Rongorongo man te Moan Beretitentii, Tebetembwa 2012
Tibwauakin te Euangkerio man te Nano nakon te Nano
Te Atua e a tia ana baire ibukiia aomata aika tauraoi ni butimwaea te euangkerio bwa a na kawaraki irouia Ana toro aika tauraoi n tibwauaa te euangkerio. Ko a tia ni karekea anne inanon maium. Ae kakira aron rikina e a bon nakon aron katauraoan am iango ao nanom.
Iai raraou ae e tatataro ni katoabong bwa te rana ngke e kaitiboaki ma temanna ae tauraoi ni butimwaea te euangkerio. E uouota kaobiin ana Boki Moomon. Te bongina imwaain te mwananga ae uarereke, e tia ni baireia bwa e na aki uota ana Booki Moomon ma e na onea mwiina ni uota te kaati ae e na kona ni bwaatinaki. Ma ngke e a tauraoi ni mwananga, ao e roko irouna ana namakin te tamnei nakoina bwa e na riai ni: “Uota ana Boki Moomon.” E karina teuana inanon ana baeki.
Ngke e a mananga nako ao e tekateka irarikin te aine ae e kina ngke e tekateka irakina, e miiakinna, “Bon ngaia aio te aomata ae N na tibwa te euangkerio nakoina?” E a manga tekateka naba ma ngaia iaon kawaia n oki. E iangoia, “N na kanga ni uota taekan te euangkerio?”
N onea mwiina, neierei e taku nakoina, “Ko kakabwakaa am kabwianibwai nakon am ekaretia, ngaia anne?” E taku teuaei e kakabwaka. E taku neierei eng e riai ni kabwakaa ana kabwianibwai nakon ana ekaretia ma e aki. Imwiina e titiraki, “Tera ae ko kona n tuangai ibukin ana Boki Moomon?”
E kamatataa bwa bon te boki ae tabu, bon te kakoaua teuana ibukin Iesu Kristo, are rairaki iroun te Burabeti Iotebwa Timiti. E taraa n ae iai nanona ni kan ongora, ai ngaia are e karina baina inanon ana baeki ao n taku, “I bon tuangaki bwa N na uota te boki aei. I taku bwa bon ibukim.”
E waaki ni warekia. Ngke a nang maenako, e taku neierei, “Ngkoe ao ngai ti na karekea riki ara maroroo ibukin aio.”
Tera ae e aki kona n ataia raraou—ma te Atua e ataia—bwa neierei e kakaea ana aaro. Te Atua e ataia bwa e a tia n taratara raraou ao man miiakinna bwa bukin tera ana ekaretia e karika teuaei bwa e rangi ni kukurei. Te Atua e ataia bwa e na bon titiraki ibukin ana Boki Moomon n te aro bwa e na kukurei n reireinaki irouia mitinare. E a bon tauraoi. Ai aron naba raraou. Ngkoe ao ngai ti kona naba n tauraoi.
Te katauraoi ae ti kainnanoia bon inanon ara iango ao nanora. Te aine aio e atia n ongo ao n uringii taeka ibukin ana Boki Moomon, ana Ekaretia te Uea ae kaokaki, ao te tua ibukin kabwakakin kabwianibwai nakon te Atua. Ao e a tia n namakina moani kakoauaan te koaua inanona.
Te Uea e a tia n taku bwa E na kaota te koaua nakon ara iango ao nanora iroun te Tamnei ae Raoiroi (taraa D&C 8:2). Angiia aomata ake kona kaitibo ma ngaia a tia ni karekea moanakin te katauraoi anne. A tia n ongo ke ni wareka rongorongon te Atua ao Ana taeka. Ma ngkana nanoia e aki matoatoa raoi, ao ikanne are a kona iai ni bwaka, mae engae n anne ao a bon tia n namakinna, n te aro ae uarereke kamatoaan te koaua.
Te aine e a bon tauraoi raoi. Ai aron naba raraou, are ibukiia Aomata aika Itiaki ni Boong aika Kaitira are e a tia ni kamatebwaia ana Boki Moomon. E a tia n namakina te kakoaua ae bon koaua, ao e kinaa te kairiiri mai iroun te Tamnei bwa e na uota te kaobi. E bon katauraoaki man ana iango ao nanona.
Te Atua e katauraoiia aomata bwa ana karekea am kakoaua ibukin te koaua are e kaokaki. E tangira am onimaki ao imwiina am mwakuri n tibwaia n akea te maaku bwa tera te bwai ae rangi ni kakaawaki nakoim ao nakoia ake ko tangiriia.
Tauraoi n tibwauaa ni kanoakin am iango ni katoabong ma koauan te euangkerio. Ngkai ko kawakinii tuua ao ni karinea am berita aika a tabu, ko na namakina ana kakoaua te Tamnei ao riki ana tangira te Tia Kamaiu ibukim ao te koraki ake ko kaitibo ma ngaia.
Ngkana ko karaoa mwiokoam, ko na rikirake ni karekea te taneiai ae tamaroa ni kaitiboom ma aomata ake a tauraoi n ongora am kakoaua ibukin te koaua—are ko bon anganako mai nanom nako nanoia.
© 2012 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki n te USA. Kariaiakaki n te Ingiriti: 6/11. Kariaiakaki rairana: 6/11. Rairan te First Presidency Message, September 2012. Kiribati. 10369 859
Reirei man te Rongorongo Aei
Iangoa warekan te rongorongo ma te utu ao maroroakina are imwiina nakon te kabanea ni barakarabe, ike Beretitenti Eyring e maroroakinii kawai ni kakorakora ana kakoaua temanna. Maroroakinii ma te utu kakaawakin kaotakin te kakoaua ngkana e tibwauaaki te euangkerio. Naati inanon te utu a na kona n ibuobuoki ni karaoia bwa kanga te kaotioti n aron kaotan te kakoaua nakoia raoraoia.