iTukutuku ni MataveiliutakiTaumada, Okosita 2012
Na Veikacivi ni iVakabula mo Veiqaravi
O ira kece era vulica na fika era kila na cava na ivakarau ni duavata. Vei ira na Yalododonu Edaidai, e dua tiko na ivakarau ni duavata e vauci keda vata. Na ivakarau ni duavata oqori sa ikoya na noda ciqoma vakayadua na ilesilesi me vakayacori kina na itavi ena matanitu ni Kalou ena vuravura oqo.
Ko sa bau vakacalai ena vosa kudrukuru ni kena lako mai vei iko e dua na ilesilesi? Se o ciqoma ena vakavinavinaka na veimadigi vakayadua mo qaravi ira na tacimu kei na ganemu, ena nomu kila ni Tamada Vakalomalagi ena vakalougatataki ira era lesi mai vei Koya?
Au sa nuitaka ni da na sega ni vakayalia na ivakaraitaki dina ni noda madigi vakamareqeti meda veiqaravi. Na ivakaraitaki oqori, na inaki tawamudu oqori, sa ikoya na vosa vata ga ni Turaga ka kunei ena Mataniciva Talei: “Raica oqo na inaki kei na lagilagi ni noqu cakacaka—io me ra tucake tale mai na mate na tamata kece ga, ka rawata na bula tawamudu.”1
Meda dau nanuma matua tiko ni isulu ni lewenilotu i Jisu Karisito ni Yalododonu Edaidai e sega ni dua na itutuvi ni veivakacegui ia sa dua na icurucuru balavu ni qaravi tavi. Na noda itavi, me ikuri ni noda vakabulai keda, sa ikoya meda dusimaki ira eso tale ki na matanitu vakaselesitieli ni Kalou.
Ena gumatua ni noda lakova tiko na sala ni veiqaravi vua na Kalou, eda na sega vakadua ni yacovi Cardinal Wolsey, e dua ka a vakayagataka o Shakespeare. E a kau laivi nona kaukauwa ni oti e dua na gauna ni veiqaravi vua nona tui, e a vakayatuyatutaka ena rarawa:
Kevaka walega me’u vakayagataka e veimama na noqu igu ka qarava na noqu Kalou
Niu a qarava na noqu tui, o Koya ena sega ni rawa ni biuti au
Ena bula oqo me’u luvaiwale tu e matadra na noqu meca.2
Na mataqali veiqaravi cava e vinakata o lomalagi? “Raica sa vinakata na Turaga na yalo sa malumalumu ka talairawarawa; ia ko ira na yalomalu-malumu ka talairawarawa, era na kania na veta ni vuata ena vanua ko Saioni ena siga mai muri.”3
Au cegu ena noqu vakasamataka na vosa nei Peresitedi John Taylor (1808–87): “Kevaka o sega ni vakalevuya na nomu ilesilesi, ena beitaki iko na Kalou me baleti ira mo a vakabula kevaka ko a vakayacora na nomu itavi.”4
Na bula nei Jisu e vaka e dua na cina ramase ni cakavinaka ena Nona veiqaravi ena kedra maliwa na tamata. “Ia koi au, ka’u sa tiko vata kei kemudou me vaka e dua sa dauveiqaravi,”5 a vakaraitaka o Jisu ena nona vakaukauwataka na yavadra na lokiloki, na rai e matadra na mataboko, na rorogo kivei ira na didivara, kei na bula ki na yagodra na sa mate.
Ena vosa vakaibalebale ni kai Samaria vinaka, a vakatavulica vei keda na iVakavuvuli meda lomani ira na kai noda me vaka eda sa lomani keda.6 Ena Nona isaunitaro kivua na turaga vutuniyau, a vakatavulici keda o Koya meda kauta laivi na noda yalokocokoco.7 Ena nodra vakani na lewe 5,000, e vakatavulici keda meda raica na nodra gagadre eso tale.8 Kei na Vunau ena Ulunivanua, e vakatavulici keda o Koya meda vakasaqara taumada na matanitu ni Kalou.9
Ena Vuravura Vou, a vakaraitaka na Turaga sa tucaketale, “Ia dou sa kila na ka sa dodonu mo dou kitaka ena noqu lotu; ia na ka kecega dou sa raica ni’u sa kitaka, mo dou kitaka tale ga; io mo dou kitaka na ka kece ga dou sa raica ni’u sa kitaka.”10
Eda vakalougatataki ira eso ena noda veiqaravi ena kena iyaloyalo o “Jisu na kai Nasareci … ko koya ka lako voli ka daucaka vinaka.”11 Me vakalougatataki keda na Kalou meda kunea na reki ena noda qarava tiko na Tamada Vakalomalagi ena noda qaravi ira na Luvena e vuravura.
© 2012 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/11. Vakadonui me vakadewa: 6/11. iVakadewa ni First Presidency Message, August 2012. Fijian. 10368 858
Veivakatavulici mai na iTukutuku Oqo
“[Na Turaga] ena sega ni vakadonuya meda druka ke da na vakayacora na noda itavi. Ena vakalevulevui keda o koya me sivia na noda taledi kei na veika eda rawata. … Oqo e dua na oga kamikamica eda mai sotava na tamata” (Ezra Taft Benson, ena Veituberi, Me iLutua ni Noda Bula [1999], 23). Nanuma mo wasea e dua na ka o sotava se dua tale o kila ena nona vakila ni a vakalevutaka na Turaga na nona taledi kei na veika e rawata. Sureta na matavuvale mera wasea eso na veika era dui sotava vakaidina ena nodra sa vakaio ki na “ilesilesi ni iVakabula mera veiqaravi.”