Thawj Pawg Thawj Tswj Hwm tsab Xov, Yim Hli Ntuj 2012
Tus Cawm Seej Hu Peb Los Pab Lwm Tus
Txhua tus uas tau kawm txog kev ua leb paub tias tej zauv feem tuaj hauv qab uas sib thooj yog dab tsi. Rau peb Haiv Neeg Ntseeg, muaj ib qho sib thooj uas ua rau peb koom siab ua ke. Qhov sib thooj ntawd yog qhov uas Vajtswv hu peb txhua tus los ua hauj lwm hauv Nws lub nceeg vaj nyob hauv ntiaj teb no.
Nej puas muaj txim vim yws yws thaum Vajtswv hu nej los ua hauj lwm? Los yog nej puas ua Vajtswv tsaug txais txoj hauj lwm pab nej cov kwv tij nus muag, vim nej paub tias peb Leej Txiv Saum Ntuj Ceeb Tsheej yuav foom koob hmoov rau cov uas Nws hu?
Kuv cia siab tias peb yuav nco ntsoov txog lub hom phiaj ntawm peb txoj hauj lwm pab lwm tus. Lub hom phiaj uas nyob mus ib txhis ntawd yog tib lub hom phiaj uas tus Tswv hais txog nyob hauv phau Hlaws uas Muaj Nqi: “Vim saib seb, nov yog kuv txoj hauj lwm thiab kuv lub yeeb koob—uas yog kom tib neeg txais tau txoj kev tsis txawj ploj tsis txawj tuag thiab txoj sia nyob mus ib txhis.”1
Thov kom peb yuav nco ntsoov tias qhov uas peb yog mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg tsis yog ib qho uas nplij peb lub siab tiam sis ib qho ntiag tug hauj lwm. Peb lub luag hauj lwm yog kev cawm peb tus kheej kom dim, thiab coj lwm tus mus rau hauv Vajtswv lub nceeg vaj xilethi-aus.
Yog peb muaj siab xav ua hauj lwm pab Vajtswv, peb yeej yuav tsis zoo li Cardinal Wolsey uas Shakespeare sau ntawv txog. Tom qab nws ua hauj lwm pab nws tus vaj ntxwv tas nws lub neej thiab poob nws lub hwj chim lawm, nws nyiav hais tias:
Yog kuv tau rau siab ua hauj lwm rau kuv tus Vajtswv npaum li
kuv ua hauj lwm rau kuv tus vaj ntxwv, Ntshe nws yeej yuav tsis
cia kuv tsis muaj hwj chim tawm tsam kuv cov yeeb ncuab.2
Vajtswv kom yus pab lwm tus li cas? “Tus Tswv kom yus muaj lub siab thiab lub ntsws uas kam ua; thiab cov uas kam ua thiab mloog lus yuav noj tej uas zoo ntawm thaj av Xi-oos nyob rau hauv hnub nyoog kawg no.”3
Ua rau kuv xav ntau thaum kuv xav txog Thawj Tswj Hwm John Taylor cov lus (1808–87): “Yog nej tsis rau siab ua nej tej hauj lwm, Vajtswv yuav rau txim rau nej vim muaj tej tug uas tej zaum nej pab tau yog nej tau ua nej tej hauj lwm.”4
Yexus lub neej thaum Nws ua hauj lwm qhuab qhia tib neeg yeej zoo li ib lub teeb ci ntsa iab uas zoo zoo. Thaum Yexus ua rau cov neeg ceg tawv txhais ceg muaj zog, ua rau cov neeg dig muag pom kev, cov lag ntseg txawj hnov, thiab ua rau cov neeg tuag sawv rov qab los, Nws qhia hais tias, “Kuv ua ib yam li ib tug tub qhe,”5
Thaum nws hais zaj piv txwv txog tus neeg Xamalis zoo, tus Xib hwb qhia peb kom hlub peb cov neeg zej zog ib yam li peb hlub peb tus kheej.6 Raws li Nws teb tus nom hluas uas nplua nuj, Nws qhia peb kom txhob ua qias dub.7 Thaum nws muab zaub mov rau 5,000 tus neeg, Nws qhia kom peb paub thaum twg lwm tus xav tau tej yam.8 Thiab thaum Nws Qhia Nyob Pem Roob, Nws qhia kom peb xub nrhiav tau Vajtswv lub nceeg vaj.9
Nyob hauv Sab Ntiaj Teb Tshiab no, tus Tswv uas tau sawv rov los lawm tshaj hais tias, “Nej yeej paub tej yam uas nej yuav tsum ua nyob hauv kuv lub koom txoos; rau tej hauj lwm uas nej tau pom kuv ua tej ntawd nej kuj yuav tsum ua thiab; rau tej uas nej tau pom kuv ua tej ntawd ntag nej yuav tsum ua.”10
Peb foom koob hmoov rau lwm tus thaum peb pab lawv ib yam li “Yexus ntawm Naxales … uas tau mus thoob plaws ua zoo.”11 Thov kom Vajtswv foom koob hmoov pab peb nrhiav kev xyiv fab thaum peb ua hauj lwm pab peb Leej Txiv Saum Ntuj Ceeb Tsheej thaum peb pab Nws cov me nyuam hauv lub ntiaj teb.
© 2012 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11. Kev txhais First Presidency Message, August 2012. Hmong. 10368 295
Qhia los ntawm tsab Xov No
“[Tus Tswv] yuav tsis cia peb swb yog peb ua peb txoj hauj lwm. Nws yuav ua rau peb muaj hwj chim tshaj peb tej txuj ci thiab kev txawj ua. … Nws yog ib qho zoo kawg nkaus uas yuav muaj los rau ib tug tib neeg” (Ezra Taft Benson, nyob hauv Teaching, No Greater Call [1999], 20). Sim qhia lawv txog txog ib zaug uas koj los sis ib tug neeg uas koj paub tau ua raws li nws tej kev txawj ua thiab tej txuj ci. Caw tsev neeg ntawd qhia txog tej yam zoo uas lawv ua thaum lawv los ua raws li “tus Cawm Seej hu lawv los ua hauj lwm pab lwm tus.”