Ala Mai Ia i o Tatou Tiute
E tatau ona tatou ala mai i lo tatou tiute ma faaauau ai ma le faatuatua a o tatou utuvai mai le mana e mafai ai, faamafanafana, faamalosiau, ma faamalolo ai o le Togiola.
Ina ua maea ona valaauina au i le au peresitene aoao o le Aualofa, sa ou lagonaina se manao ia iloa atili e uiga i tamaitai sa muamua atu ia te au. Sa faagaeetia au i aoaoga a Sister Zina D. Young, fesoasoani muamua i le au peresitene aoao lona lua o le Aualofa. Fai mai a ia, “Uso e, ua tatau ona tatou ala mai i o tatou tiute.”1 Sa ou manatunatu loloto i upu ala mai ma le tiute ma faia ai se sailiiliga faaopoopo i tusitusiga paia.
I le Feagaiga Fou, na aoao atu ai e Paulo le Au Paia i na ona po:
“Ua oo i le itu po e ala ai e na momoe: aua ua latalata nei ia te i tatou le ola. …
“Ua leva le po, ua lata mai le ao: … ia tatou oofu i ofutau o le malamalama.”2
I le Tusi a Mamona, na aoao atu ai e Alema lona nuu i tiute paia o i latou e ulu atu i se feagaiga ma le Atua:
“Ma o lenei, ona ua outou mananao e o mai i le lafu a le Atua, ma ta’ua o ona tagata, ma ua outou loto e tauave avega a le tasi, ina ia mama;
“Ioe, ma outou loto e faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga, ma tutu o ni molimau a le Atua i taimi uma ma i mea uma, ma i nofoaga uma. …
“O lenei ou te fai atu ia te outou, afai o le manao lea o o outou loto, se a se mea tou te tetee ai i le papatisoina i le suafa o le Alii, o se molimau i ona luma ua outou ulu atu i se feagaiga faatasi ma ia, o le a outou auauna atu ia te ia ma tausi ana poloaiga, ina ia mafai ona liligi atili tele mai e ia lona agaga i luga o outou?
“Ma o lenei ina ua faalogo mai tagata i nei upu, sa pati o latou lima i le olioli, ma alalaga mai: O le manao lea o o matou loto.”3
O le saunoaga a Sister Young ma nei mau ua matua’ia ai ona ou manatu i “tiute” ia e tatau ona tatou ala mai i ai i o tatou aso.
A papatisoina i tatou, ua tatou ulu atu i se feagaiga. Na aoao mai Elder Robert D. Hales, “A tatou osia ma tausia feagaiga, ua tatou o ese mai le lalolagi ma ulu atu i le malo o le Atua.”4
Ua suia i tatou. Ua ese o tatou foliga ma a tatou taga. Ua ese mea tatou te faalogologo i ai ma faitau i ai ma tautala i ai, ua ese foi mea tatou te ofuina aua ua avea i tatou ma afafine o le Atua, ua noatia ia te Ia e ala i se feagaiga.
A faamauina i tatou, ua tatou maua le meaalofa o le Agaga Paia, o le aia tatau e maua ai e le aunoa le uunaiga a se tasi o le Aigaatua e taialaina i tatou, e faamafanafanaina i tatou, ma puipuia i tatou. Na te lapataia i tatou pe a tofotofoina e savavali ese mai a tatou feagaiga ma foi atu i le lalolagi. Ua aoaoina i tatou e Peresitene Boyd K. Packer e faapea, e leai se tasi o i tatou “o le a faia se mea sese matuia e aunoa ma le muai lapataia e ala i uunaiga a le Agaga Paia.”5
Ina ia maua lenei meaalofa o le i ai pea o le Agaga, e tatau ona tatou agavaa ma mataala e uiga i le siakiina o le tulaga o o tatou loto. Pe o malū o tatou loto? Pe o ia i tatou se loto e maualalo, se loto e talia gofie aoaoga, se loto e agamalu? Po o ni loto e faasolo ina maaa ona ua tatou faatagaina ia leo e tele naua o le lalolagi e tata’i esea i tatou mai uunaiga lemu mai le Agaga?
Ina ua papatisoina i tatou, sa suia o tatou loto ma ua fagua i le Atua. A o tatou i ai i la tatou malaga i le olaga nei, e manaomia ona tatou fesili ifo e le aunoa ia i tatou lava, “Afai sa [ou] iloa se suiga o le loto, … pe mafai ona [ou] lagonaina i le taimi nei?”6 Ma afai, e leai, aisea?
E toatele le Au Paia anamua “sa oo i lenei liuga tele i [o latou] loto.”7 Na fagua ai i latou e maua faamanuiaga o le malumalu e faamalolosia ai i latou i o latou tiute. Sa ō le Au Paia anamua i Navu “i le malumalu i le aso atoa ma le po”8 ia maua sauniga ma osia feagaiga a o lei amataina la latou malaga i sisifo.
O le tala lea a Sarah Rich, o se uso o le Aualofa i Navu: “E tele faamanuiaga sa matou mauaina i le maota o le Alii, na mafua ai ona matou olioli ma mafanafana i le lotolotoi o o matou faanoanoaga ma mafai ai ona matou maua le faatuatua i le Atua, aua ua iloa o le a Ia taialaina i matou ma tausia i matou i le malaga e le mailoa o loo faamalumalu mai i o matou luma.”9
Faatasi ai ma loto ua suia e ala i le faatuatua i le Faaola, sa latou faalagolago i le mana o Lana Togiola. Sa fagua i latou e galulue. Sa latou iloa i le ta’ele o o latou loto o loo i ai se tasi—o le Faaola—ua malamalama i o latou mafatiaga patino aua na puapuagatia o Ia mo i latou i le Faatoaga o Ketesemane ma luga o le satauro. Sa Ia lagonaina lo latou atuatuvale, o lo latou le mautonu, o o latou tiga, ma lo latou tuulafoaiina. Na Ia mafatia i o latou faanoanoaga, o o latou sauaga, o lo latou matelaina, o lo latou vaivai, ma ola na maimau. Ma talu ai na mafatia o Ia i nei mea uma, sa mafai ona Ia fetalai atu ia te i latou, “Ia outou o mai ia te au, o outou uma [o e] tigaina ma mafatia i avega, o a’u foi e malolo ai outou.”10
Ma sa latou o mai. Sa latou talitonu ma mulimuli i le perofeta. Sa latou iloaina o le a umi le malaga, e faigata foi lo latou tiute. Sa latou iloa o le a manaomia le ositaulaga, ae sa lagolagoina e lo latou faatuatua ma latou pipiimau i a latou feagaiga, ma sa latou saunia faaleagaga.
A o lei tuua Navu, sa tusia e se vaega o le Au Paia se savali i le falefetafai e potopoto ai i totonu o le malumalu lea na faamalosia i latou e lafoai. E faitauina, “Ua silasila mai le Alii i la matou osigataulaga: mulimuli mai ia i matou.”11
Talu ai nei sa ou auai i se savaliga sopo faapaionia ma alii talavou ma tamaitai talavou o la matou uarota. O taeao taitasi lava ou te fesili ifo ai ia te au lava, “O le a la’u osigataulaga? E faapefea ona ou mulimuli atu ia i latou?”
I le aso lona lua o le savaliga sopo, sa matou tosoina a matou taavaletoso i le valu maila (13 km) ina ua matou taunuu i se nofoaga o le ala e ta’ua “o le tosoga a tamaitai.” Sa tuueseese alii ma tamaitai ma sa faamuamua alii i le tumutumu. Ina ua amata ona matou tosoina taavaletoso, sa ou ea a’e i luga ma iloa atu ai o matou tuagane o le perisitua, o e talavou ma e matutua, o laina faaituala lua i le alasopo, ua to ese o latou pulou i la latou faaaloalo i tamaitai.
Sa faigofie le ala i le taimi muamua, ae e lei leva ae o matou laasia le oneone mafiafia, ma ua amata foi ona tifato le mauga. Sa punou lo’u ulu ma toso i lo’u malosi atoa, ae ou faalogoina ua toso faatātā atu le taavaletoso ma sa ou ea a’e ai i luga ma iloa atu Lexi, o se tasi o o matou tamaitai talavou ma lo’u tuaoi. Ua oo le tosoina o lana taavaletoso i luga, ma ina ua vaaia lo matou manaomia o se fesoasoani, o lea na toe taufetuli mai ai. Ina ua matou taunuu i luga, sa ou matuai manao lava e toe tamoe ifo i lalo e fesoasoani ia i latou na mulimuli mai ia te au, ae sa ou tau manava, ma sa tatavale lo’u fatu ma faafia ai ona oo mai upu pe le fatu i lo’u mafaufau. Sa ou matauina ma le lotofaafetai a o faapalasi e isi tamaitai talavou a latou taavaletoso ae toe taufetuli e fesoasoani.
Ina ua taunuu tagata uma i le tumutumu, sa matou faaaogaina ni nai minute e tusia ai lagona i a matou api talaaga. Sa ou tusia: “E lei lava la’u tapenaga faaletino, o lea sa leai ai so’u malosi e fesoasoani ai ia i latou na mulimuli mai ia te au. Atonu o le a ou le toe tosoina lava se taavaletoso, ae ou te le manao lava e toilalo faaleagaga o’u uso, e leai lava!”
Sa o se aafiaga paia na mafua ai ona ou ala mai faaleagaga i o’u tiute i lo’u aiga ma isi. A o faaauau pea la tatou malaga, sa ou manatunatu i mea sa ou aoaoina ma vaavaai mo le faaaogaina.
Muamua, sa ou mafaufau i o’u uso, i latou o e sa tosoina ma i latou o e o loo faaauau pea i le taimi nei ona toso na o i latou a latou taavaletoso. Toeitiiti 23 pasene o na tamaitai i lena vaega o taavaletosolima, sa na o i latou i se vaega o lena malaga. O nisi o i latou e lei faaipoipo, o isi ua tete’a ma taitoalua, po ua oti foi a latou tane.12 Sa latou tosoina faatasi—o afafine o le feagaiga, talavou ma matutua, i ituaiga olaga eseese, i le ala lava e tasi, ma le faamoemoe e tasi.
O i latou na taufetuli e fesoasoani i o latou uso na manaomia le fesoasoani, na faamanatu mai ai ia te au le au lavea’i, o ē o loo vaaia, ma e lē o vaaia, o e e vave tele la latou matau, vaaia se tulaga manaomia, ma faatino.
Sa ou mafaufau i upu a le Alii: “O le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga.”13
Sa faaituala lua o le alasopo ni alii faatuatua, usiusitai, ma tausi feagaiga. O lo latou mana o le perisitua—le mana e faaaogaina e le Atua e faamanuia ai Lana fanau—ua siitia, faamalolosia, ma lagolagoina i matou. O i latou o se faamanatu e le tuulafoaiina lava i tatou. E mafai ona tatou maua lena mana e le aunoa, pe a tatou tausia a tatou feagaiga.
Sa ou mafaufau i alii o e sa aveesea i le malaga mai aiga, ma tuua ai na o i latou e tosoina ia taavaletoso. E toatele tamaloloa na maliliu i le malaga. O nisi atalii na faamisiona i o latou nuu. O nisi na muamua i e tapenapena mo le taunuu atu o o latou aiga i le Vanu o Sate Leki. O nisi na lei i ai ona o a latou lava filifiliga, e le tausia a latou feagaiga.
E faapei o i latou na muamua atu, e toatele foi i latou o loo ola i le taimi nei i tulaga e le lelei. Tatou te faaauau pea ona aoao atu ma taumafai mo mea silisili aua ua tatou iloa, o le taumafai pea lava pea tatou te agaigai ai pea lava i luga i le ala ma saunia avanoa ia maua ai faamanuiaga folafolaina uma a o tatou “faatalitali atu i le Alii.”14
Ua tofu i tatou ma mafatiaga ma o le a faaauau pea lava i o tatou olaga. O lenei olaga faitino, o se taimi o tofotofoga, ma o le a tatou maua pea lava pea avanoa e faaaoga ai lo tatou faitalia e filifili ai mea o le a tatou aoaoina mai mafatiaga o le a oo mai.
I le avea ai o ni afafine o le Atua, tatou te faaauau ai pea i luga o le ala i le faatuatua, aua ua tatou iloa e faapei ona aoao mai Peresitene Thomas S. Monson: “O sauniga faaola na mauaina i le malumalu lea e faataga ai ona tatou toe foi atu i se aso i lo tatou Tama Faalelagi i se mafutaga e faavavau faaleaiga, ma faaeeina ai i faamanuiaga ma le mana mai luga e matuai aoga ai lava osigataulaga uma ma taumafaiga uma.”15
E le lava le na ona i ai i se malaga; e tatau ona tatou ala mai i lo tatou tiute ma faaauau ai ma le faatuatua a o tatou utuvai mai le mana e mafai ai, faamafanafana, faamalosiau, ma faamalolo ai o le Togiola.
Uso e, ou te alofa ia te outou. Ou te le masani i le toatele o outou, ae ou te iloa pe o ai outou! O i tatou o ni afafine tausi feagaiga i Lona malo, ma ua faaeeina i le mana e ala i a tatou feagaiga, ma ua tatou saunia e faia o tatou tiute.
E tapenaina e le Aualofa ia tamaitai mo faamanuiaga o le ola e faavavau e ala i le fagua faaleagaga o i tatou e faateleina i le faatuatua ma le amiotonu patino. Tatou amata ia i tatou lava. Tatou amata i le mea o loo tatou i ai nei. Tatou amata i le aso. A oo ina tatou ala mai faaleagaga, o le a sili atu ona lelei ona tatou faamalolosia aiga ma auaiga ma fesoasoani i isi.
O se galuega lenei o le faaolataga, ma o le mana e mafai ai ma faamalolosia ai o le Togiola e mafai ai mea uma. Ala mai i lo tatou faasinomaga. Ala mai i lo tatou tiute. O i tatou o afafine o lo tatou Tama Faalelagi, o le e alofa ia i tatou. Ou te molimau atu ai i le suafa o Iesu Keriso, amene.