2012
Nuru li Aħna Dixxipli permezz tal-Imħabba u s-Servizz
Lulju 2012

Messaġġ tal-Għalliema taż-Żjajjar, Lulju 2012

Nuru li Aħna Dixxipli permezz tal-Imħabba u s-Servizz

Permezz tat-talb studja dan il-materjal u, kif inhu xieraq, iddiskutih mal-aħwa li inti żżur. Uża l-mistoqsijiet sabiex jgħinuk issaħħaħ lil ħutek u biex tagħmel lis-Soċjetà tal-Għajnuna parti integrali minn ħajtek.

Fidi, Familja, Għajnuna

Tul il-ħajja mortali Tiegħu, Ġesù Kristu wera mħabbtu għall-oħrajn billi għen lil dawk kollha ta’ madwaru. Huwa qal, “Minn dan jagħraf kulħadd li intom dixxipli tiegħi, jekk ikollkom l-imħabba bejnietkom” (Ġwanni 13:35). Huwa tana l-eżempju u jridna “ngħinu lil dawk li għandhom bżonn l-għajnuna [tagħna]” (Mosiah 4:16). Huwa talab lid-dixxipli tiegħu sabiex jgħinuh fil-ministeru Tiegħu, filwaqt li tahom l-opportunità sabiex jaqdu lill-oħrajn u jsiru aktar bħalu.1

Is-servizz tagħna bħala għalliema taż-żjajjar jixbah ferm il-ministeru tas-Salvatur tagħna meta aħna nuru mħabbitna lejn dawk li mmorru ngħallmu fi djarhom billi nagħmlu dan li ġej:2

  • Niftakru isimhom u isem il-membri tal-familja tagħhom u nsiru nafuhom aktar mill-viċin.

  • Inħobbuhom mingħajr ma niġġudikawhom.

  • Nieħdu ħsiebhom u nsaħħu l-fidi tagħhom “wieħed, wieħed u waħda, waħda,” kif għamel is-Salvatur (3 Nephi 11:15).

  • Nistabbilixxu ħbiberija sinċiera magħhom u nżuruhom fi djarhom u f’ postijiet oħra.

  • Nagħtu kas ta’ kull waħda minn ħutna. Niftakru jum għeluq sninhom, il-gradwazzjonijiet tagħhom, il-magħmudijiet u l-anniversarji taż-żwieġ tagħhom, kif ukoll mumenti oħra li huma speċjali għalihom.

  • Nilħqu lill-membri l-ġodda u lil dawk anqas attivi.

  • Nilħqu lil dawk li jinsabu weħidhom jew għandhom bżonn il-faraġ.

Mill-Iskrittura

3 Nephi 11; Moroni 6:4; Doctrine and Covenants 20:47

Mill-Istorja Tagħna

“It-Testment il-Ġdid jinkludi fih rakkonti ta’ nisa, uħud imsemmija bl-isem u oħrajn le, li eżerċitaw il-fidi tagħhom f’ Ġesù Kristu. … Dawn in-nisa saru dixxipli eżemplari. … [Huma] ivvjaġġaw ma’ Ġesù u t-Tnax-il Appostlu Tiegħu. Huma taw minn dak li kellhom biex jassistuh fil-ministeru Tiegħu. Wara l-mewt u l-Qawmien mill-Imwiet Tiegħu, [huma] komplew ikunu dixxipli mill-aktar fidili.”3

Pawlu kiteb dwar mara jisimha Febi li kienet “qaddejja tal-knisja” (Romans 16:1). Huwa talab lin-nies sabiex jgħinuha u qalilhom “agħtuha kull ma teħtieġ mingħandkom: għax hi stess kienet ta’ għajnuna għal ħafna” (Romans 16:2). “It-tip ta’ servizz mogħti minn Febi u minn nisa oħra tat-Testment il-Ġdid ikompli llum permezz tal-membri tas-Soċjetà tal-Għajnuna— mexxejja, għalliema taż-żjajjar, ommijiet u oħrajn li jservu ta’ għajnuna kbira għal ħaddieħor.”4

© 2012 minn Intellectual Reserve, Inc. Id-drittijiet kollha riservati. Printed in Germany. Approvazzjoni bl-Ingliż: 6/11. Approvazzjoni tat-traduzzjoni: 6/11. Traduzzjoni ta’ Visiting Teaching Message, July 2012. Maltese. 10367 159

Noti

  1. Ara Daughters in My Kingdom: The History and Work of Relief Society (2011), 105.

  2. Ara Handbook 2: Administering the Church (2010), 3.2.3.

  3. Daughters in My Kingdom, 3.

  4. Daughters in My Kingdom, 6.

X’ Nista’ Nagħmel?

  1. Kif qed inkabbar il-kapaċità tiegħi li nieħu ħsieb ħaddieħor?

  2. X’ qiegħda nagħmel biex niżgura li dawk in-nisa li jiena nieħu ħsieb ikunu jafu li jiena nħobbhom?