunga” sang imo paghanda sa misyon?

Mangin takos pirme sa pagsulod sa templo.
Magtuon sa pagkilala sang mga inspirasyon gikan sa Balaan nga Espiritu paagi sa pagsulat sang mga inspirasyon nga imo nabaton kag sa paghimo sang mga ini.
Magpangamuyo para sa mga misyonero.
Magpamangkot sa mga misyonero sa imo lugar kon ano ang ginapanugyan nila nga imo himuon agud maghanda sa pag-alagad sa misyon.
Magtuon sa pagdumala sang imo panahon sing maayo, kalakip na ang importante nga mga kahiwatan subong sang pag-alagad, pagtuon sang balaan nga mga kasulatan, kag pagsulat sa journal.
Kon nagapakigsugilanon sa isa ka miyembro sang pamilya, magpaambit sang balaan nga kasulatan nga naghatag inspirasyon sa imo sang sini lang. Ipaathag kon ano ang imo ginapamensar parte sini nga balaan nga kasulatan.
Magpamangkot sa imo mga abyan parte sa ila mga relihiyon kag kon ano ang ila ginapatihan. Mangin handa sa pagpaambit sang imo mga ginapatihan. Agdaha sila sa simbahan ukon sa mga kahiwatan.

Sa imo pagkilala nga yara ka sa tung-tunga sang imo paghanda para sa misyon, mahimo ka magkabuhi agud mangin mas takos sa pagsalig sang Ginuo kag sa pagpakig-upod sang Espiritu.