Ua Tuu i Lalo le Tulaga Manaomia o le Matutua o Faafeautalai Faamisiona

Saunia e Heather Whittle Wrigley

Talafou o le Ekalesia ma Mea Na Tutupu

I le tatalaga o le Konafesi Aoao Lona 182 Faaleafatausaga, sa faia ai e Peresitene Thomas S. Monson se faasalalauga faapea, o le a amata i le taimi lava lenei, ona mafai ona auauna atu faafaifeautalai faamisiona ia alii i le 18 tausaga ao tamaitai o le 19 tausaga.

Mulimuli ane, i se fonotaga ma le au faasalalau, sa faamamafaina atu ai e Elder Russell M. Nelson o le Korama a Aposetolo e Toasefululua faapea o lea suiga e faia i ai se filifiliga: “E le tatau i alii talavou ma tamaitai talavou ona amataina la latou auaunaga sei vagana ai ua latou saunia faaleagaga ma le faaletino,” na ia saunoa ai. O mea nei e pei o le aoga, tulaga faaleaiga, ma le soifua maloloina o loo tumau pea ona avea ma mea taua e mafaufau i ai mo le taimi e auauna atu ai faamisiona.

Sa faamatalaina e Elder Jeffrey R. Holland o le Korama a Aposetolo e Toasefululua faapea, o i latou ua faaolioli e avea ma faifeautalai e mafai ona fautuaina mai e o latou epikopo ma peresitene o le siteki mo le galuega faafaifeautalai i le 120 aso ao lei atoa lo latou 18 tausaga po o le aso latou te avanoa ai. E mafai ona ulufale ia alii talavou i le nofoaga autu mo le aoaoina o faifeautalai (NAF) pe a uma ona faauu mai le aoga maualuga po o se tulaga talitutusa atoa ai ma le ausia o lona 18 tausaga. E mafai ona ulufale ia tamaitai pe a atoa lo latou ta’i 19 tausaga.

Ua talosagaina ia faifeautalai faaolioli ina ia tapena lelei mo le misiona ao lei oo i le taimi latou te o atu ai i le NAF.

“Ua faatele’a’i e le Atua Lana galuega,” o le saunoaga lea a Elder Holland. “Ma ua Ia manaomia nisi faifeautalai naunautai e toatele ma le agavaa e faasusulu atu le malamalama ma le upumoni ma le faamoemoe ma le faaolataga o le talalelei a Iesu Keriso i se lalolagi ua matele ina pogisa ma taufaafefe.”

Na saunoa Elder Holland atonu o le a i ai nisi misiona e faatuina.

Ina ia fesoasoani i le faatinoina o le faateleina o faifeautalai lea ua faamoemoe i ai i misiona i le salafa o le lalolagi, o le a faaitiitia ai le taimi e faaalu i le NAF i le tasi vaetolu mo faifeautalai uma. O le a fesoasoani atili i le tapenaina o faifeautalai se kosi faaleaoaoga e 12 vaiaso lea na faatoa faatulagaina e faaaoga i le misiona.

Ua mafai nei e alii ma tamaitai talavou ona amata galulue o ni faifeautalai i le 18 ma le 19 tausaga, i lena faasologa, e fuafua i tulaga o tagata taitoatasi ma se naunautaiga o taitai perisitua i le lotoifale.