Roronrikirake

Ataakina bwa tera Ae e na Taekinaki

Ngkana ko namakinna bwa e aki rangi n tau am atatai ibukin te euangkerio n tibwauaia ma tabeman, namakina te rau inanon berita aikai man booki aika tabu:

Te Uea e taku bwa ti na tabeka bwanaara nakon te aomata aio ao n taekinii iango ake e na katikui inanora, ao ti na aki kamwaningaaki imataia aomata;

Bwa terana are ti na taekinna ti na anganaki n te aoa naba arei ao te tai naba arei (taraa D&C 100:5–6).

“Te Tia Karaunano, are te Tamnei ae Raoiroi, are E na kanakoa te Tama n arau, E na reireingkami bwaai ni kabane, ao E na kaururing i nanomi bwaai ni kabane ake I atongi nakoimi” (Ioane 14:26).

Aikai berita aika korakora, ma karekea iroum, ti riai ni karaoa mwiokoara. Inanon te rongorongo aei, Beretitenti Eyring e reireiniira bwa ti na kangaa ni “Katauraoi ao n tibwaua [te euangkerio] man kaonrakean ara iango ni katoabong ma koaua man te euangkerio.” Tera ae ko kona ni karaoia ni kaonrakea am iango ma koaua man te euangkerio?