iVaqa ni Veisiko, Okosita 2012
Veiqaravi ena Gauna e Gadrevi Kina
Wilika ka masulaka na itukutuku oqo, ke gadrevi, mo veivosakitaka kei ira na marama o sikova. Vakayagataka na taro me vukei iko mo vaqaqacotaki ira kina na nomu itokani marama ka cakava na iSoqosoqo ni Veivukei me dua na tiki ni veivakabulabulataki ena nomu bula vakai iko.
Vakabauta, Matavuvale, Veivukei
Ni da dausiko vuvale, e dua na noda inaki meda veivuke ena kena vaqaqacotaki na matavuvale kei na itikotiko. E dodonu mera na rawa ni kaya na marama eda dau sikova, “Ke dua na noqu leqa, au kila ni na veivuke na noqu dausiko vuvale ka sega ni waraka me kerei yani.” Me rawa ni da veiqaravi, sa noda itavi meda nanuma tiko na nodra gagadre na marama eda dau sikova. Ni da vakasaqara na veivakauqeti, eda na kila na ivakarau meda sotava kina na nodra gagadre vakayalo kei na gagadre vakayago na marama eda lesi meda sikova. Oti, ena noda vakayagataka na noda gauna, maqosa, taledi, masu ni vakabauta, kei na veitokoni vakayalo kei na veitokoni ni lomada, sa rawa ni da veivuke ena veiqaravi vakayalololoma ena gauna ni tauvimate, mate, kei na veigauna bibi tale eso.1
Ena veivuke ni ripote mai vei ira na dausiko vuvale, eratou na raica kina na mataveiliutaki ni iSoqosoqo ni Veivukei o ira e tu na nodra gagadre bibi ena vuku ni tauvimate vakayago se tauvimate ni lomadra, na leqa vakasauri, na sucu ni gone, mate, na vakaleqai ni yago, na bula galili, se na bolebole tale eso. Na peresitedi ni iSoqosoqo ni Veivukei sa na qai tukuna vei bisopi na veika sa raica rawa. Ena nona veidusimaki, sa na qarava o koya na kena soli na veivuke.2
Ni da dausiko vuvale sa rawa vei keda na “vuna cecere … meda reki kina” ena vuku ni “veivakalougatataki sa soli vei keda, ni da sa caka meda iyaya ni cakacaka ena liga ni Kalou me rawati kina na cakacaka cecere oqo” (Alama 26:1, 3).
Mai na iVolanikalou
Maciu 22:37–40; Luke 10:29–37; Alama 26:1–4; Vunau kei na Veiyalayalati 82:18–19
Mai na Keda iTukutuku Makawa
Ena kena tekivu na Lotu, e a lailai toka ga na lewena ka ra toka vata ga ena dua na vanua. E totolo sara na nodra yavala na lewenilotu ena gauna e sotava kina na leqa e dua. Edai sa sivia na 14 na milioni na lewenilotu ka sa roboti vuravura tu. Na siko vuvale sa tiki ni nona ituvatuva na Turaga me vakarautaki kina na veivuke vei ira kece na Luvena.
“Na ivakarau duadua ga e rawa kina na veivuke kei na veivakacegui ena dua na lotu vakaitamera ka tu ena dua na vuravura duidui vakaoqo sa ikoya mai vei ira na italai yadudua era tu volekati ira era vakaleqai tu,” e kaya o Peresitedi Henry B. Eyring, na iMatai ni Daunivakasala ena Mataveiliutaki Taumada.
“… Na bisopi yadua kei na peresitedi yadua ni tabana e tiko e dua na peresitedi ni iSoqosoqo ni Veivukei me vakararavi kina,” a tomana o koya. “Era tu na nona dauveisiko, ka ra kila tu na vei-dredre kei na gagadre ni marama yadua. Sa rawa vua, ena vukudra, me kila na yalodra na marama kei na veimatavuvale yadua. E rawa ni sotava na gagadre ka vukea na bisopi ena nona veikacivi me vukei ira na marama yadua kei na veimatavuvale.”3
© 2012 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me Vakavalagi: 6/11. Vakadonui me vakadewa: 6/11. iVakadewa ni Visiting Teaching Message, August 2012. Fijian. 10368 858