Pweng sin Prestuhnsi Se Met, Ohkohs 2012
Pahng luhn Mwet Lahngo in Kuhlwacnsap
Elos nuh kwewa suc lutlut oacwac uh etuh lah meac common denominator (nacmpuh fal se). Nuh sin Mwet Luhlahlfongi ke Lwen-sahflah uh, oasr nacmpuh fal se ma orekuhtweni nuh sie. Nacmpuh fal sacn pa kais sie pahng kuht kais sie eis in nwacklah kunohkohn ke tohkohsrahi luhn God inge fin facluh.
Kuh kom nuh puhla suhfal ke tohrkahskahs ke pahng uh tuhkuh nuh yurum uh? Kuh kom ac nuh insese in sang kuloh ke kais sie pacl wowo in kuhlwacnsapuh tamuhlwel ac tahmtahel wiyom an, etuh lah Pahpah tuhmasr Inkuhsrao El fah ahkinsewowoyaclos suc El pahngon?
Nga finsrakkihn tuh kuht in tiac sislah ohiyac pwacye ke luhngse lal ke pacl wowo in kuhlwacnsap uh. Ohiac sacn, finsrak ma pahtpaht sacn, pa ma se na ma sramsramkihnyuck sin Leum ac sukokyak ke Mwe Sang Sacohklacna: “Liye, pa inge orekma luhk ac wolacna luhk—in use moul ne tok ac moul ma pahtpaht luhn mwet.”1
Lwelah kuht in esam lah walwalkihn mempucr ke Alu luhn Jisus Kraist luhn Mwet Luhlahlfongi ke Lwen-sahflah uh tiac mwe walwal in ahkwo se tuhsruhk nuknuk fohn se luhn kunohkohn. Ma kunacsr uh, in kuh in moli kuhtlac sifacna, pa in kol mwet sahyac nuh ke tohkohsrahi ke Celestial luhn God.
Ke inseselac in fahsr ke inkacnek in kuhlwacnsap luhn God, kuht ac fah tiac oruh ke oruh lal Shakespeare Cardinal Wolsey. Sisarlah kuh lal tukun moul in kuhlwacnsap nuh sin tohkohsrah lal, el suhpwacrlac:
Nga fuhnuh kuhlwacnsapuh God luhk ke tahfuhn srihwasra luhk
Nga kuhlwacnsapuh tohkohsrah luhk, El fah tiac sun pacl luhk
Fihliuclac in kohflohfohl yurin mwet lokoalok luhk uh.2
Kain kuhlwacnsap fuhkah inkuhsrao enenuh uh? “Leum el enenuh insiac ac nuhnak pwacye se; ac insese pwacye ac ahkostwen fah kang ma wo ke acn luhn Saion ke lwen sahflah inge.”3
Nga tui ke nga nuhnkuh kahs lal Prestuhn John Taylor ah (1808–87): “Kowos fin tiac ahkfalye pahng lowos an, God lac usot mwacta nuh suwos kaclos suc kowos kuh in molwelah kowos fuhnuh orwaclah ma kunowos.”4
Oacna srwesrwen fong luhn kahlwem in sukok ke ma wowo uh pa moul luhn Jisus ac ke El luti inmahsrlon mwet uh. “Nga inmahsrlowos suc kuhlwacnsap,”5 Jisus el fahkwack ke El ahkkuhyelah niacn mwet ul, ngwetngwet luhn mwet kun, insrwen mwet suhlohng kahs, ac moul luhn mwet misac.
Ke puhpuhlyuck soko ke mwet Samaria wowo sac, Mwet Luti Fuhlwact el luti kuht in luhngse mwet tuhlan lasr oacna kuht sifacna.6 Ke top Lal in sun mwet kol fuhsr kahsruhp se, El luti kuht in fihliyac nuh sahyac kuhtasrihk lasr.7 Ke kihteyacn mwet 5,000, El luti kuht in liye enenuh luhn mwet sahyac uh.8 Ac ke Luti fin Ohl uh, El luti kuht in suk met tohkohsrahi luhn God.9
Ke Facluh Sasuc se, Leum moulyak el fahkwack, “Kowos etuh ma kowos enenuh in oruh ke alu luhk uh; nuh ke orekma suc kowos liye nga oruh ma kowos enenuh pac in oruh; nuh ke ma kowos liye nga oruh finne ma kowos enenuh in oruh.”10
Kuht ahkinsewowoye mwet sahyac ke kuht kuhlwacnsap ke nguhnihn “Jisus luhn Nazareth … suc som ac oruh ma wo.”11 God El ahkinsewowoye kuht in konwacack engan ke kuhlwacnsapuh Pahpah tuhmasr Inkuhsrao ke kuht kuhlwacnsapuh tuhlihk Nahtuhl fin facluh.
© 2012 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/11. Ahkkweyeyucklac ke lweng: 6/11. Lwenglah luhn First Presidency Message, August 2012. Kosraean. 10368 868
Luti ke Pweng Se Inge
“[Leum] El fah tiac lwelah kuht in puhtatlac kuht fin oruh ip lasr uh. El ac fah ahkwoye kuht finne in yohk liki talan ac kuhiyacsr. … Pa sie sin puhlakihn wowo ma kuh in tuhkuh nuh sin mwet uh” (Ezra Taft Benson, ke Teaching, No Greater Call [1999], 20). Nuhnkuh in akacsruhi ke sie ohiac sikyak ke kowos kuh sie mwet kowos etuh puhla oruh wo luhn Leum nuh sel ke talan ac kuhiacl an. Suli sucu an in akacsruhi ke kuhtuh sin puhlakihn wowo lalos sifacna ke elos tohpohklah ke “pahng in kuhlwacnsap luhn Mwet Lahngo an.”