Mensahe sang Unang Panguluhan, Septyembre 2012
Pagpaambit sang Ebanghelyo Tagipusuon sa Tagipusuon
Ang Dios magapahamtang sang handa nga mga tawo sa alagyan sang Iya mga alagad nga luyag magpaambit sang ebanghelyo. Naeksperiyensyahan na ninyo ina sa inyo kaugalingon nga kabuhi. Kon ano kasako ini matabo nagadepende sa paghanda sang inyo hunahuna kag inyo tagipusuon.
May abyan ako nga nagapangamuyo adlaw-adlaw nga makakita sang isa ka tawo nga handa sa pagbaton sang ebanghelyo. Nagadala sia pirme sang kopya sang Libro ni Mormon. Sang gab-i antes sang isa ka malip-ot nga biyahe, nagdesisyon sia nga indi magdala sang kopya kundi sa baylo magdala lang sang kard nga inugpanagtag. Pero sang nagahanda na sia nga maglakat, isa ka espirituhanon nga pagpabatyag ang nag-abot sa iya: “Magdala sang Libro ni Mormon.” Nagbutang sia sang isa sa iya bag.
Sang ang isa ka babayi nga iya kilala nagpungko sa tupad niya sa amo nga biyahe, nagpanumdum sia, “Amo na bala ini sia?” Nagpanumdum sia, “Paano ko ihambal ang parte sa ebanghelyo?”
Sa baylo, ang babayi nagsiling sa iya, “Nagabayad ka sang ika-pulo ukon tithing sa inyo simbahan, indi bala?” Nagsabat sia nga nagabayad sia. Naghambal ang babayi nga dapat sia magbayad sang ika-pulo sa iya simbahan pero wala niya ginahimo ini. Dayon namangkot sia, “Ano ang masugid mo sa akon parte sa Libro ni Mormon?”
Ginpaathag niya nga ang libro isa ka balaan nga kasulatan, isa pa gid ka saksi ni Jesucristo, nga ginlubad sang Propetang si Joseph Smith. Daw sa interesado ang babayi, gani nagkuot sia sa iya bag kag nagsiling, “May nagtulod sa akon nga dal-on ining libro. Siguro para ini sa imo.”
Ginsugdan sang babayi ang pagbasa sini. Sa ila pagbulagay, nagsiling ang babayi, “Masugilanonay pa gid kita sing parte sini.”
Ang indi sarang mahibaloan sang akon abyan—pero nahibaloan gid sang Dios—amo nga ang babayi nagapangita sang isa ka simbahan. Nakahibalo ang Dios nga napanilagan sang babayi ang akon abyan kag natingala kon ngaa ang iya simbahan labi nga nagapalipay sa iya. Ang Dios nakahibalo nga mamangkot sia parte sa Libro ni Mormon kag nga mangin handa sia nga matudloan sang mga misyonero. Handa sia. Subong man ang akon abyan. Ikaw kag ako mahimo man mangin handa.
Ang pagpanghanda nga kinahanglanon naton yara sa aton hunahuna kag aton tagipusuon. Ang babayi nakabati kag nakadumdum sang mga pulong parte sa Libro ni Mormon, sa ginpanumbalik nga Simbahan sang Ginuo, kag sa kasuguan nga magbayad sang ika-pulo sa Dios. Kag nabatyagan niya ang panugod sang pagsaksi sang kamatuoran sa iya tagipusuon.
Ang Ginuo nagsiling nga ipahayag Niya ang kamatuoran sa aton hunahuna kag aton tagipusuon paagi sa Balaan nga Espiritu (tan-awa sa D&C 8:2). Kalabanan sang mga tawo nga inyo masugata may mga panugod na sang sinang mga pagpanghanda. Nakabati ukon nakabasa na sila parte sa Dios kag sa Iya pulong. Kon ang ila mga tagipusuon hustohan ang kahumok, nakabatyag sila, bisan daw ano kahinay, sang pagkompirma sang kamatuoran.
Ang babayi handa na. Amo man ang akon abyan, ang Santo sa Ulihing Adlaw nga nakatuon sang Libro ni Mormon. Nakabatyag sia sang panaksihon ukon testimonya nga ini matuod, kag ginbaton niya ang pagpabatyag gikan sa Espiritu nga magdala sang kopya. Handa sia sa iya hunahuna kag iya tagipusuon.
Ginahanda sang Dios ang mga tawo nga magbaton sang inyo panaksihon sang ginpanumbalik nga kamatuoran. Ginapangayo Niya ang inyo pagtuo kag dayon ang inyo pagbuhat nga ipaambit nga wala’y kahadlok ang kon ano ang nangin tuman ka importante sa inyo kag sa inyo mga ginapalangga.
Maghanda nga magpaambit paagi sa pagpuno sang inyo panghunahuna adlaw-adlaw sang mga kamatuoran sang ebanghelyo. Sa inyo pagtuman sang mga kasuguan kag pagtuman sang inyo mga kasugtanan, mabatyagan ninyo ang panaksihon sang Espiritu kag mas dako nga pagpalangga sang Manluluwas sa inyo kag sa inyo mga masugata.
Kon himuon ninyo ang inyo bahin, mas dugang ninyo nga maangkon ang matam-is nga eksperiyensya nga makakita sang mga tawo nga handa mamati sa inyo panaksihon sang kamatuoran—nga ginatanyag tagipusuon sa tagipusuon, halin sa inyo pakadto sa ila.
© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang First Presidency Message, September 2012. Hiligaynon. 10369 861
Pagtudlo gikan sa Sining Mensahe
Binagbinaga nga basahon ang mensahe upod sa pamilya kag hambalan ang parapo antes-sa-katapusan, nga sa diin si Pangulong Eyring nagahambal parte sa mga pamaagi sa pagpabakod sang panaksihon sang isa ka tawo. Hambali upod sa pamilya ang kaimportante sang pagpabutyag sang panaksihon kon nagapaambit sang ebanghelyo. Ayhan makabulig sa kabataan sa pamilya ang pagdrama-drama kon paano magpabutyag sang panaksihon sa mga abyan.