Klumech er a First Presidency, Ongeuid el buil 2012
Blechoel el ngar er a Melengel
Oumesingd el kalender er a beluulechad, e a Ongeuid el buil a uai a lolechotel a melengel a rak. Meng blechoel ikel tekoi el ngar er a uchelel me a ulebengelel a doldeu e dobedebek, eng di aikel ngar er a melengel a diak desal mtab.
A uchelel a blechoel taem el doruul a beches el moktek, beches el uldaso, el ochotii a klisiched. A ulebengelel a taem el bo dechelellakl e omtab aike el milkedmokl malechub a kuk mlo diak el mekedmokl. Eng di sel bo dungil lomes, e domtab er kid el ngar er a melengel a tekoi e ng sebechel ngosukid el diak di bo dungil mtebengii a klengar ke de dirrek el mo telkib el smisichii a belkul a klengar el de kiei er ngii.
Melengel a Ureor er a Misionari
Se el kungedecheduch er tir ka el ngeasek el misionari er kid, e ak blechoel el kmu er tir el kmo te ngar er a melengel a urerir. Me a le dirk le kilerd malechub a lorolung el mo remei, e ak blechoel kmu er tir me lomdasu el kmo te dirk ngar er a melengel.
A rebeches el misionari a locha mo omelchesiu er tir el metitur e diak a ngera el lodengei, me te meoud el mo meduch el oureor loba klaumerang er tir me a blak el reng. A re mla mo meduch el misionari el mochu er a ulebongel er a urerir a locha mo omelchesiu el mekngit a rengir el mocha merek er a rurerir, malechub e te kuk ko er a mo telkib el soro el omdasu el kmo ngera te mo meruul e ruriul er a bol merek er a mision.
Me ng chelsel a ngii di el teletael me a ngii di el basio le ngar ngii, e a mera er ngii a remisionari er a Rubak a melalem a diak el mochur el tane er a klungiaol er a bek el sils. Me se el uldesuir el kmo te dirk ngar er a melengel a mision er tir a mo smisicheterir tirka el mui er a klaumerang el omtechei er a Rubak. Me tia uaisei el mo er a recherungel el misionari, e dirrek el osisisu el me er kid el rokui.
Kid a Blechoel el ngar er a Melengel
Tia el ngeldechel osenged er a tekoi a diak el ko er a di bedikl el ngara uldesued. Ngar er ngii a mesisiich el klemerang er a chelsel tia el uldasu el kmo kid a blechoel ngar er a melengel. Omko ke de omes er se el dengarngii er a map, e kede blechoel soad el kmu el kmo ke de ngar er a uchelel. E ng di omko ke de kmal mo ungil omes, e kid a ngar er a belngel a klou el basio.
Me ng uaisei er a basio, e dirrek el osisiu er a taem. Ke de locha mo omelchesiu er kid el ngar er a uchelel malechub a ulebengelel a klengar kid, e ng di se el domekesiu er chelechang me a diak a ulebengelel—se el bo dodengei el kmo a delbenged a di mla ngar er a chelsel a rokui el taem el diak a telkelel me a, dirrek el ongarm me a Tngakireng er a Jesus Kristo a uchul, e a bedenged a mo melemolem el ngar el mo er a diak a ulebengelel—eng sebeched el mo mtebengii el kmo kid a mera el ngar er a melengel a klengar.
A kmal dirk liluut el mo meruul er a bdangch er a olekellel a delak me a demak. Ng ko er a dikea el ungil osenged er a maori er tia el debull, me ak mlo omelchesiu el kmo a beches el bdangch a mo olchotel a ungil okesiu er a klengar er tir. Se el kumes aika el llechukl el sils er a cherellir me a kodellir er tia el bdangch lobengkel a mekekerei el locha diak a kmal belkul el dimech, e tia el uai a le kekerei el olangch er a klengar a mekekii a uldesuek me a renguk er a betok el ungil tekoi me a teletael. A bek el uldesuek er tir a mekletkak er a melengel a klengar er a demak me a delak me a dirrek el melengel a klengar ngak.
Me ng diak el iior er a rekid, basio el dengarngii, e a teletael se el dubech er a klengar kid, e ke de blechoel ngar er a melengel. Ng belkul a kmo, kid a di ngar er a melengel el mo er a ulebongel.
Se el Urunguled el Ngar er a Melengel
Choi, ng mo er ngii a taem er a uchelel me a taem er a ulebongel er a klengar kid, e ng di aika a kmal di olangch er tia el melengel a diak a ulebengelel klengar kid. Me a de ngar er a uchelel malechub eng melengel, a de ngeasek malechub e de chuodel, e a Rubak a sebechel ousbech er kid el kirel a moktek er Ngii alsekum eng sebeched el mo mechei aikel uldasu el tomer er kid er a techelled el mesiou e kongei er Ngii meng mesmechokl a klengar kid.
A Psalm a kmo, “Tial sils a le bilskid a Rubak” mei [me] doldeu a rengud er ngii el sils” (Psalm 118:24). A Amulek a omeklatk er kid el kmo “le tiaikid el klengar a belsechel kirir a rechad el mengedmokl er tir el mo omes er a Dios; Choi, ng uaisei a kebesengil tia el klengar a belsechel kirir a rechad el meruul a urerir” (Alma 34:32; smisichii a belkul). A chad er a omeluches a kmo, “Forever—is composed of Nows.”1
Me se el de blechoel ngar er a melengel e ng belkul a kmo a klekool a diak el merekui, a urunguled a diak el riid, me a mo mesisiich a diak el lulebongel. Meng diak el iior er sel dengarngii malechub e ng teletael el kid a ngar er a chelsel, e le a diak a ulebengelel uchelel me a diak a ulebengelel ulebongel a medechel er medad.
Kid a blechoel el ngar er a melengel.
© 2012 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/11. Kengei er a oidel: 6/11. Oidel a First Presidency Message, July 2012. Palauan. 10367 881
Osischeklel Tia el Klumech
Momdasu a mo mesaod lobengkel a telungalek el kmo te mekerang e “blechoel ngar er a melengel,” el uldimukl alsekum te dirk ngar er a uchelel malechub a ulebengelel a kmo ngerang. Molisiich er tir el mor sel tkul er bab el sebecherir er se el kmo ngerang el loruul er ngii er chelechang, el diak el omdasu er chelii malechub e longiil el kirel a kuk ta er a tekoi. Ng sebechem el kmu er tir me lengiltii a ta el tekoi el bo loruul er ngii el telungalek el mo otireklii tia el llach el tetkii a sils el tir a mo kudmeklii a moktek er tir.