Mensahe iti Visiting Teaching, Septiembre 2012

Dagiti Naisangsangayan a Kasapulan ken Naipaay a Serbisio

Sikakararag nga adalenyo daytoy a material ken, no maitutop, ilawlawagyo daytoy kadagiti kakabsat a babbai a sarungkaranyo. Usarenyo dagiti saludsod a mangtulong kadakayo a mangpapigsa kadagiti kakabsatyo a babbai ken mangaramid iti Relief Society nga aktibo a paset iti bukodyo a biag.

Ladawan

Selio ti Relief Society

Pammati, Pamilia, Tulong

“Kanayon nga adda dagiti panagkasapulan dagiti sabali,” kinuna ni Presidente Thomas S. Monson, “ket tunggal maysa kadatayo ket makaaramid iti maysa a banag tapno makatulong iti maysa a tao. … Malaksid no agserbitayo a sipapasnek kadagiti sabali a malipatantayo maipanggep ti bukodtayo a parikut, addaan bassit a panggep iti bukodtayo a biag.”¹

Kas visiting teacher naimpusuan a maam-ammotayo ken maipateg ti tunggal kabsat a babai a sarungkarantayo. Ti panagserbi kadagiti sarungkarantayo ket gagangay a sumangbay gapu iti ayattayo kadakuada (kitaen iti Juan 13:34–35).

Kasano ti panangammotayo kadagiti naespirituan ken temporal a kasapulan dagiti kabsattayo a babbai tapno makapagserbitayo no kasapulan daytoy? Kas visiting teacher, karbengantayo ti umawat iti pammaregta no agkararagtayo maipanggep kadagiti sarungkarantayo.

Napateg pay ti panangpatalinaed iti regular a pannakipagkita kadagiti kabsattayo a babbai. Dagiti personal nga isasarungkar, tawag iti telepono, ababa a surat ti pammaregta, e-mails, pannakikatugaw kenkuana, naimpusuan a pammadayaw, panangkadkadua kenkuana iti simbaan, panangtulong kenkuana iti panawen ti sakit wenno panagkasapulan, ken dadduma pay a tignay ti panagserbi ket makatulong amin kadatayo a mangbantay ken mangpapigsa iti tunggal maysa.²

Maidawat nga ireport dagiti visiting teacher no ania ti kasasaad dagiti sabali pay a kabsat a babbai, ania man a naisangsangayan a panagkasapulan dagiti kabsat a babbai, ken ti naipaay a serbisio kadakuada. Dagitoy a kita ti report ken ti panagserbitayo kadagiti kabsattayo a babbai ket makatulong kadatayo a mangipakita iti kinadisipulotayo.³

Manipud kadagiti Nasantuan a Kasuratan

Juan 10:14–16; 3 Nephi 17:7, 9; Moroni 6:3–4

Manipud iti Pakasaritaantayo

Ti panagserbi iti tunggal maysa ket kanayonen a napateg a paset ti visiting teaching. Babaen iti agtultuloy a panagserbi mangisangbaytayo iti kinaanus ken pannakigayyem nga agturong iti labes dagiti binulan nga isasarungkar. Ti panangtaripatotayo ti napateg.

“Ti tarigagayko ket agpakaasi kadagiti kabsattayo a babbai nga agsardeng nga agdandanag maipanggep iti maysa a tawag ti telepono wenno iti kada tallo a bulan wenno binulan nga isasarungkar,” kinuna ni Mary Ellen Smoot, ti maika-13 a general president ti Relief Society. Indawatna kadatayo a “mangipamaysa ketdi iti panangtaripato kadagiti saan pay a nataengan a kararua.”⁴

Ni Presidente Spencer W. Kimball (1895–1985) insurona, “Napateg nga agserbitayo iti tunggal maysa iti pagarian.” Ngem nailasinna a saan nga amin a serbisio ket masapul nga agbalinka a banuar tapno makapagserbika. “Masansan, a dagiti panagserbitayo ket aglaon iti simple a pammaregta wenno panangted … iti tulong nga addaan kadagiti gagangay nga aramid,” kinunana, “ngem pagayusan dagiti nagloriaan a pagbanagan … manipud iti babassit ngem sitatallugod nga aramid!”⁵

© 2012 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/11. Pannakaanamongna a maipatarus: 6/11. Pannakaipatarus ti Visiting Teaching Message, September 2012. Ilokano. 10369 864

Ania ti Maaramidko?

Agsapsapulak kadi iti personal a pammaregta tapno maammuak no kasano ti sumungbat kadagiti naespirituan ken temporal a panagkasapulan ti tunggal kabsat a babai a naituding kaniak tapno aywanak?
Kasano a maammuan dagiti kabsat a babbai nga ay-aywanak nga ipatpategko ida ken dagiti pamiliada?