Mensahe sa Visiting Teaching, Hulyo 2012

Pagpakita sang Aton Pagkadisipulo paagi sa Pagpalangga kag Pag-alagad

Tun-i ining materyal sing mainampuon kag, kon nagakabagay, hambali ini upod sang mga sisters nga inyo ginabisita.Gamita ang mga pamangkot agud buligan kamo sa pagpabakod sang inyo mga sisters kag himuon ang Relief Society nga aktibo nga bahin sang inyo mismo kabuhi.

Pagtuo, Pamilya, Bulig

Sa bug-os Niya nga kabuhi sa duta, si Jesucristo nagpakita sang Iya pagpalangga para sa iban paagi sa pag-alagad sa ila. Sia nagsiling, “Sa sini ang tanan nga tawo makahibalo nga kamo mga gintutun-an ko, kon maghigugmaanay kamo” (Juan 13:35). Ginpahamtang Niya ang ehemplo kag luyag nga kita “magatabang sadtong nagakinahanglan sang [aton] panabang” (Mosias 4:16). Ginatawag Niya ang Iya mga disipulo nga mag-obra upod sa Iya sa Iya pag-alagad, nga ginahatagan sila sang kahigayunan nga mag-alagad sa iban kag mangin pareho sa Iya.¹

Ang aton pag-alagad bilang mga visiting teachers mangin kasubong sang pag-alagad sang aton Manluluwas kon aton ginapakita ang aton pagpalangga para sadtong aton ginabisitahan (agud magtudlo) paagi sa paghimo sang mga masunod:²

Dumdumon ang ila mga ngalan kag ang mga ngalan sang mga miyembro sang ila pamilya kag pangilalahon sila.
Palanggaon sila nga wala sila ginahusgahan.
Bantayan sila kag pabakuron ang ila pagtuo sing “tinag-isa-isa,” pareho sang ginhimo sang Manluluwas (3 Nefi 11:15).
Sugdan ang sinsero nga pagpakig-abyan sa ila kag bisitahan sila sa ila mga puluy-an kag sa iban nga lugar.
Mag-ulikid sa tagsa ka sister. Dumdumon ang mga kaadlawan, mga graduation, mga kasal, mga bunyag, ukon iban pa nga mga okasyon nga makahulugan sa iya.
Magtanyag sang bulig kag pagsakdag sa bag-o kag indi-tuman kaaktibo nga mga miyembro.
Magtanyag sang bulig kag pagsakdag sa mga ginasubuan ukon sadtong mga nagakinahanglan sang pagpasulhay.

Gikan sa Balaan nga mga Kasulatan

3 Nefi 11; Moroni 6:4; Doctrine and Covenants 20:47

Gikan sa Aton Kasaysayan

“Ang Bag-ong Katipan nagalakip sang mga kasaysayan sang mga babayi, nahingadlan kag wala, nga nagpakita sang pagtuo kay Jesucristo.” … Ining mga babayi nangin dalayawon nga mga disipulo. …[Sila] nagpanglakaton upod kay Jesus kag Iya Dose ka mga Apostoles. Naghatag sila sang kon ano nga may yara sila agud makabulig sa Iya pag-alagad. Pagkatapos sang Iya kamatayon kag Pagkabanhaw, [sila] nagpadayon nga mangin matutom nga mga disipulo.”³

Si Pablo nagsulat parte sa isa ka babayi nga ginkilala sa ngalan nga Febe, nga isa ka “alagad sang simbahan” (Mga Taga-Roma 16:1). Ginpangabay niya ang mga tawo nga “buligan sia sa bisan ano nga may kinahanglan sia sa inyo: kay sia gid mabinuligon sa madamo” (Mga Taga-Roma 16:2). “Ang sahi sang pag-alagad nga ginhatag ni Febe kag iban pa nga dalayawon nga mga babayi sa Bag-ong Katipan nagapadayon sa karon paagi sa mga miyembro sang Relief Society—mga lider, mga visiting teachers, mga iloy, kag iban pa—nga nagahikot bilang mga manugtabang, ukon manugbulig sang madamo.”⁴

© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang Visiting Teaching Message, July 2012. Hiligaynon. 10367 861

Ano ang Sarang Ko Mahimo?

Paano ko ginadugangan ang akon ikasarang sa pagsapupo sa iban?
Ano ang akon ginahimo agud maseguro nga ang mga sisters nga akon ginabantayan nakahibalo nga palangga ko sila?