Mensahe ti Umuna a Panguluen, Agosto 2012
Ti Awag nga Agserbi ti Mangisalakan
Ammo ti amin a nakaadalen iti matematika no ania ti kayat a sawen ti common denominator. Para kadagiti Santo iti Ud-udina nga Aldaw, adda gagangay a kababalin [common denominator] a mangbegkes kadatayo a sangkamaysa. Dayta a gagangay a kababalin [commor denominator] ket maysa nga awag nga awaten ti tunggal maysa kadatayo a mangipatungpal kadagiti naituding nga aramiden iti pagarian ti Dios ditoy rabaw ti daga.
Agbasolka ngata iti panagdayamudom no dumteng kenka ti maysa nga awag? Wenno siyayamanka ngata nga umawat iti tunggal gundaway a makapagserbi kadagiti kakabsatmo, nga ammom a bendisionanto ti Nailangitan nga Amatayo dagiti awaganna?
Sapay ta ditayo koma mapukaw ti pudno a panggep dagiti napapateg a gundaway a makapagserbi. Dayta a panggep, dayta nga agnanayon a panggep a tun-oyen, ket isu met laeng ti insao ti Apo ken masarakan iti Perlas a Kapatgan: “Ta adtoy, daytoy ti aramidko ken gloriak—ti mangipatungpal iti saan nga ipapatay ken ti agnanayon a biag ti tao.”1
Laglagipentayo koma a kanayon a ti kagay ti kinamiembro iti Ti Simbaan ni Jesucristo dagiti Santo iti Ud-udina nga Aldaw ket saan a kagay ti liwliwa no di ketdi maysa a roba ti pagrebbengan. Ti pagrebbengantayo, kas mainayon pay iti panangisalakan iti bagbagitayo, ket mangtarabay kadagiti dadduma nga agturong iti celestial a pagarian ti Dios.
Babaen ti siaayat a pannagna iti dalan ti panagserbi iti Dios, saantayto iti kaano man maragpat ti saad ti Cardinal Wolsey ni Shakespeare. Naikkatan iti bilegna kalpasan ti napaut a panagserbina iti arina, silaladingit nga insennaayna:
No nagserbiak la koma iti Diosko nga addaan iti kagudua ti regta
nagserbiak iti arik, iti kinalakayko saannak a
Pinanawan nga awan bilegna kadagiti kabusorko.2
Ania a kita ti panagserbi ti idawat ti langit? “Kalikaguman ti Apo ti puso ken ti natallugod a panunot; ken ti natallugod ken natulnog manganto iti nasayaat iti daga ti Zion kadagitoy maudi nga aldaw.”3
Agsardengak no panunotek dagiti balikas ni Presidente John Taylor (1808–87): “No saanmo nga aramiden a nasayaat dagiti takem a nakaawagam, pagsungbatennakanto ti Dios kadagiti mabalin koma nga insalakanmo no inaramidmo ti pagrebbengam.”4
Kas iti agrimrimat a silaw nga agsapsapul iti kinaimbag ti biag ni Jesus bayat ti panagministrona kadagiti tao. “Kadakayo siak ti kasla agserbi,”5 impakdaar ni Jesus idi pinapigsana dagiti saka ti pilay, insublina ti panagkita ti bulsek, panagdengngeg ti tuleng, ken pinagungarna ti bagi ti natay.
Babaen ti pangangarig ti naimbag a Samaritano, sinuruannatayo ti Maestro nga ayatentayo dagiti kaarrubatayo kas iti bagbagitayo.6 Babaen ti sungbatna iti nabaknang nga agtutubo nga agturay, sinuruannatayo a mangparmek iti kinamanagimbubukodtayo.7 Babaen ti panangpakanna iti 5,000, sinuruannatayo a mangkita kadagiti kasapulan dagiti dadduma.8 Ken babaen ti Kaskasaba iti Bantay, sinuruannatayo a mangsapul nga umuna iti pagarian ti Dios.9
Iti Baro a Lubong, impakdaar ti nagungar nga Apo, “Ammoyo dagiti banag a rumbeng nga aramidenyo iti simbaanko; agsipud ta dagiti aramid a naimatanganyon nga inaramidko ti aramidenyonto met; ta no ania dayta nakitayo nga inaramidko kastanto met ti aramidenyo.”10
Mabendisionantayo dagiti dadduma no agserbitayo iti salinong ni “Jesus a taga Nazaret … isu a namagpagna a nagar-aramid iti kinaimbag.”11 Bendisionannatayo ti Dios a mangsarak iti rag-o iti panagserbi iti Nailangitan nga Amatayo bayat ti panagserbitayo kadagiti annakna iti daga.
© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti First Presidency Message, August 2012. Ilokano. 10368 864
Panangisuro manipud iti Daytoy a Mensahe
“[Ti Apo] saannanto nga ipalubos a mapaaytayo no aramidentayo ti pasettayo. Padur-asennatayo uray iti labes dagiti bukodtayo a talento ken kabaelan. … Maysa daytoy kadagiti kasasam-itan a padas a mabalin a sumangbay iti maysa a tao” (Ezra Taft Benson, iti Teaching, No Greater Call [1999], 20). Ibilangmo ti panangibinglay iti maysa a padas no nakariknaka wenno ti maysa a tao nga am-ammom a pinadur-as ti Apo dagiti talento ken kabaelanna. Awisem ti pamilia a mangibinglay iti sumagmamano kadagiti bukod a napintas a padasda bayat ti panangsungbatda iti “awag nga agserbi ti Mangisalakan.”