Mensahe ti Umuna a Panguluen, Septiembre 2012
Panangibinglay iti Ebanghelio a Naimpusuan
Isagana ti Dios dagiti tao a nakasagana nga umawat iti ebanghelio tapno maam-ammo dagiti nakasagana a katulonganna a mayat a mangibinglay iti ebanghelio. Napasamak daytan iti bukodyo a biag. No kasano ti kasansan a mapasamak daytoy ket agpannuray iti kinamanagsagana ti panunotmo ken pusom.
Addaanak iti maysa a gayyem nga agkarkararag iti inaldaw tapno makaam-ammo iti maysa a tao a nakasagana nga umawat iti ebanghelio. Mangitugtugot isuna iti maysa a kopia ti Libro ni Mormon. Maysa a rabii sakbay ti ababa a panagbiahe, inkeddengna ti saan a mangitugot iti maysa a kopia ngem ketdi mangitugot isuna iti pass-along card. Ngem idi nakasaganan a pumanaw, maysa a naespirituan a pammaregta ti simmangbay kenkuana: “Mangitugotka iti Libro ni Mormon.” Impanna ti maysa a kopia iti bagna.
Idi nagtugaw ti maysa a babai nga am-ammona iti abayna iti panagbiaheda, napanunotna, “Daytoy kadin ti tao a pangibinglayak iti ebanghelio?” Naggiddanda manen a nagbiahe nga agsubli. Napanunotna, “Kasano ngata nga irugik ti panangisurok iti ebanghelio?”
Kinunana ketdi kenkuana, “Baybayadam ti apagkapullom iti simbaanyo, di met?” Imbagana a baybayadanna. Imbagana a bayadanna koma ti apagkapullo iti simbaanna ngem saanna nga inaramid. Kalpasanna sinaludsodna, “Ania ti maibagam kaniak maipanggep iti Libro ni Mormon?”
Inlawlawagna a ti libro ket nasantuan a kasuratan, mainayon a pammaneknek ken ni Jesucristo, nga impatarus ni Propeta Joseph Smith. Kasla interesado isuna, isu nga inruarna ti libro iti bagna ket kinunana, “Natignayak a mangitugot iti daytoy a libro. Panagkunak para kenka daytoy.”
Rinugianna a basaen daytoy. Iti panagsinada, kinunana, “Agsaritatanto iti ad- adu pay maipapan iti daytoy.”
No ania ti saan nga ammo ti gayyemko—ngem ammo ti Dios—ket ti panagsapsapulna iti maysa a simbaan. Ammo ti Dios a binantayanna ti gayyemko ken masmasdaaw no apay a pinaragsak unay isuna ti simbaanna. Ammo ti Dios a damagennanto maipanggep iti Libro ni Mormon ken sitatallugodto isuna a masuruan dagiti misionario. Nakasaganan isuna. Kasta met ti gayyemko. Mabalin a makapagsaganata met.
Ti panagsagana a masapultayo ket adda iti panunot ket pusotayo. Nangngegan ti babai ken nalagipna dagiti balikas maipanggep iti Libro ni Mormon, ti naisubli a Simbaan ti Apo, ken ti bilin nga agbayad iti apagkapullo iti Dios. Ken nariknana ti rugi ti pammaneknek maipapan ti kinapudno iti pusona.
Kinuna ti Apo nga ipalgaknanto ti kinapudno iti panunottayo ken iti pusotayo babaen ti Espiritu Santo (kitaen iti DkK 8:2). Kaaduan kadagiti tao a maam-ammoyonto ket addaan iti rugi iti dayta a panagsagana. Nangngegan wenno nabasadan maipanggep iti Dios ken ti balikasna. No umdas ti kinalukneng dagiti pusoda, nariknadan, nupay saan a nalawag, ti pammatalged ti kinapudno.
Nakasaganan ti babai. Kasta met ti gayyemko, ti Santo iti Ud-udina nga Aldaw a nangadalen iti Libro ni Mormon. Nariknana ti pammaneknek a pudno daytoy, ket nailasinna ti pangiturong manipud iti Espiritu a mangitugot iti maysa a kopia ti Libro ni Mormon. Nakasagana isuna iti panunot ken pusona.
Isagsagana ti Dios dagiti tao a mangawat iti pammaneknekmo maipanggep iti naisubli a kinapudno. Kasapulanna ti pammatitayo ken kalpasanna ti tignayyo a mangibinglay nga awan panagbuteng no ania ti nagbalin a nakapatpateg kadakayo ken kadagiti ipatpategyo.
Agsagana a mangibinglay babaen ti panangpunnoyo iti panunotyo iti inaldaw kadagiti kinapudno ti ebanghelio. Bayat ti panagtungpalyo kadagiti bilin ken panangdayaw kadagiti katulaganyo, mariknayo ti pammaneknek ti Espiritu ken ad-adda pay iti ayat ti Mangisalakan para kadakayo ken kadagiti maam-ammoyo.
No aramidenyo ti pasetyo, agtultuloy a maaddaankayto ti nasam-it a padas a maam-ammo dagiti tao a nakasaganan a dumngeg iti pammaneknekyo maipanggep iti kinapudno—a naipaay a personal manipud iti pusoyo nga agturong iti pusoda.
© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti First Presidency Message, September 2012. Ilokano. 10369 864
Panangisuro manipud iti Daytoy a Mensahe
Ibilang ti panangbasayo iti mensahe a kaduayo ti pamilia ken paglilinnawagan ti sumaruno iti maudi a parapo, a nangilawlawagan ni Presidente Eyring kadagiti wagas tapno mapapigsa ti pammaneknek ti maysa a tao. Paglilinnawaganyo a kadua ti pamilia ti maipanggep ti kinapateg ti panangiburay iti pammaneknek no ibingbinglay ti ebanghelio. Mabalin a matakuatan dagiti ubbing iti pamilia a napateg ti panangyakem iti no kasano ti panangiburay iti pammaneknek kadagiti gagayyem.