Pweng sin Prestuhnsi Se Met, Julahe 2012
Pacl nuh kwewa ke Infulwac
Sin kacluhntucr puhs facluh, Julahe akihlenyac infulwen yac se. Ke mutwacwacyac ac sahflahiyacn kuhtuh ma ahkfuhlwactyeyuck ac esamyucki uh, infulwen kuhtuh ma uh wacna tiac akihlenyuck.
Mutwacwacyac uh pa pacl luhn ayaol nuhnak, orwaclah plwacn, sang kuhiyom nohfohn. Sahflahiyac an pa pacl luhn kahkahsrihki ac kuh in oasr puhlakihn fal kuh wacngihnlac. Tuhsruhk ke ngwetngwet pacl wo, motkwe kuht in pa ke infulwacn kuhtuh ma kuh in kahsrwe kuht in tiac kahlwemwack muhkwena ke kuhtuh moul uh tuhsruhk oacyacpac in moulkihn in oasr kalmac.
Infulwen Orekma luhn Misineri
Ke nga sramsram nuh sin misineri fuhsr lasr an, nga wacna fahk nuh selos muh elos oasr ke infulwen orekma lalos an. Lah elos tuhfahna ai ke lwen met ah kuh e oacyak som nuh acn selos ke lwen tohkoh an, nga siyuck selos in nuhnkuh kaclos sifacna tuh elos oasr infulwac pacl nuh kwewa.
Misineri sasuc an sahp puhla muh elos suhpah in kuh in orwaclah pwacye ma kunaclos, ac na elos tohllah in sramsram kuh mukwikwi ke luhlahlfongi ac puhlaik. Misineri ke puhlan pacl uh suc apkuhran in ahksahfyelah misin lalos uh sahp suhpwacr ke misin lalos uh apkuhran in sahflah, kuh sahp elos kahkahsrihki ke elos motko lah meac elos e oruh ke sahflah misin lalos uh.
Finne ke ohiyac la kuh acn elos kuhlwacnsap we an, ma pwacye an pa misineri luhn Leum pa mwet tahknwelihk fihtacn ma wolacna lwen nuh kwewa. Nuhnkuh kaclos sifacna tuh elos oasr infulwen misin lalos pacl nuh kwewa fah ahkpuhlaik ac ahkkweye mwet tuhtahf luhlahlfongi kuh luhn Leum. Ke oasr yurin misineri fohnlah pacl la an, oacyacpac oasr yohrohsr kwewa.
Kuht Oasr Infulwac Pacl nuh Kwewa
Eklac luhn srihpac kuh ngwetngwet sacn yohk kuhtuh liki ma fihsrwacsr ahktahfongyelah ke nuhnak uh. Oasr ma suwohswohs na pwacye se ke nuhnak se suc pa kuht oasr infulwac pacl nuh kwewa. Kuht fin liye acn kuht oasr we ke macp uh, kuht sruhflah in fahk lah kuht oasr ke sie muhtwacwacack an. Kuht fin lohacng ahkwoye, oacna sie acn kuht oasr we an tuh kuht oasr na infulwen acn na luhlahp se.
Na oacna ke acn oaloal se, pa pac na ke pacl uh. Sahp kuht puhla muh kuht oasr ke muhtwacwacyacn kuh sahflahiyacn moul lasr uh, tuhsruhk ke kuht ngwetlah liye lah kuht oasr oyac ke akwuck nuh ke moul ma pahtpaht an—ke kuht akihlen lah nguhnasr oasr ke pacl na loes suc kuht tiac kuh in srihkeyac ac, ke srihpen kihsac sacohk ac Iwaclah luhn Jisus Kraist, tuh nguhnasr fah oan ma pahtpaht—kuht kuh in akihlen lah pwacye na lah kuht oasr infulwac.
Ke pacl na fototo somlah ah nga tuh arulacna pwacr in ahkwoye yot ke kuclyuck luhn pahpah ac ninac kiyuck ah. Pacl uh tiac kuhlwacng nuh sin kuclyuck ah, ac nga puhla tuh yot in kuclyuck se e arulacna fal nuh ke moul askuh lalos an. Ke nga tuni lwen isuslac ac lwen misac ke yot in kuclyuck sac kapsreniyucki ke kihtin lain fototo, kihtin akucl se ke lusen moul se kihtin pacl ah na koanwelah sifuck ac insiyuck ke mwe acsmakihn puhs ac kahsruhp. Kais sie mwe acsmakihn sacohk inge fahkwack pacl se infulwen moul luhn ninac kiyuck kuh pahpah tuhmuhk ac ke infulwen moul luhk.
Oacna sie matwac, oacna sie acn kuht oasr we, ke ma uh sikyak in moul lasr uh, pacl nuh kwewa kuht oasr infulwac. Meac pac sahyac, ne tok ma pahtpaht kuht fah oasr infulwac.
Mwe Finsrak nuh ke Oasr Infulwac
Ahok, fah oasr pacl luhn srihmetwack ac pacl luhn sahflah ke lusen moul lasr uh, tuhsruhktuh ma inge akucl muhkwefanna ke infulwac yohk ke moul ma pahtpaht lasr uh. Lah kuht oasr ke muhtwacwacyac kuh sahflahiyac, lah kuht mahtohoh kuh fuhsr, Leum El kuh in orekmakihn kuht nuh ke srihpac Lal kuht fin fihliyac oacna sie nuhnak lasr suc sikucl kuhiyacsr in kuhlwacnsap ac lwelah kena Lal in ahkwoye moul lasr uh.
Puk luhn Psalm fahk, “Pa inge lwen se Leum El orwaclah, [enenuh] kuht in engan ac ahkfuhlwactye” (Psalm 118:24). Amulek el ahkacsmakihnye kuht lah moul se inge pacl luhn mwet uh in ahkoo in ohsun yurin God; lwen se ke moul se inge pa lwen se luhn mwet uh in oruh orekma lalos (liye Alma 34:32). Mwet sihm poem se el nuhnkuh, “Ma pahtpaht—oreklac ke Ma Mihsenge an.”1
Oasr infulwac pacl nuh kwewa kalmac pa soenna sahflah sritacl sac, finsrak uh tiacna wacngihnlac, kuf uh soenna kahlwem. Ke tiac elyah lah kuht oasr oyac kuh ohiyac kuht oasr kac, muhtwacwacack se nuh ke ma pahtpaht ac sahflah se oasr ye muhtahsr.
Kuht oasr infulwac pacl e nuh kwewa.
© 2012 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/11. Ahkkweyeyucklac ke lweng: 6/11. Lwenglah luhn First Presidency Message, July 2012. Kosraean. 10367 868
Luti Pweng Se Inge
Motko in sramsramkihn nuh sin sucu lah fuhkah elos oasr “infulwac pacl nuh kwewa,” finne elos oasr ke muhtwacwacyac kuh sahflahiyacn ma se. ahkkweyaclos in oruh kuhiyaclos ke mukwikwi lalos pacl inge an, tiac epacl nuh ke ma somlah kuh tuhpan mukwikwi kuh orekma fahsruh uh. Sahp kowos luhngse ngihsre elos in sulwaclah sie ma elos kuh in oruh ah oacna sucu se in orekmakihn kahsruh se inge ac orwaclah sie lwen ma elos finsrak in oreklac enenuh lalos an.