Mensahe iti Visiting Teaching, Agosto 2012

Panagtignay iti Oras ti Panagkasapulan

Sikakararag nga adalem daytoy a material ken, no mayannatup, ilawlawagmo daytoy kadagiti kakabsat a babbai a sarungkaranyo. Usarem dagiti saludsod a makatulong kenka a mangpapigsa kadagiti kakabsat a babbai ken tapno mangaramid iti Relief Society kas aktibo a paset ti bukodmo a biag.

Ladawan

Selio ti Relief Society

Pammati, Pamilia, Tulong

Kas visiting teacher, maysa kadagiti panggeptayo ket mangtulong a mangpapigsa kadagiti pamilia ken pagtaengan. Nasken a kabaelan nga isao dagiti kakabsat a babbai a sarungkarantayo, “No adda problemak, ammok a tulongannakto dagiti visiting teacherko a dida ur-urayen a makiddaw.” Tapno makapagserbi, addaantayo iti pagrebbengan a mangammo kadagiti kasapulan dagiti kakabsat a babbai a sarungkarantayo. No agkalikagumtayo iti pammaregta, maammuantayonto no kasano ti mangipaay kadagiti naespirituan ken naindagaan a kasapulan ti tunggal kabsat a babai a naidutok kadatayo a sarungkaran. Kalpasanna, iti panangusartayo iti panawen, paglaingan, talento, kararag ti pammati, naespirituan ken nainriknaan a suportatayo, makatulongtayo a mangted iti serbisio ti pannakipagrikna kadagiti panawen ti panagsakit, ipapatay, ken dadduma pay a naisangsangayan a pasamak.¹

Babaen ti tulong dagiti report manipud kadagiti visiting teacher, ilasin ti panguluen ti Relief Society dagitay addaan kadagiti naisangsangayan a panagkasapulan gapu iti panagsakit iti bagi wenno rikna, kellaat a panagkasapulan, panaganak, ipapatay, pannakabaldado, panagladingit, wenno dadduma pay a pannubok. Kalpasanna ireport ti presidente ti Relief Society dagiti natakuatanna iti bishop. Babaen ti panangiturong ti bishop, makitunos ti presidente ti Relief Society iti pannakaipaay ti tulong.²

Kas visiting teacher maaddaantayo iti “naindaklan a gapu … iti pagragsakantayo” gapu iti “bendision a naipaay kadatayo, ta naaramattayo a ramit dagiti ima ti Dios a mangipatungpal itoy naindaklan nga aramid” (Alma 26:1, 3).

Manipud kadagiti Nasantuan a Kasuratan

Mateo 22:37–40; Lucas 10:29–37; Alma 26:1–4; Doktrina ken Katulagan 82:18–19

Manipud iti Pakasaritaantayo

Kadagiti immun-una a tawen ti Simbaan, bassit ti bilang dagiti miembro ken sentralisado. Alisto a mangted iti tulong dagiti miembro no agkasapulan ti maysa a tao. Iti agdama nasuroken a 14 a million ti bilang dagiti miembro ken agsaknap iti intero a lubong. Ti visiting teaching ket paset ti plano ti Apo a mangipaay iti tulong iti amin nga annakna.

“Ti kakaisuna a wagas a makaipaay iti tulong ken liwliwa iti intero a simbaan a kasta unay ti kadakkelna iti maysa a lubong a naidumduma ket babaen kadagiti katulonganna nga asideg kadagiti tao nga agkasapulan,” kinuna ni Presidente Henry B. Eyring, Umuna a Mammagbaga iti Umuna a Panguluen.

“… Tunggal bishop ken tunggal branch president ket addaan iti presidente ti Relief Society a pagpannurayan,” intuloyna. “Addaan isuna kadagiti visiting teacher a makaammo kadagiti pannubok ken kasapulan ti tunggal kabsat a babai. Kabaelanna, babaen dagiti visiting teacher, nga ammuen ti kaunggan dagiti indibidual ken pamilia. Kabaelanna nga ipaay dagiti kasapulan ken tulongan ti bishop iti takemna a mangaywan kadagiti indibidual ken pamilia.”³

© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti Visiting Teaching Message, August 2012. Ilokano. 10368 864

Ania ti Maaramidko?

Us-usarek kadi dagiti sagut ken talentok tapno mabendisionan dagiti dadduma?
Ammo kadi dagiti kakabsat a babbai nga ay-aywanak a naayatak a tumulong kadakuada no adda kasapulanda?