Mensahe sa Visiting Teaching, Septyembre 2012

Pinasahi nga mga Panginahanglan kag Pag-alagad nga Ginahatag

Tun-i ining materyal sing mainampuon kag, kon nagakabagay, hambali ini upod sang mga sisters nga inyo ginabisita.Gamita ang mga pamangkot agud buligan kamo sa pagpabakod sang inyo mga sisters kag himuon ang Relief Society nga aktibo nga bahin sang inyo mismo kabuhi.

Litrato

Selyo sang Relief Society

Pagtuo, Pamilya, Bulig

“Ang panginahanglan sang iban yara gid pirme,” siling ni Pangulong Thomas S. Monson, “kag ang tagsa sa aton may mahimo agud buligan ang isa ka tawo. … Kay luwas lang kon mag-alagad kita sing ma-id-id sa iban sa bagay nga ginapahigad naton ang aton mga problema, diutay lang gid ang kapuslanan sang aton kaugalingon nga mga kabuhi.”¹

Bilang mga visiting teachers sinsero naton nga makilala kag mapalangga ang tagsa ka sister nga aton ginabisitahan. Ang pag-alagad sa aton mga ginabisitahan natural na lang nga magaabot gikan sa aton pagpalangga para sa ila (tan-awa sa Juan 13:34–35).

Paano naton mahibaloan ang espirituhanon kag temporal nga mga panginahanglan sang aton mga sisters agud makahatag kita sang pag-alagad kon ini ginakinahanglan? Bilang mga visiting teachers, may kinamatarong kita sa pagbaton sang inspirasyon kon magpangamuyo kita parte sa aton mga ginabisitahan.

Ang pagpadayon sang tayuyon nga pagpakig-angot sa aton mga sisters importante man. Ang personal nga mga pagbisita, mga tawag sa telepono, mensahe sang pagpaisog, mga e-mails, pagtupad sa iya, sinsero nga pagdayaw, pagpakig-abyan sa iya sa simbahan, pagbulig sa iya sa tion sang pagbalatian ukon panginahanglan, kag iban pa nga mga buhat sang pag-alagad tanan nagabulig sa aton sa pagbantay kag pagpabakod sang tagsa-tagsa.²

Ang mga visiting teachers ginapangabay sa pagreport sang kahimtangan, bisan ano nga pinasahi nga panginahanglan sang mga sisters, kag sang pag-alagad nga ginahatag sa ila. Ining mga sahi sang report kag ang aton pag-alagad sa aton mga sisters nagabulig sa aton sa pagpakita sang aton pagkadisipulo.³

Gikan sa Balaan nga mga Kasulatan

Juan 10:14–16; 3 Nefi 17:7, 9; Moroni 6:3–4

Gikan sa Aton Kasaysayan

Ang pag-alagad sa tagsa-tagsa ang pirme nangin sentro sang visiting teaching. Paagi sa padayon nga pag-alagad nagadala kita sang kaayo kag pagpakig-abyan nga labaw pa sangsa bulanan nga mga pagbisita. Ang aton pag-ulikid amo ang importante.

“Ang akon handum amo ang magpangabay sa aton mga sisters nga mag-untat sa pagpalibog parte sa isa ka tawag sa telepono ukon pagbisita kada bulan ukon kada tatlo ka bulan,” siling ni Mary Ellen Smoot, ang ika-13 nga pangkabilugan nga pangulo sang Relief Society. Ginpangabay niya kita nga “sa baylo magtutok sa pagsapopo sang lamharon nga mga kalag ukon sang inyo mga kabataan.”⁴

Si Pangulong Spencer W. Kimball (1895–1985) nagpanudlo, “Importante gid nga mag-alagad kita sa isa kag isa sa ginharian.” Pero iya gin-ako nga indi tanan nga pag-alagad kinahanglanon mangin dalayawon kaayo. “Sa masami, ang aton mga buhat sang pag-alagad nagalakip sing simple nga pagpaisog ukon sang paghatag… sang bulig sa ordinaryo nga mga buluhaton,” siling niya, “pero daw ano ka manami nga mga resulta ang sarang maangkon … gikan sa magagmay pero kinabubut-on nga mga buhat!”⁵

© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang Visiting Teaching Message, September 2012. Hiligaynon. 10369 861

Ano ang Sarang Ko Mahimo?

Nagapangayo bala ako sang personal nga inspirasyon agud mahibal-an kon paano masabat ang espirituhanon kag temporal nga mga panginahanglan sang tagsa ka sister nga gintugyan sa akon agud bantayan?
Paano ang mga sisters nga akon ginabantayan makahibalo nga nagaulikid ako sa ila kag sa ila mga pamilya?