Mulwol ko Bin Somm’on e Presidency, July 2012
Gubin ngiyal’ ma bay u Lukngun
Ko urngin e calender u fayleng, ma July e kan mark nag ni bin lukngun ko fare duw. Tabolngin nge tomuren ko pin’en e yima madnam nag ma yima lem nag, lukngun pin’en e baga’ nima yaen ni dani ma na’ab.
Tablongin e ngiyal’ nifan e pi magawon ni ngan pithig, pi tunom ni ngan ngongliy, nifan gelngiy nib alamrin. Tomuren e ngiyal’ nikan aw nga but ma ra un e pi thomthom ko n’en nike thap fake chuw. Machane ko rogon e sap nib man gil rogon, ni gadad be tay gadad u lukngun e pin’en ni rayog ni nge ayuweg dad ni gathi kemus ni ngan nang fan boch’uw mornga’agen e yafas machane man paer u fithik nib mangil rogon.
Bin Lukngun ko Murwel ko Tamachib
Napan ni gu non ko pi tamachib rodad ni fel’ yangren, ma baga’ ni guma yoeg ngorad ni yaed bay u lukngun e pi mission rorad. Demtrug ko kafin ritaw gaed ko rran um’on fa bani ngar suloed nga tafen raed ko tomuren, mug goeg ngorad ni ngar leam niged giyad ni gubin ngiyal’ ni yaed bay u lukngun.
Pi tamachib nib bi’ech e yaed ra thamiy ni dar cheg gaed, ere darma non gaed fa ri mithmith gaed u fithik e athamgil. Pi tamachib ni yaed be cheg nag ni ke chuchgur ni ngar mu’ gaed ko mission rorad e yad ra kirbaen’ ni ke chuchgur ni nge m’ay e mission rorad, fa ri sag’al gaed ni ran ga’ar e yaed be leam nag ko mang e ngar rrin’ed ko tomuren e mission rorad.
Demtrug ko mang e magawon nge gin ni yaed be pigpig riy, ma n’en nib riyul’ e pi tamachib rok Somoel e gubin ngiyal’ ma yaed e pi owoch ni dabyog i tha’eg ko pin’en nib mangil. Gubin ngiyal’ ma yaed be leam ni yaed bay u lukngun e mission rorad e ra athamgil nag raed me gel nag e pi tapigpig rok Somoel. Ni boed rogon ko pi full-time missionary, boed ni aramrogon ngodad ni gubin.
Gubin Ngiyal’ ma gadad bay u Lukngun
Rogon e biney e sap nike thil e ba thil ko rogon e tafney. Bay e n’en nib riyul’ nib falel’ u foen e tafney ni gubin ngiyal’ ma gadad bay u lukngun. Fa’anra gadad ra sap ko gin ni gadad bay riy u dakean e meap, ma yugma yib ngodad ni gadad ba’adag ni ngad yoeged ni gadad bay ko tabolngin. Machane fa’anra gadad ra sap nib fal’ rogon, ni demtrug e gin ni gadad bay riy ma gadad bay u lukngun bang nib ga’.
Ni boed rogon ko thilin, ku aramrogon ko taym. Gadad ra thamiy ni gadad bay ko tabolngin fa tomuren e yafas rodad, machane napan ni gadad ra sap ko gin ni gadad bay riy ko tomur ko manechubog—napan ni kad na’ab gaed ni kan thothup rodad e bay nib gel ko tin ni gadad ba cheg riy ma, bachane miligach nge Bayul rok Yesus Kristus, ma ya’al rodad e bay ni fan ko manechubog ni nge yib—ni rayog ni ngad poeyed ni riyul’ ni gadad bay u lukngun.
Fin chiney mug thamiy ni gu ba adag ni ngug ngongliy biyay e malang ko galabthir rog. Ngiyal’ e dawori gol ko gin ni bay e taliw riy, ma ku thamiy ni ra malang nem nib be’ech e ra fal’ ko rogon e pin’en ni kar rrinn’ew u lane yafas rorow. Napan ni gu sap ko rran nni gargaleg row nge rran nni rom’ow u dakean fare malang nib peth ko buchi ban’en nike tar, chi pow ko yafas e yib ko tafney rog nge lan gumircha’eg nib sug ko pin’en ni buch kab kafram. Ra reb ko pi tafney ney ma be aw ko ngiyal’ u lukngun e yafas rok e galabthir rog nge lukngun e yafas rog.
Demtrug yangren dad, ma demtrug e gin ni gadad bay riy, ma napan ni ra buch ban’en u lane yafas rodad, ma gubin ngiyal’ ma gadad bay u lukngun. Boech ni kubay, gadad bay u lukngun nib manemus.
Fare Athap ni Yibay u Lukngun
Arragon, bay e ngiyal’ ko tabolngin nge ngiyal’ ko tomuren u lane yafas rodad, machane kemus ni pi mark ney nibay ko kanawo’ ko fare bin lukngun u lane yafas rodad nib manemus. Demtrug ko gadad bay ko tabolngin fa tomuren, demtrug ko fal’ yangren dad fa kan labthir, ma rayog ni nge murwel Somoel ngodad ni fan ko pi murwel Rok fa’anra gadad ra tay e pi tafney rodad ni ngad serv niged ma gadad pag e tirok ni nge fal’eg rogon e yafas rodad.
Ke ga’ar fare Psalmist, “Re rran nem e reb e rran nrib fel’ nike ngongliy Somol; ere [thingar] ngad felfelan’gad ma gadad ngongliy e madnom” (Psalm 118:24). Ke pugran Amulek ngodad ni “biney e yafos e ireray e ngiyal’ i n’en ni fan ko gidii’ ni ngar mugu’uliyed yaed ni ngar mada’gaed Got; arragon, musap gaed fare rran ko biney e yafos e ireram e re rran ni fan ko gidii’ ni ngar ngongoliyed e pi muruwel roraed” (Alma 34:32; mu’un boech ngay). Ma ba poet e ke ga’ar, “Manemus—e kan yoloey ko Chiney.”1
Gubin ngiyal’ ni yibay u lukngun e be yup’ fan ni fare gosgos e darma mus, athap e darma yaen nga biyang, ma waer e gathi tomur. Demtrug e gin ni gadad bay riy ara rogon e magawon rodad, ma manemus ko tabolngin nge manemus ko tomuren e be yib ngodad.
Gubin ngiyal’ ma gadad bay u lukngun.
© 2012 ko Intellectual Reserve, Inc. Gubin ni mat’won ma bay. Nni yoloy u Mariken. Kan micheg nag ko thin nu Ngalis: 6/11. Micheg nag i pilyeg: 6/11. Ni pilyeg ko First Presidency Message, July 2012. Yapese. 10367 905
Biney e Mulwol ni Yibe Fil
Mu weliy mornga’agen ko fare tabinaew rogon ni “gubin ngiyal’ ma yaed bay u lukngun,” mus ni fa’anra yaed bay ko tabolngin fa tomuren ban’en. Mu pi’ e athamgil ngoraed ni ngar rrin’ed gelngin ni rayog rorad ko pi gosgos rorad, ma dabin paer u fithik e tin nike thimur ban’en fa ni soen nag e bin migid e gosgos fa n’en ni ngan rrin’. Gara adag ni ngam mog ni ngar feked ta’ab ban’en ni rayog ni ngar rrin’ed ni yaed ba tabinaew ni ngan nang e biney e machib man dugliy e re rran ni yaed be athapeg ni ngar mu’ niged e n’en ni yaed be lem nag ni ngar rrin’ed.