Mensahe sang Unang Pangulohan, Oktubre 2012
Isa ka Yabi sa isa ka Malipayon nga Panimalay
Ginsugdan sang bantog nga nobelista nga Ruso nga si Leo Tolstoy ang iya nobela nga Anna Karenina sa sining mga pulong: “Ang malipayon nga mga panimalay tanan palareho; ang tagsa ka di-malipayon nga panimalay indi malipayon sa iya sini kaugalingon nga paagi.”1 Samtang indi ako pareho kasigurado kay Tolstoy nga ang malipayon nga mga panimalay tanan palareho, nadiskubrehan ko ang isa ka butang nga kumon sa kalabanan: may pamaagi sila sa pagpatawad kag pagkalipat sang mga kapaltahan sang iban nga tawo kag sa pagpangita sang ila kaayo.
Inang yara sa di-malipayon nga mga panimalay, sa pihak nga bahin, masami nga nagareklamo, nagahupot sing mga dumot, kag dawsa indi malipatan ang nagliligad nga mga agrabyo.
“Huo, pero …” umpisa sang mga indi malipayon. “Huo, pero wala ka makahibalo kon ano kasakit ang ginhimo niya sa akon,” siling sang isa. “Huo, pero wala ka makahibalo kon daw ano sia kalain,” siling pa sang isa.
Ayhan pareho sila nga husto; ukon pareho nga indi husto.
May madamo nga lebel sang pag-agrabyo. May madamo nga lebel sang pagsakit. Pero ang akon natalupangdan amo nga sa masami aton ginarasonan ang aton kaakig kag ginapauyonan ang aton mga konsensya paagi sa pagsugid sa aton mga kaugalingon sang mga istorya parte sa mga motibo sang iban nga nagakondenar sang ila mga binuhatan nga indi mapatawad kag maiyaiyahon, samtang sa amo man nga tion, nagatib-ong sang aton kaugalingon nga mga motibo bilang tinlo kag wala’y kabasulan.
Ang Ido sang Prinsipe
May isa ka dumaan nga istorya sang mga Welsh ukon mga taga-Wales gikan sa ika-13 nga siglo parte sa isa ka prinsipe nga sa iya pagpauli naabtan ang iya ido nga duguon ang guya sini. Dali-dali sia nga nagsulod sa iya balay kag, sa iya kakibot, nakit-an niya nga ang iya lapsag nga lalaki wala na kag ang duyan nabaliskad. Sa kaakig, ginhunos sang prinsipe ang iya espada kag ginpatay ang iya ido. Pagkadugay-dugay, iya nabatian ang hibi sang iya anak—ang lapsag buhi! Sa tupad sang lapsag nagahigda ang isa ka patay nga lobo ukon wolf. Sa tuod-tuod, ginprotektahan gali sang ido ang lapsag sang prinsipe gikan sa isa ka nagapamatay nga lobo.
Bisan nga matayog ang ini nga istorya, ini nagapakita sang isa ka punto. Nagabukas ini sing posibilidad nga ang istorya nga aton ginasugid sa aton mga kaugalingon parte sa kon ngaa ang iban nga tawo nagagawi sa paagi nga wala sa masami nagasanto sa kamatuoran—kon kaisa indi pa gani naton luyag nga mahibaloan ang kamatuoran. Mas luyag pa gani naton nga magpangatarungan sa aton kaakig paagi sa paghupot sang aton kalain sing buot kag kaugot. Kon kaisa ining mga aligutgot nagalawig sing binulan ukon tinuig. Kon kaisa nagalawig ini sing bilog nga kinabuhi.
Isa ka Panimalay nga Natunga
Isa ka amay ang indi makapatawad sang iya anak nga lalaki sa pagtalikod sa dalan nga gintudlo sa iya. Ang bata may mga abyan nga wala maluyagi sang amay, kag naghimo sia sing madamo nga mga butang nga baliskad sa ginapensar sang iya amay nga iya dapat himuon. Nagresulta ini sang pagdisgustohanay sa tunga sang amay kag anak, kag sang masarangan na sang bata, naghalin sia sa ila puluy-an kag wala na nagbalik. Daw halos na sila maghambalanay liwat.
Nangin husto bala ang amay? Siguro.
Nangin husto bala ang anak? Siguro.
Ang nahibal-an ko lang nga ining panimalay natunga kag nangin indi malipayon tungod wala ni isa sa amay kag anak ang makapatawad sa kada isa. Indi nila malimtan ang mapait nga mga inagihan nila sa isa kag isa. Ginpuno nila ang ila mga tagipusuon sing kaakig imbis sing pagpalangga kag pagpatawad. Ang tagsa sa ila nagpanginwala sa iya kaugalingon sang oportunidad nga maipluwensyahan ang kabuhi sang isa para sa kaayuhan. Ang pagdisgustohanay sa tunga nila makita nga masyado kadalom kag kadako nga ang tagsa nangin espirituhanon nga priso sa iya kaugalingon nga emosyunal nga pag-isahanon.
Sa maayong palad ang aton mapinalanggaon kag maalamon nga Wala’y Katapusan nga Amay sa Langit naghatag sing paagi nga malampuwasan ining mga pagdisgustohanay bangod sang bugal ukon pagkamaiyaiyahon. Ang dako kag wala’y katapusan nga Pagpasag-uli ukon Atonement amo ang pinakahalangdon nga buhat sang pagpatawad kag pag-uliay. Ang iya sini kadakuon labaw pa sa akon paghangop, apang nagapamatuod ako sa bug-os kong tagipusuon kag kalag sang iya sini pagkamatuod kag pinakamataas nga gahum. Ang Manluluwas naghatag sang Iya Kaugalingon bilang kabayaran para sa aton mga sala. Paagi sa Iya makaangkon kita sang kapatawaran.
Wala sing Panimalay nga Perpekto
Wala sing sin-o man sa aton nga wala sing sala. Ang tagsa sa aton nagakasala, lakip na ikaw kag ako. Kita tanan nakaagi nga nasakitan. Kita tanan nakasakit sa iban.
Paagi sa pagsakripisyo sang aton Manluluwas nga sarang naton maangkon ang pangkahitaasan ukon exaltation kag wala’y katapusan nga kabuhi. Sa aton pagbaton sang Iya mga paagi kag pagdaog sang aton bugal paagi sa pagpahumok sang aton mga tagipusuon, sarang kita makadala sang pag-uliay kag pagpatawaray sa aton mga panimalay kag personal nga mga kabuhi. Ang Dios magabulig sa aton nga mangin mas mapinatawaron, nga mangin mas handa sa paglakat sang ika-duha nga milya, nga mangin una nga mangayo pasensya bisan pa nga indi aton sala, nga magpahigad sang mga lawig na nga dumot kag indi na ini pagdabukan. Salamat sa Dios, nga naghatag sang Iya Bugtong nga Inanak, kag sa Anak, nga naghatag sang Iya kabuhi para sa aton.
Sarang naton mabatyagan ang pagpalangga sang Dios para sa aton adlaw-adlaw. Indi bala kita dapat maghatag sing dugang pa gid sang aton mga kaugalingon sa aton mga isigkatawo subong sang gintudlo sa aton paborito nga himno “Because I Have Been Given Much”?2 Ang Ginuo nagbukas sing puwertahan agud mapatawad kita. Indi bala nga husto lamang nga ipahigad ang aton kaugalingon nga pagkamaiyaiyahon kag bugal kag magsugod sa pagbukas sinang bulahan nga puwertahan sang pagpatawad sa sinang aton nadisgustohan—ilabi na sa tanan sang aton kaugalingon nga panimalay?
Sa katapusan, ang kalipay wala nagaabot gikan sa pagkaperpekto kundi gikan sa pagpangabuhi sang diosnon nga mga prinsipyo, bisan pa sa magagmay nga mga tikang. Ang Unang Panguluhan kag Korum sang Napulo’g Duha ka mga Apostoles nagpahayag: “Ang kalipay sa kabuhi sang panimalay mas madali nga malab-ot kon napasad sa mga pinanudlo ni Ginuong Jesucristo. Ang madinalag-on nga mga pag-asawahay kag mga panimalay napahamtang kag ginapadayon sa mga prinsipyo sang pagtuo, pangamuyo, paghinulsol, pagpatawad, pagtahod, gugma, kaluoy, pagbuhat, kag maayo nga mga kahiwatan sa paglingaw-lingaw.”3
Ang pagpatawad nabutang sa tunga mismo sining simple nga mga kamatuoran, nga napasad sa plano sang kalipayan sang aton Amay nga Langitnon. Tungod ang pagpatawad nagaangot sang mga prinsipyo, nagaangot ini sang mga tawo. Isa ini ka yabi, nagabukas ini sang sirado nga mga puwertahan, ini amo ang panugod sang isa ka tampad nga alagyan, kag amo ini ang isa sang aton pinakamanami nga mga paglaum para sa isa ka malipayon nga panimalay.
Kabay nga ang Dios magabulig sa aton nga mangin mas mapinatawaron sa aton mga panimalay, mas mapinatawaron sa tagsa-tagsa, kag ayhan mas mapinatawaron bisan pa sa aton mga kaugalingon. Ginapangamuyo ko nga mahimo naton masalapuan ang pagpatawad bilang isa ka maayo nga pamaagi sa diin ang kalabanan sang malipayon nga mga panimalay nagapalareho.
© 2012 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/11. Petsa sang pagtugot sa paglubad: 6/11. Paglubad sang First Presidency Message, October 2012. Hiligaynon. 10370 861
Pagtudlo gikan sa Sining Mensahe
“Sa imo paghanda sang tagsa ka leksyon, pamangkuta ang imo kaugalingon kon paano inang prinsipyo isa ka butang nga naeksperiyensyahan sang mga miyembro sang panimalay sa ila kaugalingon nga kabuhi” (Teaching, No Greater Call [1999], 171). Binagbinaga ang pag-agda sa mga miyembro sang panimalay sa pagpaambit sing positibo nga mga eksperiyensya nga ila naagom ukon naobserbahan sa pagpatawad. Hambali ining mga eksperiyensya, nga ginatudlo ang mga bugay sang pagpatawad. Maghingapos paagi sa paghatag sang imo panaksihon ukon testimonya parte sa kaimportante sang pagpatawad sa tagsa-tagsa.