Mensahe sa Visiting Teaching, Oktubre 2012

Pagtipig sang Aton mga Kasugtanan

Tun-i ining materyal sing mainampuon kag, kon nagakabagay, hambali ini upod sang mga sisters nga inyo ginabisita. Gamita ang mga pamangkot agud buligan kamo sa pagpabakod sang inyo mga sisters kag himuon ang Relief Society nga aktibo nga bahin sang inyo mismo kabuhi.

Pagtuo, Pamilya, Bulig

Ang visiting teaching isa ka pagpahayag sang aton pagkadisipulo kag isa ka paagi sa pagtipig sang aton mga kasugtanan ukon covenants samtang kita nagaalagad kag nagapabakod sang tagsa-tagsa. Ang kasugtanan isa ka sagrado kag nagapadayon nga panaad sa tunga sang Dios kag sang Iya mga kabataan. “Kon aton mahangpan nga kita mga anak sang kasugtanan, mahibaluan naton kon sin-o kita kag kon ano ang ginapaabot sang Dios sa aton,” siling ni Elder Russell M. Nelson sang Korum sang Napulo’g Duha ka mga Apostoles. “Ang Iya layi nasulat sa aton mga tagipusuon. Sia ang aton Dios kag Iya kita katawhan.”¹

Bilang mga visiting teachers sarang kita magpabakod sinang aton ginabisita sa ila mga pagpaninguha nga tipigan ang ila sagrado nga mga kasugtanan. Sa paghimo sini, kita nagabulig sa ila sa paghanda para sa mga bugay sang kabuhi nga wala’y katapusan. “Ang tagsa ka sister sa sining Simbahan nga naghimo sing mga kasugtanan upod sa Ginuo may yara sing diosnon nga sugo nga magbulig sa pagluwas sang mga kalag, sa pagpanguna sang kababayin-an sang kalibutan, sa pagpabakod sang mga puluy-an sang Sion, kag sa pagpasad sang ginharian sang Dios,”² siling ni Elder M. Russell Ballard sang Korum sang Napulo’g Duha ka mga Apostoles.

Samtang kita nagahimo kag nagatipig sang sagrado nga mga kasugtanan, kita mangin mga instrumento sa mga kamot sang Dios. Sarang kita makapahayag sang aton mga ginapatihan kag makapabakod sang pagtuo sang tagsa-tagsa sa Amay nga Langitnon kag kay Jesucristo.

Gikan sa Balaan nga mga Kasulatan

1 Nefi 14:14; Mosias 5:5–7; 18:8–13; Doctrine and Covenants 42:78; 84:106

Gikan sa Aton Kasaysayan

Ang templo “isa ka lugar sang pagpasalamat sang tanan nga mga santos,” ang Ginuo nagpahayag paagi sa Propetang si Joseph Smith sang 1833. Isa ini “ka lugar sang pagtudlo para sinang gintawag sa pag-alagad sa tanan sang ila mga palangakuan ukon callings kag mga katungdanan; agud mahimo sila nga maperpekto sa paghangop sang ila buluhaton, sa teoriya, sa prinsipyo, kag sa doktrina, sa tanan nga butang nahanungod sa ginharian sang Dios sa duta” (tan-awa sa D&C 97:13–14).

Ang mga sisters sang Relief Society sa Nauvoo, Illinois sang damlag pa nga mga tinuig sang 1840 nagbinuligay sa paghanda para sa mga ordinansa sa templo. Sa mga ordinansa sang mas mataas nga priesthood nga nabaton sang mga Santos sa Ulihing mga Adlaw sa Templo sang Nauvoo, “ang gahum sang pagka-diosnon [gin]pakita” (tan-awa sa D&C 84:20). “Samtang gintipigan sang mga Santos ang ila mga kasugtanan, ining gahum nagpabakod kag nagsustiner sa ila sa ila mga pagtilaw sa mga inadlaw kag tinuig nga nag-alabot.”³

Sa Simbahan karon, ang matutom nga mga babayi kag lalaki sa bilog nga kalibutan nagaalagad sa templo kag padayon nga nagabaton sing kusog sa mga bugay nga sarang lamang mabaton paagi sa mga kasugtanan sa templo.

© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang Visiting Teaching Message, October 2012. Hiligaynon. 10370 861

Ano ang Sarang Ko Mahimo?

Paano ang akon mga kasugtanan nagapabakod sa akon?
Paano ko ginabuligan ang mga sisters nga akon ginabantayan nga matipigan ang ila mga kasugtanan?