Cov Mus Saib Xyuas Tom Tsev tsab Xov, Yim Hli Ntuj 2012
Kev Los Pab Thaum Tib Neeg Xav Tau
Ua tib zoo thov Vajtswv kawm tej yam no thiab, thaum tsim nyog ua, sib tham txog tej no nrog cov viv ncaus uas koj mus xyuas. Siv tej lus nug no pab koj txhawb koj cov viv ncaus lub zog thiab ua kom lub Koom Haum Niam Tsev muaj feem hauv koj lub neej.
Kev Ntseeg, Tsev Neeg, Kev Pab
Ua cov mus saib xyuas tom tsev, peb ib lub hom phiaj yog ntxiv dag zog rau tej tsev neeg. Xav kom cov viv ncaus uas peb mus saib xyuas hais tias, “Yog kuv muaj teeb meem, kuv paub kuv cov mus saib xyuas tom tsev yuav pab kuv es kuv tsis tas nug nkawd.” Yog peb xav pab lwm tus, peb muaj ntiag tug hauj lwm paub tias cov viv ncaus uas peb saib xyuas xav tau dab tsi. Thaum peb nrhiav kom txais kev tshoov siab, peb yuav paub ua li cas rau tej kev xav tau ntawm sab ntsuj plig thiab sab nqaij daim tawv rau txhua tus viv ncaus uas peb mus xyuas. Ces, vim peb siv peb lub sij hawm, tej txuj ci, muaj kev ntseeg thov Vajtswv, thiab txhawb nqa lawv sab ntsuj plig thiab lub siab, peb yuav pab muaj siab hlub ua hauj lwm pab lwm tus thaum muaj kev mob, kev tuag, thiab lwm yam xwm txheej.1
Los ntawm qhov uas cov mus saib xyuas tom tsev qhia tias lawv tau ua dab tsi, lub Koom Haum Niam Tsev pawg thawj tswj hwm kawm txog cov uas muaj tej kev xav tau tshwj xeeb vim muaj mob ntawm sab cev nqaij daim tawv los yog lub siab, cov uas raug xwm txheej, yug me nyuam, tso lub ntiaj teb tseg, xiam hoob khab, kho siab los yog muaj tej kev cov nyom. Ces Koom Haum Niam Tsev tus thawj tswj hwm qhia tej ntawd rau tus npis sov. Los ntawm tus npis sov txoj kev coj kev, nws koom tes nrhiav neeg pab.2
Vim peb yog cov mus saib xyuas tom tsev peb “muaj kev xyiv fab loj heev” vim “qhov no yog txoj koob hmoov uas tau muab rau peb, xwv kom peb tau los ua cuab yeej nyob rau hauv Vajtswv txhais tes kom coj txoj hauj lwm tseem ceeb no.” (Amas 26:1, 3)
Los ntawm cov Vaj Lug Kub
Mathais 22:37–40; Lukas 10:29–37; Amas 26:1–4; Doctrine and Covenants 82:18–19
Los ntawm Peb zaj Keeb Kwm
Thaum nyuam qhuav pib lub Koom Txoos, muaj mej zeej tsawg tsawg xwb thiab lawv nyob hauv tib qho chaw. Cov mej zeej yeej pab tau sai sai thaum lwm tus xav tau. Hnub no peb muaj 14 plhom tus mej zeej nyob thoob plaws lub ntiaj teb. Kev saib xyuas tom tsev yog ib feem ntawm tus Tswv txoj hau kev pab tag nrho Nws cov me nyuam.
Thawj Tswj Hwm Henry B. Eyring, tus Pab Cuam thib Ib hauv Thawj Pawg Thawj Tswj Hwm hais tias, “Tib tug txheej txheem uas yuav pab tsom kwm saib xyuas thiab nplij neeg lub siab hauv ib lub koom txoos loj npaum li no nyob hauv ib lub ntiaj teb uas muaj neeg sib txawv tsuas yog qhov uas txhua tus tub qhe pab cov neeg uas xav tau tej yam nyob ze lawv.”
Nws hais ntxiv hais tias, “… Txhua tus npis sov thiab ceg txheem ntseeg tus thawj tswj hwm muaj lub Koom Haum Niam Tsev ib tug thawj tswj hwm uas txhawb nqa nws. Nws muaj cov mus saib xyuas tom tsev, uas paub txog tej kev sim siab thiab kev xav tau ntawm txhua tus viv ncaus. Los ntawm nws, nws muaj peev xwm paub tib neeg thiab tsev neeg lub siab xav. Nws pab lawv tej kev xav tau thiab pab tus npis sov ua nws txoj hauj lwm saib xyuas tib neeg thiab lawv tsev neeg.”3
© 2012 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/11. Pub txhais ua lus Hmoob: 6/11. Kev txhais Visiting Teaching Message, August 2012. Hmong. 10368 295
Kuv Yuav Pab Li Cas?
-
Kuv puas siv kuv tej txiaj ntsim thiab txuj ci foom koob hmoov rau lwm tus?
-
Cov viv ncaus uas kuv saib xyuas puas paub tias kuv kam pab lawv thaum lawv xav tau?